Wp/apc/ويكيبيديا:سيرة حياة ذاتية

noborder

هيدي الصفحة هي صفحة إرشادات بويكيبيديا شامي.

الإرشاد هو معيار مقبول بالعموم، و لازم كل المحررين يتبعو بالاعتماد على الحس السليم، مع العلم إنو الإرشادات ما بتندرج تحت بند السياسات.

كتابة سيرة ذاتية على ويكيبيديا مثال على تحرير فيه تضارب مصالح و هالشي مو مرغوب فيه. تعديل سيرة ذاتية عن نفسك مقبول بس إذا كنت عم تشيل تخريب واضح أو انتهاكات صارخة و جدّية لسياسة السير الذاتية لللناس العايشين.

ويكيبيديا مرّت بخلافات طويلة حولين أهمية هالمقالات، دقتها، و حياديتها. تجنّب هيك تعديلات بيخلّي ويكيبيديا حيادية و بيساعد على تجنّب فرض وجهة نظر معيّنة.

كتابة السير الذاتية ما مننصح فيها لأنو صعب تكتب سيرة ذاتية حيادية و قابلة للتوثيق، و فيها كتير مشاكل.

إذا كنت نشرت بشي مكان تاني عن موضوع معيّن، منرحّب بخبرتك بهالمجال بمقالات ويكيبيديا. مع هيك، لازم كل مقال على ويكيبيديا يغطي موضوعه بطريقة حيادية، عادلة، و شاملة مشان يساهم بنشر المعرفة عن الموضوع ككل. حاول تعترف و تقلّل من تحيّزاتك و بنفس الوقت تغني معرفة قارئين ويكيبيديا. المقالات اللي بتكون موجودة بس لتدعم مصالح اللي كتبها بالغالب رح تنحذف.

مشكلة السير الذاتية

بيقولو إنو ولادة زافود بيبلبروكس كانت مصحوبة بزلازل، أمواج مدّية، أعاصير، عواصف نارية، انفجار تلات نجوم مجاورين، و بعدا بفترة قصيرة إصدار أكتر من ستة و تلات أرباع مليون مذكرة دعوى تعويض من كل ملاك الأراضي الكبار بمنطقته المجرة. مع هيك، الشخص الوحيد اللي قال هالشي هو بيبلبروكس نفسه، و في عدة نظريات ممكنة لتفسير هالحكي.

— دليل المسافر إلى المجرة، الجزء التاسع

الاقتباس اللي فوق بيشرح عدة مشاكل أساسية بالسير الذاتية:

• بالغالب بتكون متحيزة، و بالعادة بشكل إيجابي. الناس بيكتبو انطباعات إيجابية مبالغ فيها عن حالون، و مرات بيعرضو آراء كأنها حقايق. ويكيبيديا بتحاول تتجنب عرض الآراء كأنها حقايق. الحيادية ما بتعني بس الكتابة بصيغة الغائب.
• كتير مرات بتكون مو قابلة للتوثيق. إذا المصدر الوحيد لمعلومة معينة عنك هو انت، القراء ما بيقدرو يوثقو المعلومة. كل شي بويكيبيديا لازم يكون موثق. مثلاً، الادعاءات اللي ما بتتوثق بالسير الذاتية بالغالب بتكون عن أفكارك الداخلية، متل مشاعرك، آمالك، أحلامك، و طموحاتك. ما في طريقة للقراء يقدرو يوثقو شو بتفكر—المعلومة الموثوقة ممكن تجي من مصدر تاني بيذكر إنك عبّرت عن أفكارك بشكل علني.
• ممكن تحتوي على أبحاث جديدة. الناس بالغالب بيضيفو معلومات بسيرهم الذاتية ما سبق و تم نشرها، أو بتكون نتيجة معرفة شخصية مباشرة. لحتى يوثقو هالنوع من المعلومات، القراء لازم يعملو أبحاث جديدة بنفسهم. ويكيبيديا ما بتنشر معلومات ما تم نشرها قبل، و ما بتسمح بالأبحاث الجديدة.

بهالسياق، "السيرة الذاتية" ما بتعني بس سيرة انت كتبتها عن حالك، بس كمان سيرة طلبت من حدا يكتبها أو دفعتله ليكتبها باسمك.

ليش هالمشاكل موجودة؟

حيادك الشخصي ما ممكن يتم تحديده بشكل كافي بدون مصادر برانية أو تحليل براني. التحيزات اللاواعية شائعة و بتسبب مشاكل بالمقالات اللي بتكون سيرة ذاتية، لأنها بتأثر على الحيادية و إمكانية التوثيق.

حتى لو كنت مفكر إنك قادر تكتب سيرة ذاتية موثقة و بدون أبحاث جديدة، ممكن ما تقدر تحقق نتيجة حيادية. كشخص بارز، ممكن تركّز على معلومات موضوعية، متل عدد أعمالك المنشورة، أو إن شغلك إترجم للغات تانية أو تم تقديمه ببلدان تانية. أمثلة عن الحجم أو النطاق ممكن تخلق نبرة مو حيادية بتكون واضحة كأنها مبالغة متعمدة. بنفس الطريقة، التفاصيل العميقة عن حياتك الشخصية، متل معتقداتك الدينية، وظايف أفراد عيلتك المو بارزين، أو مجرد وجود أصدقاء مشهورين، ممكن تكون مو قابلة للتوثيق أو مالها صلة.

إذا كان فيه مقالة عنك على ويكيبيديا

كتير صعب تكتب عن حالك بشكل حيادي و موضوعي (شوف فوق عن التحيزات اللاواعية). بشكل عام، من الأفضل تترك الكتابة لغيرك.

المساهمة بمعلومات أو تقديم اقتراحات بصفحة النقاش للمقالة بيعتبر تصرف مناسب—خلّي المحررين المستقلين يضيفو التعديلات للمقالة أو يوافقو عليها إذا لسا بدك تضيفها بنفسك. ممكن يساعد إنك تلفت الانتباه لطلبك بصفحة النقاش من خلال إضافة قالب {{edit COI}} كجزء من الطلب.

بالحالات الواضحة، مسموح إنك تعدّل صفحات مرتبطة فيك. يعني فيك تشيل التخريب؛ بس أكيد لازم يكون تخريب بسيط و واضح، مو نزاع على المحتوى. بنفس الطريقة، فيك تحذف معلومات واضحة الخطأ عنك، متل حالتك الاجتماعية، وظيفتك الحالية، مكان ولادتك، و هيك شغلات. (دوّن هالشي بصفحة النقاش). إذا كانت المعلومة فيها تفسيرات مختلفة، خلي غيرك يعدّلها.

بما إنو ويكيبيديا موسوعة، لازم تكون مصدر ثالثي—يعني ما لازم تحتوي أي "معلومات جديدة" أو نظريات، و معظم المعلومات لازم تكون موجودة بمصادر مستقلة و موثوقة. الحقايق، إعادة سرد الأحداث، و التوضيحات اللي ممكن بدك تضيفها لمقالة عنك لازم تكون قابلة للتوثيق من مصادر موثوقة.

إذا كنت محرر دائم بويكيبيديا، فيك تعرّف عن حالك بصفحة نقاش المقالة باستخدام قالب {{Notable Wikipedian}}.

مشاكل بمقالة عنك

إذا كان فيه مقالة عنك على ويكيبيديا، هدفنا إنها تكون دقيقة، عادلة، متوازنة و حيادية لتعكس بشكل صحيح الآراء اللي مصدرها مصادر موثوقة و مستشهد فيها. إذا كنت بتعتقد إنو فيه مصادر موثوقة بتقدر تخلّي المقالة أكتر توازن، فيك تساعد من خلال الإشارة لهالمصادر لمحررين تانيين.

ممكن تحب تقدّم اقتراحات بصفحة نقاش المقالة، أو إذا كانت المشكلة واضحة و مو مثيرة للجدل، ممكن تعدّل الصفحة بنفسك. إذا تعديلك ممكن يتم فهمه غلط، لازم تشرح السبب بصفحة النقاش. لاحظ إنو إذا كانت المعلومة إلها تفسيرات مختلفة، محررين تانيين رح يعدّلوها. تعديلاتك بيكون احتمال قبولها أكبر إذا كانت حيادية و مستندة لمصادر برانية موثوقة.

إذا ما وافق الغير على التعديلات اللي اقترحتها، ممكن تتبع خطوات حل النزاع. مثلاً، لوحة إعلانات "Biographies of living persons" ممكن توفر منتدى لمحررين مستقلين يساعدو بحل الخلافات.

إذا كنت بتحس إنو ما عم ينظرو بشكل كافي للمشاكل اللي بالمقالة عنك، جرب تضيف ملاحظة بمكتب المساعدة توضح المشاكل. أما إذا كانت المشكلة قانونية بخصوص محتوى بالمقالة عنك، ابعات إيميل ع العنوان info-en-q@wikimedia.org و ضمّن كل التفاصيل. لكن، لا تنشر تهديدات قانونية على ويكيبيديا نفسها (بالمقالات، صفحات النقاش، أو لوحات الإعلانات)—لأنه هالشي خرق كبير لقوانين ويكيبيديا (شوف WP:No legal threats) و ممكن يأدي لحظرك فوراً من التعديل لحد ما تسحب التهديد.

إذا المقالة عنك ما فيها صورة، أو عندك صورة أفضل، فيك تضيف صورة بشرط تكون تحت ترخيص محتوى حر مناسب. (إذا ما كنت أنت اللي أنشأت الصورة، متل صور من مواد ترويجية، إتأكد إنه عندك السلطة القانونية لتوفير الصورة تحت هالترخيص).

إنشاء مقالة عن نفسك

لما عبّر بعض أصدقاء كاتو عن استغرابون كيف إنو مع إنو فيه كتير أشخاص بدون استحقاق أو سمعة عندون تماثيل، هو ما عندو، ردّ عليهم: (بفضل الناس يسألو ليش ما عملو تمثال لكاتو، على إنو يسألو ليش عملو واحد).

موسوعة بريتانيكا (1797)

إذا كانت حياتك و إنجازاتك قابلة للتوثيق و فعلاً بارزة، حدا غيرك غالباً رح يكتب مقالة عنك عاجلاً أم آجلاً، بس إنشاء مقالة عن نفسك مو مرغوب فيه بشدة: الهدف هون هو السير الذاتية، مو السير الذاتية اللي بتكتبها بنفسك.

• إنشاء المقالة بشكل مستقل بيشجع التحقق المستقل من الأهمية و إمكانية التوثيق؛ لأنه طبيعي الناس يبالغو لما يكتبو عن حالون. كل التعديلات لازم تتوافق مع سياسات ويكيبيديا: مو أبحاث جديدة، وجهة النظر المحايدة، و إمكانية التحقق.
• إذا ما كان في طرف تالت أنشأ المقالة عنك، فيه خطر إنو إذا المقالة تعرضت للتخريب، ما يكون فيه محررين مهتمين عم يراقبوها، و ممكن يضل التخريب لفترة طويلة بدون تصحيح.
• المقالات اللي بتنكتب من أصحابها بالغالب بيتم ترشيحها للحذف، و التعليقات بالنقاشات اللي بتصير بالعادة ما بتكون لطيفة. كتير محررين بيحسو إنه الأشخاص اللي بيكتبو سير ذاتية عن حالون عم يستغلو مشروع تطوعي للترويج لأنفسون.
• أي شي بتضيفه رح يتم تعديله بدون رحمة لتصير المقالة حيادية. كتير من المقالات الذاتية صارو مصدر إحباط لكتّابون الأصليين بعد فترة من التعديل من المجتمع، و بحالات عديدة طلب الكتّاب الأصليين حذف المقالة و بالغالب بدون نجاح، لأنو إذا المقالة بتنطبق عليها معايير الحذف المجتمع رح يحذفها بدون الحاجة لطلب، و المقالة ما بتنحذف بس لأنه الشخص اللي هي عنه مو راضي عنها.

إذا كنت فعلاً متأكد إنك قادر تلتزم بمعايير الشمولية، و إذا كنت مستعد تقبل إنو مقالتك لازم تكون حيادية و مو ترويجية، وقتها اقترح إنشاءها من خلال صفحة Articles for Creation بدل ما تنشئها مباشرة. هالعملية بتوفر وجهات نظر مستقلة ممكن تكشف أو تكتشف تحيزات ما كنت واعي إلها، و بتبين إنك بتقدر وقت المحررين المتطوعين أكتر من اهتمامك بنفسك.