Wp/rki/မျှော်တော်မူစေတီ

တည်နီရာ

“မြောက်ဦးနန်းတော်ကုန်းဧ့ အရှေ့တောင်ဘက် မိုင်ဝက်ခန့်အကွာတွင် တည်ဟိပြီး တဝဂ္ဂ၊ လွမ်းစေတီတို့ဧ့ အရှေ့ဘက်တွင် တည်ဟိပါရေ။ 

ကုသိုလ်သျှင်

ဘုရင်မင်းဗာကြီးလက်ထက် ဇုနှုတ်စစ်သူကြီးသီဟပတိက ကောဇာသက္ကရာဇ် (၈၉၆) ခု၊အေဒီ (၁၅၃၄) ခုနှစ်တွင် တည်ဆောက်လှူဒါန်းခပါရေ။ 

သမိုင်းအကျဉ်း

မျှော်တော်မူစေတီတော်မှာ ဘုရင်မင်းဗာကြီးလက်ထက် ဇုန္နတ်စစ်သူကြီး သီဟပတိတည်ထားလှူဒါန်းခပြီးနောက် သီရိသုဓမ္မရာဇာဧ့ မိဖုရားနတ်သျှင်မယ်ကလည်း မွမ်းမံခရေဟုသိဟိရပါရေ။ ရခိုင်စစ်ရေတိ စစ်ချီထွက်သည့် အခါ ကျန်ရစ်သူ စစ်သူကြီးကတော်တိရေ ဤစေတီတော်သို့လာရောက်ကာ စစ်မြေတလင်းသို့ရောက်နီရေ မောင်တော်တိအား မျှော်မှန်းတမ်းတပြီး ပန်း၊ ရေချမ်း၊ ဆီမီးတိ ကပ်လှူဆုတောင်းခြင်းတိကို ပြုလုပ်လေ့ဟိပနာ မျှော်တော်မူစေတီဟု ခေါ်တွင်ခရေ။

ဗိသုကာလက်ရာ

မျှော်တော်မူစေတီရေ ပေ (၁၀၀) ခန့်မြင့်ရေ တောင်စောင်းပေါ်တွင် အုတ်ဖြင့် တည်ဆောက်ထားရေ စေတီတော်တစ်ဆူပင်ဖြစ်ပါရေ။ စေတီတော်ကို အုတ်ဖြင့် မဟာရံတံတိုင်း (၆) မျက်နှာဖော်ပနာ ကာရံထားပါရေ။ မဟာရံတံတိုင်းကို မုခ်ဝ (၃) ခုဖြင့် တည်ဆောက်ထားစာကို တွေ့ဟိရပါရေ။ စေတီတော်မှာ အောက်ခြေ လေးမျက်နှာပုံစံ ဖြစ်ပြီး တစ်မျက်နှာလျှင် (၃၁) ပေခန့်ဟိပါရေ။ စေတီတော်အမြင့်မှာ ပေ (၄၀) ကျော်ခန့်ဟိပါရေ။ စေတီတော်ပန်းတင်ခုံ ထောင့်လေးထောင့်တွင် ခြင်္သေ့(၄)ကောင်ပါဟိပါရေ။ ခြင်္သေ့တစ်ကောင်စီဧ့ အမြင့်မှာ (၇) ပေခန့်ဟိပြီး အရှည် (၅) ပေခန့်၊ ဒုအထူ (၃) ပေခန့်ဟိပါရေ။ စေတီတော်မှာ အရှေ့ဘက်ကို လေးပေခန့်ထုတ်ပနာ မုခ်ဦးဖွင့်ထားပါရေ။ မုခ်ဦးလှိုဏ်ထဲတွင် အမြင့် (၅) ပေခန့်၊ ပခုံးစွန်းနှစ်ဘက် အကျယ် (၂) ပေခန့်၊ ဒူးစွန်း နှစ်ဘက်အကျယ် (၃) ပေခန့်ဟိရေ ဆင်းတုတော်တစ်ဆူကို ပူဇော်ထားပါရေ။ ကျောက်ဆင်းတုတော် တစ်ဆူဖြစ်ပါရေ။ ဆင်းတု တော်ပူဇော်ထားရေ ပလ္လင်တော်အမြင့်မှာလည်း (၃) ပေခန့်ဟိပါရေ။ စေတီတော်ကို ပုံစံ(၃)မျိုးဖြင့် ဖွဲ့စည်းတည်ဆောက်ထားပါရေ။ အောက်ခြေပန်းတင်ခုံမှာ လေးမျက်နှာဖြစ်ပြီး ပစ္စယံအဆင့်တိမှ ခေါင်းလောင်းမှောက်အောက်အထိ ရှစ်မျက်နှာ ၊ ခေါင်းလောင်းအောက်ခြေမှ ငှက်ပျောဖူးအထိ အဝိုင်းပုံစံဖြင့် တည်ဆောက်ထားပါရေ။ စေတီတော်ကို (၁၉၉၇) ခုနှစ်က မြောက်ဦး ရှေးဟောင်းသုတေသနနန့် အမျိုးသား ပြတိုက်ဦးစီးဌာနမှ ထပ်မံမွမ်းမံခပါရေ။

ကိုးကား

မြောက်ဦးဒေသ ရှေးဟောင်းအဆောက်အဦးများ (ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ယဉ်ကျေးမူဝန်ကြီးဌာန) -၂၀၁၅