Wp/apc/ويكيبيديا:تعديلات هدامة

noborder

هيدي الصفحة هي صفحة إرشادات بويكيبيديا شامي.

الإرشاد هو معيار مقبول بالعموم، و لازم كل المحررين يتبعو بالاعتماد على الحس السليم، مع العلم إنو الإرشادات ما بتندرج تحت بند السياسات.

التعديل التخريبي هو نمط من التعديلات اللي بيعرقل التقدم باتجاه تحسين المقال أو بناء الموسوعة. هالشي ممكن يمتد لفترة طويلة و يشمل مقالات كتيرة. التعديل التخريبي مو دايماً بيكون تخريب مقصود، مع إنو التخريب دايماً بيكون تخريبي. كل حالة لازم تتعالج بشكل مستقل، مع الأخد بعين الاعتبار إذا كانت التصرفات عم تخالف السياسات و الإرشادات أو لأ.

المحررين لازم ينتبهو ما يوصفو الحالات التخريبية بالغلط على إنها تخريب، لأنو هالشي بينفر الناس و بالأخص المستخدمين الجدد.

التعديل التخريبي مو دايماً بيكون عن قصد. أحياناً المحررين ممكن يكونو تخريبيين بالغلط لأنون ما بيعرفو كيف يعدلو بشكل صحيح، أو لأنون ما عندون المهارات الاجتماعية أو الكفاءة اللازمة ليشتغلو بطريقة تعاونية.

ملخص

انفتاح ويكيبيديا أحياناً بيجذب ناس بيحاولو يستغلو الموقع كمنصة للترويج لوجهة نظر وحدة، أو لبحث شخصي، أو للدعاية أو الترويج الذاتي. مع إنو الآراء الأقلية اللي إلها أهمية بتكون مرحب فيها لما تكون قابلة للتحقق من مصادر موثوقة، و مع إنو المحررين البناءين أحياناً بيغلطو، أحياناً بيصير مشاكل طويلة الأمد بسبب محرر بيصر بشكل مستمر على تعديل صفحة أو مجموعة صفحات بمعلومات ما ممكن تتحقق من مصادر موثوقة، أو بالإصرار على إعطاء وزن زايد لرأي أقلية.

المحررين التخريبيين بشكل عام بيضرو الموقع سواء بتقليل مصداقية ويكيبيديا أو بإرهاق صبر باقي المحررين، اللي ممكن يتركو المشروع بسبب الإحباط.

التعديل اللي لحالو ما بيبين تخريبي ممكن يكون جزء من نمط تعديلات تخريبية. مجموعة التعديلات التخريبية ممكن تكون ورا بعض بوقت قريب، أو موزعة بفترات زمنية طويلة؛ و ممكن تصير كلها بصفحة وحدة أو بصفحات كتيرة؛ و ممكن تكون كلها شبه بعض أو من برة شكلها مختلف كتير.

المحررين التخريبيين ممكن يحاولو يخفو تصرفاتهم على إنها تعديلات مفيدة، بس فيه صفات مميزة بتفرقهم عن المحررين البناءين. لما النقاش ما بيقدر يحل المشكلة، و لما إجماع محايد من محررين مو متورطين يتفق (من خلال طلبات تعليق أو وسائل مشابهة)، أي استمرارية بالتخريب بتكون سبب للحظر، و ممكن توصل لإجراءات تأديبية أكبر من خلال عملية حل النزاعات. بحالات شديدة، هالشي ممكن يوصل لحظر كامل من الموقع عن طريق لجنة التحكيم أو من خلال إجماع.

قاعدة التلات تراجعات، حتى لو التزمو فيها المحررين التخريبيين، ما لازم تنفهم كدفاع ضد الإجراءات اللي بتتخذ لتطبيق هالسياسة ضدون. متل ما هو مذكور بهالسياسة: "القاعدة مو حق مكتسب إنك ترجع الصفحة تلات مرات". و قاعدة التلات تراجعات ما لازم تنخرق، حتى لو المحررين عم يحاولو يرجعو تعديلات تخريبية. مع إنو التخريب دايماً بيكون تخريبي، التعديل التخريبي مو دايماً بيكون تخريب؛ الأفضل للمحررين إنون يتبعو الإجراءات المقترحة بدل ما يكسرو القاعدة.

أمثلة على التعديل التخريبي

هالإرشادات بتتعلق بانتهاكات صارخة، واضحة و متكررة للسياسات، و مو بأسئلة دقيقة اللي ممكن ناس عقلانيين يختلفو عليها.

المحرر التخريبي بالغالب بيظهر هالميول:

• عنيد: بيستمر بتعديل مقال أو مجموعة مقالات ليثبت نقطة معينة لفترة طويلة رغم اعتراضات المحررين التانيين. المحررين العنيدين مو بس بيضيفو معلومات، أحياناً بيعملو حذف تخريبي كمان، مثلاً بحذف مصادر موثوقة أضافها محررين تانيين.
• مو قادر أو مو راغب بالالتزام بمبدأ ويكيبيديا:قابلية التحقق: ما بيدرج مصادر، أو بيستخدم مصادر ما بتناسب الموسوعة، أو بيسيء تمثيل المصادر الموثوقة، أو بيعمل بحث أصلي.
• بيمارس "إضافة علامات الاقتباس التخريبية": بيضيف بشكل مو مبرر علامات مثل {{بحاجة لمصدر}} أو {{بحاجة لمصادر إضافية}} على مقال، حتى لو المحتوى اللي عم يعلّمو عليه موثّق أساساً. أو بيستخدم هالعلامات للإيحاء بإنو المحتوى الموثّق بالمقال فيه مشكلة.
• ما بيتعاون لبناء إجماع:
  1. بيتجاهل أسئلة المحررين التانيين أو طلباتون لتوضيح التعديلات أو اعتراضاتون عليها بشكل متكرر.
  2. بيتجاهل بشكل مستمر تفسيرات المحررين التانيين لتعديلاتهم.
• ما بيحترم أو بيتجاهل رأي المجتمع: بيرفض التعديل أو بيكمل بالتعديلات باتجاه نقطة معينة رغم وجود إجماع معارض من محررين محايدين.

بالإضافة لهالشي، ممكن:

• يعمل حملة لطرد المحررين المنتجين: بيتصرف عكس السياسات و الإرشادات متل سياسة الأدب بويكيبيديا، سياسة عدم الهجمات الشخصية، أو سياسة امتلاك المقالات. و ممكن يستخدم حسابات وهمية أو طلب المساعدة من ناس تانيين لتحقيق غاية إنهاك صبر المحررين اللي بيتبعو القواعد.

توضيح النقاط

لما الواحد ينزعج من طريقة تطبيق سياسة أو إرشادات، ممكن ينغري إنو يحاول يشوه القاعدة أو تفسيرها عن طريق تطبيقها بطريقة هو بيشوفها متناسقة. أحياناً هالشي بيصير ليوضح نقطة بخلاف محلي، و بحالات تانية بيحاول يطبق القاعدة بطريقة عامة و مو شعبية بهدف إنو يغيرها.

هالسلوك، بغض النظر وين صار، بيكون تخريبي بشكل كبير و ممكن يأدي للحظر أو الطرد. إذا حسيت إنو السياسة فيها مشكلة، صفحة النقاش الخاصة بالسياسة هي المكان المناسب لعرض مخاوفك. إذا كنت معترض على تصرف شخص معين بمقال، ناقش الموضوع بصفحة النقاش الخاصة بالمقال أو الصفحات المتعلقة. إذا النقاش لحالو ما حل المشكلة، شوف طرق حل النزاعات.

بالواقع، مستحيل ويكيبيديا تكون متناسقة 100%، و قوانينها مستحيل تكون مثالية. إذا الإجماع كان ضدك حتى بعد ما حاولت بشكل صحيح، احترم الإجماع بدل ما تحاول تغيرو بأساليب تخريبية.

إتذكر إنو ممكن توضح نقطة بدون ما تخرب ويكيبيديا لتوضيحها.

الفشل أو الرفض لفهم المغزى

‏أحياناً، المحررين بيطولو النزاعات من خلال التمسك بوجهة نظرون لفترة طويلة حتى بعد ما المجتمع يوصل لإجماع إنو التحرك للأمام هو الحل الأفضل. هالشي بيكون تخريبي.

إنك تكون مؤمن إنو فكرتك صحيحة ما بيعطيك الحق تتصرف على أساس إنو فكرتك لازم المجتمع يتبناها، خاصة إذا إنقاللك عكس هيك. رفض المجتمع لفكرتك مو لأنون ما سمعوك. وقّف الكتابة، اسمع، و فكر باللي عم يقولو الباقيين. حاول تفهم وجهة نظرون بالنقاش، و اشتغل على إيجاد نقاط اتفاق. لا تخلط بين "السماع" و "الاتفاق".

أحياناً، حتى لما المحررين بيتصرفو بنية حسنة، مساهماتون ممكن تضيع الوقت، خصوصي إذا ما عرفو وين المشكلة. رغم إنو لازم يتم تشجيع المحررين ليكونو جريئين و يعملو اللي بيعتقدو إنو صح، أحياناً نقص الكفاءة ممكن يكون عائق. إذا المجتمع صار يصرف وقت أكتر من اللازم بتصحيح أخطاء المحررين و تعليمون عن السياسات و الإرشادات، ممكن يتم فرض عقوبات.

التمييز بين التعديل التخريبي و التعديل المنتج

المحررين بالغالب بيضيفو آراء الأقلية للمقالات. هالشي بيناسب مهمة ويكيبيديا طالما المساهمات قابلة للتحقق، ما بتعطي وزن زائد، و إذا لزم الأمر. عبء إثبات صحة المعلومات بيقع على عاتق المحرر اللي أضاف المعلومة بالبداية أو اللي بده المعلومة تضل موجودة.

من صفحة ويكيبيديا:وجهة النظر المحايدة:

الحيادية بتتطلب إنو كل مقال أو صفحة رئيسية يمثل بشكل عادل كل وجهات النظر المهمة اللي تم نشرها بمصادر موثوقة، بشكل يتناسب مع أهمية كل وجهة نظر. إعطاء الوزن المناسب و تجنب إعطاء وزن زائد بيعني إنو المقالات ما لازم تعطي آراء الأقلية نفس القدر أو نفس التفاصيل مثل الآراء الأكثر انتشار.

المحررين ممكن يعرضو نزاعات أو جدالات عامة نشطة موثقة بمصادر موثوقة؛ اقتباس وجهة نظر مذكورة بمجلات علمية رئيسية، كتب دراسية، أو دراسات مطولة مو بالضرورة بيعتبر تعديل تخريبي. هالاستثناء ما بينطبق على نزاعات محسومة، مثلاً إنو الشمس بتدور حوالين الأرض. (النزاع نفسو ممكن يكون مهم لكن مو الفكرة).

أحياناً، محررين نيتهم حسنة ممكن يضلو طريقهم بسبب منشورات هامشية أو يغلطو. هيك أشخاص ممكن يدافعو عن مواقفهم لفترة قصيرة، بعدين يتراجعو لما يواجهو أدلة أفضل أو آراء حيادية.

التعامل مع المحررين التخريبيين

المراحل الجاي هي نموذج للإجراءات الممكنة، لكن هالخطوات مو بالضرورة يتم تطبيقها بنفس الترتيب. بحالات معينة، ممكن يكون التبليغ السريع عبر "لوحة إعلانات الإداريين/الحوادث" هو أول خطوة مناسبة؛ بحالات تانية، ممكن يكون الحل السريع بحظر من المجتمع. لكن بشكل عام، أغلب الحالات ممكن تستفيد من تصعيد تدريجي:

1. أول تعديل مو موسوعي من محرر يبدو تخريبي:
   • افترض حسن النية. لا تهاجم الكاتب اللي بتشك إنو تخريبي. لكن رجّع المحتوى المو موسوعي أو اللي ما إلو مصادر. استخدم ملخص تعديل بوصف المشكلة بطريقة مو مستفزة. كون لبق جداً. اكتوب رسالة بصفحة النقاش و اطلوب النقاش أو المصادر. شوف صفحة "لا تعذبو القادمين الجدد"، و خود بعين الاعتبار إنو ممكن تكون عم تتعامل مع شخص جديد و مرتبك بدل ما بيكون محرر مشكلة.
2. إذا المحرر رجع التعديل أو ألغى التراجع:
   • إذا كان فيه معلومات بمصادر هالمرة، لا تعمل شي؛ إذا ما في، رجّع التعديل مرة تانية إذا ما رد على صفحة النقاش. إتأكد إنك تكتب شرح واضح للاختلاف بالرأي بصفحة النقاش. شير لهالموضوع بملخص التعديل. إذا أمكن، اقترح حلول وسط بصفحة النقاش.
3. إذا التراجعات استمرت و كان فيه محتوى بلا مصادر:
   • رجّع التعديلات، و اطلوب مساعدة إداري عبر "لوحة إعلانات الإداريين/الحوادث". قدّم روابط لتعديلات المحرر اللي بيتصرف بشكل جدلي. خلي مشاركتك مختصرة (ما بين 250–500 كلمة)، مع روابط واضحة (بتظهر الأدلة)، و ركّز على سلوك المستخدم (متل عدم المشاركة بالنقاش/إضافة محتوى بلا مصادر/تجاهل توافق المجتمع بصفحة النقاش). حاول تتجنب الدخول بتفاصيل المحتوى بصفحة الحوادث، لأنو ممكن يقلل فرصة فهم الإداريين للشكوى. ملاحظة: لتنجح أكتر، لازم يكون تاريخك نضيف. خليك لبق و ما تعمل تراجعات مفرطة بنفسك.
4. إذا المحرر الجدلي بيستخدم مصادر، بس ضعيفة أو مفسرة بطريقة خاطئة:
   • لا تبلغ عنو للحوادث بهالمرحلة.
   • راجع صفحة "حل النزاعات".
   • قدّم بلاغ بـ "لوحة المصادر الموثوقة"، إذا كان مناسب.
   • استمر بمحاولة الحوار مع المحرر. شير للسياسات و الإرشادات إذا لزم الأمر.
   • إذا كان النزاع بين محررين بس، اطلوب رأي تالت.
   • إذا كان فيه محررين أكتر، جرّب طلب تعليق المجتمع.
5. إذا محاولات حل النزاع تم رفضها أو ما نجحت، أو المشاكل استمرت:
   • نبّه المحرر اللي بتعتبره تخريبي بصفحة نقاشه.
   • ضمّن روابط للتصرفات المزعجة. استخدم اسم للقسم أو ملخص تعديل لتوضيح إنك بتعتبر سلوكه تخريبي، بس إتجنب الاستفزاز المو ضروري. إتذكر إنك عم تحاول تخفف التوتر. إذا كان فيه محررين تانيين، لازم يضيفو تعليقاتون كمان ليكون واضح إنو المجتمع مو راضي.
6. إذا المحرر الجدلي استمر بالتعديلات المزعجة:
   • استخدم القوالب {{subst:uw-disruptive1}}، {{subst:uw-disruptive2}}، {{subst:uw-disruptive3}}، و{{subst:uw-disruptive4}}.
   • إذا كان الوضع عبارة عن محرر واحد ضد كتير، استمر بالتراجع. إذا إتجاوز المحرر قاعدة التلات تراجعات خلال 24 ساعة، قدّم بلاغ بـ "لوحة إعلانات الإداريين/حروب التعديل" (لكن دير بالك ما تتجاوز التراجعات بنفسك!). محرر جدلي واحد ما رح يقدر يحافظ على المحتوى المزعج إذا كان الكل عم يرجعو.
7. إذا المحرر الجدلي ما كسر قاعدة التلات تراجعات، أو إذا ما كان فيه محررين كفاية لتطبيق السياسات:
   • قدّم بلاغ جديد بصفحة الحوادث، حتى لو كنت قدّمت بلاغ سابق.
8. إذا المحرر استمر بتجاهل التوافق اللي تم التوصل إلو بصفحة الحوادث:
   • اطلوب مرة تانية تدخل إداري بـ "لوحة إعلانات الإداريين/الحوادث"، و شير للتوافق اللي تم قبل هيك بصفحات النقاش أو الإعلانات. الإداري المفروض يعطي تحذير أو حظر مؤقت حسب الموقف.
9. إذا الحظر ما حل المشكلة، أو إذا ما قدرت تحصل على انتباه من الإداريين، و جربت كل الطرق التانية:
   • قدّم قضية للجنة التحكيم. خلي القضية قائمة على سلوك المستخدم بس، و ما تتطرق لمحتوى المقال.

الحظر و العقوبات

• التعديلات التخريبية ممكن تأدي لتحذيرات و بعدها حظر تصاعدي، بيبدأ عادة بـ 24 ساعة.
• الحسابات اللي هدفها الأساسي هو التخريب بالغالب رح يتم حظرها بشكل دايم.

يوم كذبة نيسان

كل التعديلات اللي بتنضاف بيوم كذبة نيسان لازم تلتزم بكل السياسات و الإرشادات المطبّقة، بما فيها (لكن مو محصورة بـ) منع حروب التعديل، و عدم الهجوم الشخصي، و سياسة السير الذاتية للناس العايشين. باستثناء الصفحة الرئيسية، كل التعديلات اللي هدفها تكون فكاهية لازم تضل بعيدة عن مساحات المقالات و مساحات المساعدة، بالإضافة لصفحات النقاش التابعة إلها. لازم كمان يتم وسمها بـ {{Humor}} (أو أي قالب مكافئ، متل {{April fools}} أو {{4-1}}) لتجنب تضليل المستخدمين.