Wp/rki/မင်းခေါင်ရွှေတူစေတီ
တည်နီရာ[edit | edit source]
မြောက်ဦးနန်းတော်ကုန်းဧ့ အရှေ့ဘက်တစ်မိုင်ခန့်အကွာ၊ ဘုရားအုပ်စေတီတော်ဧ့ တောင်ဘက်တွင် တည်ဟိပါရေ။
ကုသိုလ်သျှင်[edit | edit source]
မဟာသီရိသုဓမ္မာရာဇာမင်းဧ့ မိဖုရားခေါင်ကြီးနတ်သျှင်မယ်ရေ ကောဇာသက္ကရာဇ် (၉၉၁) ခု၊ အေဒီ (၁၆၂၉) ခုနှစ်တွင် တည်ထားလှူဒါန်းခပါရေ။
သမိုင်းအကျဉ်း[edit | edit source]
မြောက်ဦးရွှေနန်းသျှင် ဘုရင်မဟာသီရိသုဓမ္မာရာဇာမင်းကြီးရေ သက္ကူမာရ်အောင် စေတီတော်ကြီးကို တည်ဆောက်လှူဒါန်းခသည့်အခါတွင်ပင် မိဖုရားခေါင်ကြီး နတ်သျှင်မယ်လည်း မင်းခေါင်ရွှေတူစေတီတော်ကြီးကို သိမ်တော်ကြီးနန့်တကွ တည်ဆောက်လှူဒါန်းခပါရေ။ မင်းခေါင်ရွှေတူစေတီတော်ကြီးနန့်အတူ မင်းခေါင် ရွှေတူကျောင်းတော်ကိုလည်း စေတီတော်ဧ့ အနောက်ဘက်အနီး၌ တည်ဆောက်လှူဒါန်းခပါရေ။ မင်းတကာတို့ဧ့ အထွဋ်အခေါင် ရွှေရောင်တဝင်းဝင်းနန့် တည်ဆောက်လှူဒါန်းခရေ စေတီတော်ဖြစ်ပနာ မင်းခေါင်ရွှေတူစေတီတော်ဟု ခေါ်တွင်ခြင်း ဖြစ်ပါရေ။ မိဖုရားခေါင်ကြီး နတ်သျှင်မယ်မှာ ဘာသာတရား၊ ပရိယတ္တိစာပေတတ်မြောက်သည့်အရာ၌မြောက်ဦးခေတ်တွင် အလွန်ထင်ရှားကျော်ကြားရေ မိဖုရားတစ်ပါးပင် ဖြစ်ပါရေ။
ဗိသုကာလက်ရာ[edit | edit source]
မင်းခေါင်ရွှေတူစေတီတော်ကို ဘုရားအုပ် ဘုရားတောင်ဘက်တောင်စွယ်ကို မြေညှိထားရေ ကုန်းတော်ပေါ်တွင် ကျောက်ဖြင့် တည်ဆောက်ထားရေ စေတီတော်ကြီးတစ်ဆူ ဖြစ်ပါရေ။ ကုန်းတော်တစ်ခုလုံးကို မဟာရံတံတိုင်းခတ်ပနာ အလယ်တွင် တည်ဆောက်ထားရေ စေတီတော်ကြီးတစ်ဆူပင်ဖြစ်ပါဧ့။ စေတီတော်မှာ အောက်ခြေလေးမျက်နှာ ခိုနန်းချိုးတိနန့် ခေါင်းလောင်းမှောက်အောက်ခြေမှ အပေါ်ပိုင်းကို ထုလုံးချွန်ပုံစံမျိုးဖြင့် တည်ဆောက်ထားပြီးကျောက်တုံးတိကို အံထွင်းပနာ တည်ဆောက်ထားပါရေ။ စေတီတော်အောက်ခြေတစ်မျက်နှာလျှင် (၆၂) ပေခန့်ဟိပနာ အမြင့် (၈၀) ပေခန့်ဟိရေဟု သိဟိရပါရေ။ စေတီတော်ပစ္စယံအဆင့်တစ်ချို့တွင် လေးမျက်နှာ၌ မုခ်တံကဲလေးတိ ပါဟိပါရေ။ မုခ်တိကို ရှေးခေတ်ရခိုင်ရိုးရာ စိတ္တိလင်္ကာရအနုလက်ရာတိဖြင့် ထွင်းထုအလှဆင်ထားပါရေ။ စေတီတော် ကြေးဝန်းအဆင့်တိတွင်လည်း ကြာဖတ်တိ ပတ်လည်ထုဆစ်ပူဇော်ထားပါရေ။ သင်္ကန်းစည်း၊ သပိတ်မှောက်၊ ကြာဆုံတို့တွင်လည်း အနုစိတ်လက်ရာမြောက်စွာ ထုဆစ်ပူဇော်ထားပါရေ။ ရင်ပြင်တော်တစ်ခုလုံးကိုလည်း မူလက စဉ့်ရောင်စုံလက်ရာတိဖြင့်ခင်းပနာ အလှဆင်ခရေဟု သိဟိရပါရေ။ စေတီတော်ရင်ပြင်တံတိုင်းအနား ပတ်ဝန်းကျင်တွင်လည်း မူလကျောက်ဆစ်လက်ရာဟောင်း အပိုင်းအစတချို့ ပြန့်ကြဲနီရေကို တွေ့ဟိရပါရေ။
ကိုးကား[edit | edit source]
မြောက်ဦးဒေသ ရှေးဟောင်းအဆောက်အဦးများ (ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ယဉ်ကျေးမူဝန်ကြီးဌာန) -၂၀၁၅
