Wp/apc/ويكيبيديا:ملحوظية (عيل و قبايل)

noborder

هيدي الصفحة هي صفحة إرشادات بويكيبيديا شامي.

الإرشاد هو معيار مقبول بالعموم، و لازم كل المحررين يتبعو بالاعتماد على الحس السليم، مع العلم إنو الإرشادات ما بتندرج تحت بند السياسات.

ويكيبديا مشروع موسوعة، و هدفها تحقيق الوثوقية و الحيادية بالمقالات. لهيك، لما بتحكي عن العيل أو القبايل، بيكون الهدف توضيح معلومات تاريخية، علمية، أو سياسية. ويكيبديا مو مكان للتفاخر، ذكر المفاخر و المآثر، أو استعراض الوجاهة. كمان هي مو شجرة أنساب أو منصة للتباهي بأسماء معينة.

المشكلة التانية هي إنو تاريخ العيلات بالغالب بيعتمد عَ التاريخ الشفهي المروي اللي ما بيكون موثق. هالنوع من التاريخ بيكون عرضة للمبالغات و الأوصاف المو دقيقة، و بهيك مفهوم بيقارب شي متل "سير العرب" أو "السير الشعبية". لهيك، أي ذكر إلو لازم يكون ضمن سياق دراسة علمية اجتماعية لكيفية تطور السير و التاريخ الشعبي، و ما لازم يعتبر حقائق علمية واقعية.

معايير قبول المقالات

ويكيبديا بتقبل بس مقالات معيّنة إذا كانت بتتوافق مع الوصف التالي:

1. التوثيق بالمصادر المعروفة و الموثوقة:
   • لازم تكون المعلومات مستندة لمصادر موثوقة و مشهورة، بحيث أي مستخدم يقدر يطلع عليها.
2. منع المصادر الشفهية:
   • المصادر الشفهية مو مقبولة، مراجع أشخاص مو معروفين، أو وثائق و كتب مجهولة المصدر.

بهالطريقة، بتسعى ويكيبديا إنها تحافظ على مصداقيتها و تقدم محتوى حيادي ودقيق.

الحالات المسموح فيها

1. القبايل التاريخية

الكيان القبلي كان جزء مهم من تاريخ الشعوب، و خصوصاً العرب قبل الإسلام. القبايل كانت بتشكل الأساس للتنظيم الحضري و البدوي، و كتير من مدن الجزيرة العربية كانت قايمة على قبايل معينة. أمثلة:

• في مكة: قريش و خزاعة.
• في يثرب (المدينة المنورة بعدين): الأوس و الخزرج.
• في نجد: كندة.
• في اليمن: قبايل حمير و سبأ.

كمان، القبايل العربية الكبيرة اللي إلها وجود تاريخي و اجتماعي خلال العصور الإسلامية (متل قريش، خزاعة، قحطان، قيس، و القبايل اليمانية) بتعتبر من الكيانات اللي ممكن الكتابة عنها ضمن هالإطار.

• السبب: هالقبايل كان إلها كيان اجتماعي منظم، متل قائد، جيش، و رجال، و كانت بتدخل بحروب بشكل منفرد، بمعنى إنها كانت بتشبه مفهوم الجنسية أو المواطنة حسب التعريف الحديث.

كمان بيشمل القبايل و العيلات اللي لعبت أدوار واضحة بالتاريخ من خلال مشاركتها بحروب تاريخية موثّقة بمصادر تأريخية. لازم المقالة تكون موسوعية و موثّقة، و هدفها توضيح دور القبيلة بالأحداث التاريخية، مو للتفاخر أو لتكون شجرة أنساب.

2. الأسر الحاكمة

شوية أسر أو عيلات سيطرت على الأنظمة السياسية (متل الملكيات أو بعض دول الخلافة الإسلامية) أو الإمبراطوريات (متل اليابان و بريطانيا).

• المقالة بهيك حالة ممكن تكون مقبولة إذا كانت بتتناول الأسرة الحاكمة أو المقدسة ككيان اجتماعي كان إلو دور سياسي، اجتماعي، أو ديني بتكوين البلد.
• الهدف ما بيكون لإظهار أفضلية الأسرة على غيرها، لكن لتوضيح دورها التاريخي فقط.

3. الأصول العرقية

القوميات، الأعراق (الأثنيات)، و الجنسيات، إضافة للأقليات الدينية، كلها نماذج مقبولة للكتابة عنها بويكيبديا.

• هاي المواضيع إلها أساس علمي و اجتماعي، و بتمثل جزء مهم من الهوية التاريخية والثقافية للشعوب.

الشروط العامة

• التوثيق: لازم كل المقالات تكون موثّقة بمصادر موثوقة و معروفة.
• الموسوعية: التركيز على تقديم معلومات موضوعية و حقايق تاريخية.
• الحيادية: ما يتم استخدام المقالات للتفاخر أو إبراز أفضلية، و لا لتكون شجرة أنساب.

بهيك شكل، بتسعى ويكيبديا لتقديم محتوى تاريخي موثوق و حيادي بيعكس الحقائق بدون أي انحياز.

المقالات المشتقة

إذا فيه عيلات أو قبايل متفرعة من قبايل تاريخية و بتعتبر بطون و أفخاد إلها؛ لازم ينطبق عليها كمان شرط (القبايل التاريخية) و يكون إلها آثار تاريخية واضحة، أما إنو نحط أي قبايل لمجرد النسب لقبايل معينة أو للتفاخر، فهاد الشي ما مقبول، و ما مسموح أبداً نحط أي قبايل ما إلها أهمية تاريخية أو مآثر تاريخية واضحة و مثبتة بالمصادر.

ملاحظة: إنه تكون القبيلة أو العيلة إلها مكانة أو أهمية للبعض أو معروفة بالمنطقة، هاد الشي ما بيبرر أبداً إنه نعمل مقالة عنها.

أهمية المصادر

لازم تكون المصادر: موثوقة، و ما مسموح نستخدم مصادر مكتوبة من ناس مجهولين، و كمان ما مسموح نعتمد على كتب ما معروفة (المؤلف أو دار النشر)، و ما مسموح الكتب اللي مكتوبة لأغراض خاصة ما إلها طابع علمي، لأن هيك مصادر ما تعتبر محايدة.

سياسة ويكيبيديا كمان ما بتسمح إنه نحط معلومات لأول مرة عبر ويكيبيديا، و لهيك ما بصير نقدم وثائق أو صور أو تسجيلات صوتية بهدف طرح حقائق لأول مرة. لازم هاي الحقائق و المعلومات تكون مثبتة بطرق علمية أو بحثية أول، و بعدين ممكن ويكيبيديا تعتمد عليها كمصدر.

مقالات ما مرغوب فيها

• ما بتفضل ويكيبيديا المقالات اللي بتحكي عن العيلات و القبايل الحديثة، و ما بتشجع المقالات اللي بتحكي عن شخصيات معينة بس بتذكر أعمالها و تاريخها.
• كمان ما بتفضل ويكيبيديا مقالات الأنساب أو العبارات اللي فيها خلاف بتحاول تنسب أشخاص لنسب معين، خصوصاً إذا كان الموضوع عليه خلاف، لأنه صعب كتير إثبات هاي الآراء علمياً.
• القبايل اللي متفرعة من القبايل التاريخية (البطون و الأفخاد) ما بحاجة نعمل إلها مقالة مستقلة عنها، و بيكفي نحكي عنها بمقالة القبيلة الرئيسية إذا ما كانت هاي الفروع ملحوظة بشكل مستقل.
• ما بننصح نعمل مقالات مخصوصة لنحكي عن أسماء زعما القبايل أو فرسانها المشهورين أو شخصياتها البارزة إذا ما كان إلون مآثر تاريخية واضحة.
• الأفضل إنه ما نحكي عن أنساب الشخصيات المشهورة إذا ما كان هالنسب معروف بشكل كبير، و ما كانت الشخصية نفسها عم تصرح فيه دايماً أو تحكي بلغته (متل الشركسية أو الكردية أو التركية).

التعامل مع المقالات المخالفة

• أي مقالة ما بتحقق الشروط المذكورة و ما بتكون علمية و ما فيها مصادر واضحة، ممكن تنحذف حذف سريع، بدون ما نحتاج نعمل نقاش حذف.
• إذا كانت المقالة فيها نوع من العلمية و التوثيق و فيها مصادر، ممكن تنطرح لنقاش حذف. و القاعدة العامة: أي مقالة بتبدأ بكلمة (عيلة أو آل) أو بتحكي عن عيلة أو قبيلة أو عشيرة، معرضة للحذف إذا ما أثبتت إنها وحدة من الحالات التلاتة المسموح فيها.
• ممكن نكتب مقالات عن عشائر أو عيلات بلد معين أو منطقة جغرافية معينة، متل عشائر الأردن أو قبايل نجد، و بنحول مقالات القبايل و العيلات بهاي لصفحات تحويل لمقالة رئيسية تابعة إلها.