Wp/rki/ရတနာစံဦးစေတီတော်
တည်နီရာ[edit | edit source]
မြောက်ဦးနန်းတော်ကုန်းဧ့ အရှေ့မြောက်ဘက် မိုင်ဝက်ကျော်ကျော်ခန့်အကွာ ၊ လောကမဉ္ဇူစေတီတော်ဧ့ အနောက်ဘက်၊ ရတနာစံရွေးစေတီတော်ဧ့ တောင်ဘက်တွင် တည်ဟိပါရေ။
ကုသိုလ်သျှင်[edit | edit source]
ဘုရင်နရနုဧ့သားတော် ဘစောဖြူမင်းက ကောဇာသက္ကရာဇ် (၈၁၀)ခု၊ အေဒီ (၁၄၄၈) ခုနှစ်တွင်တည် ၊ လှူဒါန်းခပါရေ။
သမိုင်းအကျဉ်း[edit | edit source]
ရတနာစံဦးစေတီတော်ကို မြောက်ဦးခေတ် အစောပိုင်းတွင် ဘုရင်ဘစောဖြူ တည်ထားလှူဒါန်းခရေ။ မြောက်ဦးခေတ် ပျက်သုဉ်းပြီးနောက် စေတီတော်ကို ပြုပြင်မွမ်းမံမည့်သူမဟိဘဲ ပျက်စီးနီခရာ ကောဇာသက္ကရာဇ် (၁၃၇၃)ခု၊ တန်ဆောင်မုန်းလပြည့်နီ့၊ ခရစ်သက္ကရာဇ် (၂၀၁၁)ခုနှစ်၊ နိုဝင်ဘာလ(၁၀)ရက်နီ့မှသာ မြောက်ဦးဆရာတော် ဝနဝါသီ ဘဒ္ဓတဝါယာမိန္ဒ ဆရာတော်အားဦးထိပ်ထားပနာ ဒေါက်တာသိန်းထွန်း၊ ဇနီးဒေါ်စန်းစန်းရီ မိသားစုတို့မှ ထပ်မံလှူဒါန်းတည်ဆောက်ခပါရေ။ ရတနာသုံးပါးတွင် ဘုရားရတနာ အဦးအမြတ်ကို ရည်စူးပနာ တည်ဆောက်လှူဒါန်း ခရေကြောင့် ရတနာစံဦးစေတီဟု ခေါ်တွင်ခြင်းဖြစ်ပါရေ။
ဗိသုကာလက်ရာ[edit | edit source]
ရတနာစံဦးစေတီတော်မှာ တောင်ကုန်းပေါ်တွင် ကျောက်ဖြင့်တည်ဆောက်ထားခရေ စေတီတော်တစ်ဆူပင် ဖြစ်ပါရေ။ စေတီတော်ဧ့ အောက်ခြေပန္နက်မှာ အဝိုင်းပုံဖြစ်ပြီး အချင်း (၃၈)ပေ ခန့်ဟိပြီး အမြင့်မှာလည်း (၃၈) ပေခန့်ဟိပါရေ။ စေတီတော်ဧ့ အလယ်လိုဏ်ဂူတော်တွင် ဆင်းတုတော်ကြီးတစ်ဆူကို ကျောက်ဆစ်လက်ရာ ပလ္လင်တော်ဖြင့် ထုဆစ်ထားပါရေ။ စေတီတော်ဧ့ လိုဏ်ဂူအတွင်း တောင်နန့် မြောက်နံရံတို့တွင်လည်း မုခ်ထွင်းပြီး ဆင်းတုတော်ငယ် (၁)ဆူစီ ပူဇော်ထားပါရေ။ ဆင်းတုတော်ကြီးအား အရှေ့ဘက်တွင် မုခ်ဦးဖွင့်ထားပါရေ။ မုခ်ဦးကို ရခိုင်စိတ္တလင်္ကာရအနုလက်ရာ ဗျာလ်၊ ဘီလူးပန်းကိုက်စရေပန်းလက်ရာတိဖြင့် ထုဆစ်တန်ဆာဆင်ထားပါရေ။ စေတီတော်ကို ကျောက်ထီးတော်တင်လှူပူဇော်ထားပြီး သပိတ်မှောက်၊ သင်္ကန်းစည်းတိတွင်လည်း ရခိုင်စိတ္တလင်္ကာရ အနုလက်ရာပန်းဒီဇိုင်းတိဖြင့် ထုဆစ်ပူဇော်ထားပါရေ။ စေတီတော်ခေါင်းလောင်းမှောက်အောက်တွင်လည်း ကြာပွင့်ဖတ်ကလေးတိဖြင့် ပတ်လည်ထုဆစ်ပူဇော်ထားပါရေ။ စေတီတော်အောက်ပိုင်းတွင် ပစ္စယံသုံးဆင့်ဖြင့် တည်ဆောက်ထားပြီး မုခ်ဦးအပြင်ဘက် တောင်မြောက်နံရံနှစ်ဘက်တွင်လည်း ကြာမှောက်၊ ကြာလန်ပွင့်ဖတ်ကလေးတိဖြင့် အလှဆင်ထားပါရေ။ ရတနာစံဦးစေတီတော်မှာ ခန့်ငြားထည်ဝါလှပြီး ရှေးခေတ်ရခိုင်စိတ္တလင်္ကာရအနုလက်ရာ ပန်းတိဖြင့် ထုံမွှမ်းထားရေ စေတီတော်တစ်ဆူပင်ဖြစ်ပါရေ။
ကိုးကား[edit | edit source]
မြောက်ဦးဒေသ ရှေးဟောင်းအဆောက်အဦးများ (ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ယဉ်ကျေးမူဝန်ကြီးဌာန) -၂၀၁၅
