Wp/rki/ဇုန်ဒတ်လင်္ကာပျံချီစေတီတော်
တည်နီရာ
[edit | edit source]မြောက်ဦးနန်းတော်ကုန်းဧ့အရှေ့မြောက်ဘက် (၃) ဖာလုံကျော်ခန့်အကွာတွင် တည်ဟိပါရေ။ ဇုန်ဒတ် လက်ျာ ပျံချီအိမ်တော်ရာဧ့အနောက်ဘက်တောင်ထိပ် ဦးမြဝါစေတီတော်ဧ့အရှေ့ဘက်တွင် ကျရောက်ပါ ရေ။
ကုသိုလ်သျှင်
[edit | edit source]ကောဇာသက္ကရာဇ် (၉၈၄) ခု အေဒီ (၁၆၂၂) ခုနှစ်တွင် ဘုရင် မင်းခမောင်းလက်ထက် ဇုန်ဒတ်လက်ျာပျံချီ အမတ်ကြီးမှ တည်ဆောက်လှူဒါန်းခပါရေ။
သမိုင်းအကျဉ်း
[edit | edit source]ဘုရင်မင်းခမောင်းလက်ထက်တွင် ဇုန်ဒတ်လင်္ကာပျံချီ အမတ်ကြီးမှ တည်ထားခရေ စေတီတော်တစ်ဆူပင်ဖြစ်ပါရေ။ ဇုန်ဒတ်လင်္ကျာပျံချီဟူရေမှာ စစ်ပညာအရာ၌ သူမတူအောင် စွမ်းရည်ပြနိုင်ရေ စစ်သူကြီး၊ ကြည်း/ ရေ တပ်မတော်တို့၌ တစ်ဖက်ကမ်းခတ်အောင် ထူးချွန်လူတိကို ဇုန်ဒတ်လင်္ကာပျံချီဟူသည့် ဘွဲ့ထူးကို ပေးအပ်လေ့ ဟိရေ။ တစ်နည်းအားဖြင့် အကြီးဆုံး ဗိုလ်ချုပ်ကြီးကို ခေါ်ရေဟု သိဟိရပါရေ။ ၎င်းအမတ်ကြီးမှာပင် ဇုန်ဒတ်လင်္ကာပျံချီစေတီတော်အနီး တောင်ဘက်ခြေရင်းတွင် ဇုန်ဒတ်လင်္ကာပျံချီ သိမ်ကျောင်းကိုလည်း ကောဇာသက္ကရာဇ် (၉၈၇) ခု၊ အေဒီ (၁၆၂၅) ခုနှစ်တွင် တည်ဆောက်လှူဒါန်းခကြောင်းကို ကျောက်စာရေးထိုး မှတ်တမ်းတင်ထားခ ပါရေ။
ဗိသုကာလက်ရာ
[edit | edit source]စေတီတော်ကို ပေ (၁၀၀) ကျော်ခန့်မြင့်ရေ ဇုန်ဒတ်တောင်ဧ့မြောက်ဘက်ထိပ်တွင် ကျောက်အတိဖြင့် တည်ဆောက်ထားရေကို တွေ့ဟိရပါရေ။ စေတီတော်ကုန်းကို မဟာရံတံတိုင်းဖြင့် ဖွဲ့စည်းတည်ဆောက်ထားပြီး မဟာရံတံတိုင်းအကျယ်မှ (၅၃) ပေခန့်ဟိရေကို တွိဟိရပါရေ။ မဟာရံတံတိုင်းဧ့လက်ဟိအခြေအနီမှာ (၅) ပေ ကျော်ခန့်ဟိပါရေ။ မဟာရံတံတိုင်းဧ့အရှေ့နန့်အနောက်ဘက်တိတွင် တက်လမ်းလှေကားတိကို သေချာစွာတွေ့ ဟိရပြီး တောင်မြောက်တို့တွင်လည်း လှေကားတိဟိလိမ့်မည်ဟု ယူဆရပါရေ။ မဟာရံတံတိုင်း အောက်ခြေကို မိုးလျှော၊ ဖောင်းလုံးတိဖြင့် အလှဆင်ထားရေကို တွေ့ဟိရပါရေ။ စေတီတော်ကို မဟာရံတံတိုင်းကုန်းပေါ် အလယ်တည့်တည့်တွင် တည်ဆောက်ထားပါရေ။ စေတီတော်မှာ အောက်ခြေအချင်း (၂၃) ပေခန့်ဟိပြီး လက်ဟိကျန်ဟိ နီသည့် အမြင့်မှာ (၁၂) ပေခန့်ဟိပါရေ။ စေတီတော်ကို ရှစ်မျက်နှာပုံသဏ္ဌာန် တွေ့ဟိရပါရေ။ စေတီတော်အောက်ခြေ မဟာရံတံတိုင်းတွင် အရှေ့မြောက်ဘက်တွင် (၃) ပေခန့်ဟိရေ ကျောက်ဆင်းတုတော်ကျိုးတစ်ဆူကို ဖူးတွေ့ရပါရေ။ ဤစေတီတော်အနီးမှာပင် ဇုန်ဒတ်လင်္ကာပျံချီ ကျောက်စားကြီးတစ်ချပ်ကိုတွေ့ဟိခရပြီး ယခုအခါ မြောက်ဦးရှေးဟောင်း သုတေသနပြတိုက်တွင် ထိန်းသိမ်းပြသလျက်ဟိပါရေ။ ကျောက်စာဧ့အမြင့်မှာ (၆) ပေခန့်ဟိပြီး အကျယ် ၂ ပေ ၈ လက်မခန့်နန့် ထုအထူ ၆ လက်မခန့်ဟိပါရေ။ ကျောက်စာမှာ ရခိုင်စာသက်သက်ဖြင့် ရေထိုးထားရေ
ကျောက်စာတစ်ချပ်ဖြစ်ပါရေ။ စေတီတော်အနီးဟိ ဇုန်ဒတ်လင်္ကျာပျံချီ သိမ်ကျောင်းတော်မှာ လက်ဟိအခြေအနီ၌ နံရံအမြင့် ၁ ပေကျော်ခန့်သာတွေ့ဟိနိုင်ပါတော့ရေ။ သိမ်ကျောင်းတော်ဧ့အလျားမှာ (၃၂)ပေခန့်၊ အနံ (၁၆)ပေခန့်နန့် နံရံအထူ (၃)ပေကျော်ခန့်ဟိပါရေ။ ကျောင်းတော်ဧ့အနောက်ဘက်အခြမ်းတွင်လည်း ပလ္လင်ရာတစ်ခုကိုလည်းတွေ့ဟိရပါရေ။ ထို့အပြင် ဖုန်ဇတ်လက်ျာ ပျံချီအမတ်ကြီးနီထိုင်ခရေ အိမ်တော်ရာနီရာကိုလည်း စေတီတော်၏အရှေ့ဘက်တောင်ခြီရင်းတွင် ကပ်လျှက် ဂနိထိတိုင်တွေ့ဟိနီရပြီး အဆိုပါနီရာတွင် ယခုအခါ သီဟိုဠ်ပင်တိစိုက်ထားပါရေ။
ကိုးကား
[edit | edit source]မြောက်ဦးဒေသ ရှေးဟောင်းအဆောက်အဦးများ (ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ယဉ်ကျေးမူဝန်ကြီးဌာန) -၂၀၁၅
