Wp/rki/ဆင်ဖြူကုန်းစေတီတော်
| ဆင်ဖြူကုန်းစေတီတော် | |
 | |
| တည်နီရာ | မြောက်ဦးမြို့၊ ရခိုင်ပြည် |
| ကုသိုလ်သျှင် | မင်းဒေါလျာ |
| တည်ထားခုနှစ် | ကောဇာသက္ကရာဇ် (၈၄၄) ခု၊အေဒီ (၁၄၈၂) ခုနှစ် |
တည်နီရာ[edit | edit source]
မြောက်ဦးနန်းတော်ကုန်းဧ့ မြောက်ဘက်ကပ်လျက် ဟာရီတောင်ဧ့ အရှေ့ဘက်တောင်စွယ်ထက်တွင် တည်ဟိပြီး ဟာရီတောင်စေတီတော်ဧ့ အရှေ့ဘက်၊ ဆင်ဖြူကန်ဧ့တောင်ဘက်တွင် ဟိပါရေ ။
ကုသိုလ်သျှင်[edit | edit source]
ဘုရင်မင်းဒေါလျာရေ ကောဇာသက္ကရာဇ် (၈၄၄) ခု၊အေဒီ (၁၄၈၂) ခုနှစ်တွင် တည်ဆောက်လှူဒါန်းခပါရေ ။
သမိုင်းအကျဉ်း[edit | edit source]
ဘုရင်မင်းဒေါလျာမှာ မြောက်ဦးခေတ်ဘုရင်အဆက်ဆက် ဆင်ဖြူတော်တိထားဟိခရေ ကုန်းတော်ထက်တွင် တည်ဆောက်လှူဒါန်းခရေ ကြောင့် စေတီတော်ကိုလည်း ဆင်ဖြူကုန်းစေတီတော်ဟု ခေါ်တွင်ခကတ်ခြင်းဖြစ်ပါရေ ။ ဆင်ဖြူကုန်းနန့် တဆက်တည်းကပ်လျက် မြောက်ဘက်တွင် ဆင်ဖြူကန်ကိုလည်း ဂနိထက်တိုင် တွိဟိရပါရေ ။ ညောင်ပင်ဈေး ဆရာတော်ဘဒ္ဒန္တရေဝတကို ဦးထိပ်ထားလျက်ဂူတော်ကို ( ၁၁-၉-၂ဝဝ၇ ) ခုနှစ်တွင်လည်းကောင်း၊ စေတီတော်ကို (၂၁-၁၁-၂၀၁၀) ခုနှစ်တွင်လည်းကောင်း၊ ဦးမိုးကျော်သူ ဇနီးဒေါ်မံမေတို့ မိသားစုနန့် ဒကာ/ ဒယိကာမတိမှ ထပ်မံပြုပြင် လှူဒါန်းတည်ဆောက်ခပါရေ ။ ဆင်ဖြူကုန်းစေတီတော်အနီးဟိ နီရာအတော်တိတိမှာမြောက်ဦးခေတ်တစ်ခေတ်လုံး၌ မိဖုရားအဆောင်၊ မိဖုရားအိမ်တော်တိ ထားဟိခရေ နီရာတိပင်ဖြစ်ပါရေ ။
ဗိသုကာလက်ရာ[edit | edit source]
ဆင်ဖြူကုန်းစေတီတော်မှာ ဟာရီတောင်မှ အရှေ့ဘက်သို့ ထိုးထွက်နီရေ ပေ (၁၀) ကျော်ခန့်မြင့်သည့် တောင်စွယ်တောင်ကုန်းထက်တွင် ကျောက်အတိဖြင့် တည်ဆောက်ထားရေ စေတီတော်တစ်ဆူပင်ဖြစ်ပါရေ ။ စေတီတော်ဧ့ အရှေ့ဘက်တွင် ဂူတော်ကိုလည်း တဆက်တည်းတည်ဆောက်ထားပါရေ ။ စေတီတော်အောက်ခြေအချင်း (၁၈) ပေခန့်ဟိပြီး ဂူတော်အရှေ့အနောက်အချင်း (၂၂) ပေခန့်ဟိပါရေ ။ စေတီတော်အမြင့် (၂၇) ပေခန့်ဟိပြီး ဂူတော်အမြင့် ပေ (၂၀) ပတ်ဝန်းကျင်ခန့်ဟိပါရေ ။ စေတီတော်အောက်ခြေမှာ လေးမျက်နှာပုံစံဟိပြီး ပစ္စယံအဆင့်တိကို ရှစ်မျက်နှာဖြင့် တည်ဆောက်ထားပါရေ ။ ပစ္စယံအလယ်အဆင့်တွင် မုခ်ကပ်တိကို တစ်ခုစီတပ်ဆင်ထားပါရေ ။ ကြေးဝန်းမှ အပေါ်ပိုင်းထီးတော်ကို အဝိုင်းပုံစံဖြင့် တည်ဆောက်ထားပါရေ ။ ဂူတော်မှာ ရှစ်မျက်နှာဖြစ်ပြီး ဂူထဲတွင် (၄) ပေကျော်ခန့်မြင့်ရေ ကျောက်ဆင်းတု တော်တစ်ဆူကို (၂) ပေကျော်ခန့်မြင့်ရေ ပလ္လင်တော်ပေါ်တွင် ပူဇော်ထားပါရေ ။
ကိုးကား[edit | edit source]
မြောက်ဦးဒေသ ရှေးဟောင်းအဆောက်အဦးများ (ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ယဉ်ကျေးမူဝန်ကြီးဌာန) -၂၀၁၅
