Wp/apc/ويكيبيديا:حل الخلافات

noborder

هيدي الصفحة هي صفحة سياسة رسمية و معتمدة بويكيبيديا شامي.

السياسة بتشرح القواعد و الشروط اللى لازم كل اللى بيضيف أو يعدل بويكيپيديا شامي يتبعها, السياسات بتصير رسمية بعد مناقشة و اتفاق عليها و ممكن تتعدل أو تنلغى بنفس الطريقة.

الخلافات على ويكيبيديا شي طبيعي؛ المحررين بالعادة بيختلفو مع بعض، خصوصاً بقرارات المحتوى. المفروض المحررين يتعاملو بحسن نية ليحلو خلافاتون، و ما لازم يخلو الخلافات شخصية. كتير من الخلافات ممكن تنحل بدون تدخل براني، عن طريق تعديل تدريجي، نقاش، و محاولات لفهم اعتراضات التانيين المشروعة.

إذا النقاش وصل لطريق مسدود، ممكن المحررين يطلبو مساعدة برانية لحل الخلاف. الخلافات على المحتوى إلها أكتر من طريقة للحصول على مساعدة برانية، و النقاشات المرتبطة ممكن كمان تنعرض على صفحات النقاش التابعة لمشاريع ويكيبيديا اللي إلها علاقة، لحتى يشاركو محررين مهتمين و ما إلون علاقة بالخلاف. العمليات لحل خلافات المحتوى بمساعدة برانية بتشمل طلب رأي تالت، طلب مساعدة من وسيط، تقديم طلب على لوحة الإعلانات المناسبة، أو فتح طلب للتعليق. المشاكل اللي بتتعلق بالسلوك ممكن تنعرض على لوحة الإعلانات للمشاكل، و إذا كانت الخلافات معقدة أكتر ممكن تنرفع للجنة التحكيم.

بالنسبة للمشاكل اللي بتحتاج اهتمام فوري، الرجاء مراجعة الحالات الطارئة.

حل الخلافات حولين المحتوى

بويكيبيديا، فيه كتير طرق لحل الخلافات. معظم هالطرق ما بتكون رسمية و ما بتتطلب تدخل طرف تالت. أول خطوة للتعامل مع أي خلاف أو مشكلة هيه إنك تتواصل مع المحرر أو المحررين المعنيين، و تشرحلون أي تعديلات اعترضت عليها و ليش. استعمل صفحة نقاش المقالة أو صفحة نقاش المستخدم لهالشي؛ خلي أسلوبك مهذب و لبق، و دايماً افترض حسن النية.

اتبع البروتوكول العادي

إذا لقيت فقرة بمقالة فيها تحيز، أو مو دقيقة، أو ما إلها مصادر، الأفضل إنك تحاول تحسنها إذا بتقدر، بدل ما تمحي النص اللي ممكن يتصلح. مثلاً، إذا كانت المقالة فيها تحيز، ضيف محتوى متوازن أو عدّل الصياغة لتكون أكتر حيادية. إتأكد إنك تضيف مصادر لأي محتوى جديد بتضيفه. إذا ما كنت بتعرف كيف تحل المشكلة، اطلوب مساعدة على صفحة النقاش.

لتساعد باقي المحررين يفهمو الأسباب ورا تعديلاتك، دايماً اشرح تغييراتك بملخص التعديل. إذا كان التعديل معقد لدرجة ما بتقدر تشرحه بملخص التعديل، أو إذا كان التغيير مثير للجدل، ضيف قسم جديد على صفحة النقاش و وضح فيه منطقك. كون مستعد لتبرير تعديلاتك لباقي المحررين على صفحة النقاش. و إذا تم التراجع عن تعديلك، استمر بالشرح؛ لا تبدا حرب تعديلات.

ناقش مع الطرف التاني

الكلام مع الأطراف التانية مو مجرد شكليات، هو جزء أساسي من كتابة الموسوعة. النقاش بأسلوب مو جيد أو بطريقة ساخنة – أو تجاهل النقاش تماماً – بيخلي باقي المحررين أقل تعاطف مع موقفك، و بيمنعك من استخدام المراحل الأعلى بحل الخلافات بشكل فعال. النقاش المستمر بين الأطراف، حتى لو ما نجح فوراً، بيبين حسن نيتك و بيوضح إنك عم تحاول توصل لاتفاق. حاول تتفاوض على هدنة أو اقترح حل وسط عن طريق التفاوض.

لا تكمل بحرب التعديلات؛ وقت يبدا النقاش المستمر، المشاركة فيه بشكل منتج بتصير أولوية. المحررين اللي ما إلون علاقة بالخلاف و اللي بيندعو للمشاركة بالغالب رح ينزعجو إذا كان فيه كتير عمليات تراجع أو تعديلات خلال النقاش.

النقاش بصفحة النقاش شرط أساسي تقريباً لكل طرق حل الخلافات المتقدمة بوكيبيديا. إذا بدك بأي وقت تطلب رأي تالت (3O)، أو تفتح طلب للتعليق، أو تكتب على لوحة الإعلانات لحل الخلافات، أو حتى تفتح طلب تحكيم، لازم يكون فيه دليل إنو صار نقاش بصفحة النقاش بخصوص الخلاف. النقاش الحقيقي ضروري؛ النقاش اللي بيصير بالكامل عن طريق ملخصات التعديل مو كافي.

ركّز على المحتوى

ركز على محتوى المقالة خلال النقاش، مو على سلوك المحرر؛ علّق على المحتوى، مو على الشخص اللي كتبه. ويكيبيديا بتنكتب عن طريق التعاون، و افتراض حسن نية جهود الآخرين شي مهم كتير. إنك تحكي عن السلوك خلال النقاشات اللي بتخص المحتوى بيعمل تشتيت للنقاش و بيزيد التوتر.

التركيز على المحتوى بدون ذكر السلوك ممكن يكون صعب إذا حسيت إنو المحررين التانيين مو مهذبين أو عنيدين. بس حاول تضل هادي! ما رح يفيدك أبداً إنك ترد بنفس الطريقة. إذا صار النقاش صعب كتير أو متعب، فكر جدياً باللجوء لطريقة مناسبة لحل الخلافات مذكورة بالتفصيل تحت، بس و لا مرة لازم تفقد أعصابك. ويكيبيديا مو متل باقي الإنترنت: المحررين متوقع منون يكونو مهذبين و عقلانيين بكل الأوقات.

فكّر بالانسحاب

معظم المواقف ما بتكون مستعجلة فعلاً؛ ما فيه مواعيد نهائية بويكيبيديا، و الكمال مو مطلوب. بكل مراحل النقاش، فكر إذا كان لازم تاخد استراحة من الخلاف. إنك تاخد نفس عميق و تفكر بالموضوع لبعد يوم بالغالب بيساعد. فيك دايماً ترجع للنقاش بعدين، بس رح ترجع و أنت أعصابك أهدى. ممكن كمان تفكر تترك النقاش بشكل كامل.

فكر بالموقف على المدى البعيد. بالغالب رح تقدر ترجع و تعدل بالمقالة لما المشاكل السابقة تختفي، و المحرر اللي كنت مختلف معو يمكن يكون انتقل لمواضيع تانية. المقالة اللي عليها خلاف رح تستمر بالتطور، و ممكن يجي محررين تانيين يهتمو فيها و يكون عندون وجهات نظر مختلفة لو طلع الموضوع مرة تانية. حتى لو ما تم قبول رأيك بالمقالة هلأ، ممكن جداً ينقبل بالمستقبل.

الانسحاب مفيد بشكل خاص لما يكون الخلاف مع مستخدمين جدد، لأنو بيعطيهم فرصة يتعرفو على سياسات ويكيبيديا و ثقافتها. حالياً فيه ٢٬٧٢٨ مقالة على ويكيبيديا؛ فكر إنك تركز وقتك و اهتمامك على مقالة أو موضوع تاني، ممكن تعدل فيه بشكل بناء بسهولة أكتر.

طلب مساعدة محررين تانيين لحل خلافات المحتوى

إذا ما قدرت تحل الخلاف عن طريق النقاش مع المحرر التاني، فيك تطلب مشاركة محررين مهتمين ما إلهم علاقة بالخلاف، لحتى تبني توافق على التعديلات اللي بدك تضيفها. في عدة أماكن متوفرة لهالشي، ومذكورة تحت، لتلاقي محررين ممكن يساعدوا. بس دير بالك إنك إذا حاولت تطلب مساعدة من كم محرر ورفضوا، الأفضل تنتقل للخطوة الجاية أو تنسحب تماماً. لأنه إذا استمريت تطلب مدخلات من محررين، ممكن يبين للآخرين إنك عم تعمل تعديلات مزعجة أو "تسوق للنقاش".

المشاركة بحل الخلافات اختيارية، وما حدا ملزم يشارك. بس النقاش ممكن يستمر و يتم التوصل لتوافق حتى بدون مدخلات المحرر اللي ما شارك. الإداريين و المجتمع ممكن ياخدو بعين الاعتبار مدى و طبيعة مشاركة المحرر بحل الخلافات لما يقررو إذا كانت أنشطته منتجة.

صفحة نقاش المقالة

معظم النقاشات حولين الخلافات بالمحتوى لازم تبدا بصفحة نقاش المقالة اللي عليها الخلاف. هالمكان جيد للنقاش مع المحرر التاني بالخلاف، و كمان للحصول على آراء من محررين إضافيين. بالعادة المقالة بتكون على قوائم المراقبة لمحررين تانيين، و بيشوفو محادثتك و بيشاركو بالنقاش.

صفحات النقاش المرتبطة أو مشاريع ويكيبيديا

إذا كان الخلاف مرتبط بمنطقة محتوى معينة، فيك تسأل سؤالك أو تعرض النقاش المرتبط بصفحة نقاش مشاريع ويكيبيديا اللي إلها علاقة أو صفحات تانية. مثلاً، خلاف بمقالة "معركة ستالينغراد" ممكن يتم ذكره بـ"ويكيبيديا نقاش:مشروع التاريخ العسكري". لتخلي النقاش مركّز بصفحة النقاش الأصلية، ممكن بس تضيف رابط لصفحة النقاش الأصلية مع دعوة مختصرة للمشاركة بالنقاش، بدل ما تعيد فتح النقاش بصفحة جديدة.

رأي تالت

طلب رأي تالت هو خيار ممتاز للخلافات الصغيرة اللي بتشمل محررين بس.

لوحات الإعلانات

إذا كان الخلاف متعلق بتطبيق سياسة أو إرشاد معين، ممكن تنشر على وحدة من لوحات الإعلانات الجاي لتحصل على آراء من محررين مو مشاركين و مطّلعين على الموضوع:

• لوحة إعلانات السير الذاتية للناس العايشين – بشكل عام لحالات تكرار إضافة مواد تشهيرية أو افترائية، بما يخالف سياسة السير الذاتية للناس العايشين.
• لوحة إعلانات تضارب المصالح – لطرح أسئلة أو تنبيهات حولين إمكانية وجود تضارب مصالح بالتعديلات.
• لوحة إعلانات وجهة النظر المحايدة – لطرح أسئلة أو تنبيهات حولين حيادية المقالة.
• لوحة إعلانات النظريات الهامشية – للأسئلة المتعلقة بالمقالات عن النظريات الهامشية.
• لوحة إعلانات الأبحاث الأصلية – لطرح أسئلة أو تنبيهات حولين مواد ممكن تكون بحث أصلي أو توليف مصادر.
• لوحة إعلانات المصادر الموثوقة – للنقاش حولين إذا كان المصدر موثوق أو لا.
• لوحة إعلانات الروابط الخارجية – لطرح أسئلة أو تنبيهات حولين الروابط الخارجية.

طلب تغيير عنوان المقالة

عملية "طلب تغيير العنوان" (Requested moves - RM) هي وسيلة لطلب مشاركة المجتمع بأكمله لتغيير عنوان المقالة. لازم تستخدم هالعملية إذا كان فيه خلاف حولين شو لازم يكون عنوان المقالة، أو إذا كان المستخدم متوقع إنو التغيير رح يكون مثير للجدل. خلال فترة النقاش بـRM، لازم المقالة تضل بعنوانها المستقر. لحتى تحصل على ردود من عدد كبير من المحررين، فيك تنشر الإعلان عن RM بلوحات الإعلانات أو صفحات نقاش مشاريع ويكيبيديا اللي إلها علاقة. نقاشات RM بتصير بصفحة نقاش المقالة المعنية.

طلب التعليقات

عملية "طلب التعليقات" (Request for comment - RfC) هي وسيلة لطلب مشاركة المجتمع بأكمله بخصوص محتوى المقالة. RfCs ممكن تُستخدم لما يكون فيه خلاف متعلق بالمحتوى، أو ببساطة للحصول على آراء محررين تانيين قبل القيام بتعديل. لحتى تحصل على ردود من عدد كبير من المحررين، فيك تنشر الإعلان عن RfC بلوحات الإعلانات أو صفحات نقاش مشاريع ويكيبيديا اللي إلها علاقة. كمان، روبوت RfC بيبلغ تلقائياً مجموعة المحررين اللي بتقدم خدمة طلب الملاحظات. نقاشات RfC المتعلقة بمحتوى المقالات بتصير بصفحات نقاش المقالات.

لوحة إعلانات حل الخلافات

لوحة إعلانات حل الخلافات (Dispute resolution noticeboard - DRN) هيه المكان اللي فيه المحررين اللي إلون خلاف على المحتوى بيقدرو يشاركو بنقاش تحت إشراف متطوعين ما إلون علاقة بالخلاف، لحتى يحاولو يلاقو تسوية و حل للخلافات. هالمتطوعين بيكونو محررين بخبرة طويلة بوكيبيديا و عندون معرفة بحل الخلافات. أحياناً، الخلافات بتنحال على أماكن أكتر مناسبة متل طلب التعليقات (RfC).

حل الخلافات المتعلقة بسلوك المستخدمين

الفرق بين خلاف السلوك و خلاف المحتوى هو إنو بخلاف السلوك، بيكون التصرفات أو الأفعال اللي بيقوم فيها المستخدم (مثل طريقة تعديلاته أو تعليقاته على مستخدمين تانين) هي القضية الأساسية. إذا ما كان فيه خلاف حقيقي إذا ما المستخدم ما كان عم يتصرف بطريقة مدمّرة أو مو مهنية، فهدا خلاف سلوك. أما إذا كان الموضوع الأساسي هو عدم اتفاق بين محررين على محتوى المقالة، فهاد خلاف محتوى.

صفحة نقاش المستخدم

إذا كان الموضوع خلاف سلوك (يعني تصرفات المحرر)، الخطوة الأولى هيه تحكي مع المحرر التاني بصفحة نقاش المستخدم تبعو بطريقة مؤدبة، بسيطة و مباشرة. حاول تتجنب النقاش حول سلوك المستخدمين بصفحات نقاش المقالات. فيه كتير قوالب ممكن تستخدمها لتحذير المستخدمين من مشاكل السلوك، أو فيك تختار تكتب بكلماتك الخاصة لتفتح النقاش بصفحة نقاش المستخدم. بكل الأحوال، و حتى لو كان فيه سوء سلوك خطير، حاول تكون مهني و مؤدب. "إدرأ السيئة بالحسنة".

لوحات الإعلانات

إذا النقاش مع المحرر ما قدر يحل المشكلة، فيك تطلب من إداري يقيم تصرفات المستخدم. فيك تطلب انتباه إداري من خلال لوحات إعلانات معينة متل لوحة إعلانات الحوادث (ANI). الشكاوى اللي بتندرج تحت فئات فرعية معينة من سوء السلوك إلها لوحات إعلانات خاصة فيها؛ مثلاً، الشكاوى المتعلقة بحروب التحرير لازم تنعرض بلوحة إعلانات حروب التحرير (AN3)، و الطلبات لتطبيق قرار من لجنة التحكيم لازم تكون بلوحة إعلانات تطبيق التحكيم (AE).

الإداريين و المجتمع رح يطلعو إذا كنت حاولت تحل المشكلة قبل التصعيد، و كمان رح ينظرو بتصرفاتك و تصرفات المحرر أو المحررين التانيين. الإداريين عندون صلاحيات واسعة لاستخدام أدواتهم لإيقاف سوء السلوك و حماية الموسوعة؛ مثلاً، المحرر اللي عم يقوم بهجمات شخصية و ما وقف لما طلبت منه، ممكن ينحذر من الإداري، و إذا استمر ممكن يتم حظره.

تحقيقات الحسابات الوهمية

تحقيقات الحسابات الوهمية (Sockpuppet investigations) هي لتقييم المخاوف حولين احتمال إنو محررين اتنين يكونو نفس الشخص (يعني مستخدمين حسابين و عم يتظاهرو إنون أشخاص مختلفين، أو محرر محظور عم يرجع بحساب جديد). طلبات التعليق على أسماء المستخدمين، و الطلبات الخاصة بأسماء المستخدمين للإداريين (UAA)، هي الطرق الرئيسية لجذب الانتباه لأسماء المستخدمين اللي ممكن تكون مو ملائمة.

الحل الأخير: التحكيم

إذا كنت جربت كل الخطوات المنطقية لحل الخلاف، و ما كان الخلاف عن محتوى المقالة، فيك تطلب التحكيم. جهز حالك لتوضيح إنك حاولت تحل الخلاف بطرق تانية. التحكيم بيختلف عن غيرو من وسائل حل الخلافات لأنو لجنة التحكيم رح تدرس القضية و تعطي قرار، بدل ما تساعد الأطراف للتوصل لاتفاق. إذا اللجنة قررت بالقضية، رح يكون مطلوب منك تلتزم بالنتيجة. إذا كانت القضية عن سوء سلوك خطير من مستخدم، التحكيم ممكن ينتهي بعواقب كبيرة متل منع المستخدم نهائياً من التعديل، حسب سياسة التحكيم.

خلافات السلوك مع الإداريين

إذا كان عندك خلاف حولين سلوك إداري، صفحة ويكيبيديا:الإداريين § شكاوى المستخدمين ("إساءة استخدام إداري") بتوفر خيارات إضافية. هاي الخيارات ممكن تشمل نشر الشكوى بمراجعة الإجراءات الإدارية أو لوحة إعلانات الإداريين. إذا كنت محظور، فيك تستخدم قالب طلب إلغاء الحظر حسب التوجيهات الموجودة بـ ويكيبيديا:استئناف الحظر § الاستئناف المباشر.

القضايا الحساسة و إجراءات العاملين المختصين

شوية خلافات السلوك بتتضمن معلومات حساسة أو مو علنية. هاي القضايا بتشمل:

• تفاصيل مو علنية: الشكاوى اللي بتتعلق بمعلومات أو أدلة مو متاحة لكل المشاركين أو للمجتمع بشكل عام، متل قضايا الخصوصية أو حقوق النشر.
• مخاوف "الكشف": لما النقاش ممكن يؤدي لكشف هوية شخص عندو تضارب مصالح مخفي.
• أمور خطيرة: لما القضية بتشمل مخاوف قانونية، مضايقات، أو ادعاءات خطيرة كتير.
• النصيحة بمسائل حساسة: لما القضية ممكن تكون شديدة الانقسام و بتحتاج نصيحة عن أفضل طريقة للتعامل معاها (متل حالة إدارة بتقوم بسلوك خاطئ).

القضايا أو المشاكل من هالنوع بالغالب لازم تتوجه لقائمة مراسلات العاملين المختصين أو لجنة التحكيم. أحياناً ممكن تطلب نصيحة من إداري مو متورط بالقضية عبر IRC، الإيميل، أو وسائل خاصة تانية. إذا الإجراء عليه علامة CheckUser، Oversight، VRT (OTRS سابقاً)، أو لجنة التحكيم، فلازم ما يتم التراجع عنه إلا بعد مراجعة السبب.

الإجراءات المعتمدة، إذا كان عليها خلاف، لازم بالبداية يتم مناقشتها (حتى بالإيميل إذا لزم الأمر) مع الشخص المسؤول عنها. إذا ما انحل الخلاف حول إجراءات CheckUser أو Oversight، لازم يتم تحويل القضية لقائمة مراسلات العاملين المختصين أو لـ ويكيبيديا:لجنة التحكيم/التدقيق إذا كان مناسب. خلافات حولين قرارات لجنة التحكيم لازم تتحول للجنة نفسها.

كلمات تحذير

حل النزاعات أحياناً بيستخدمه شوية محررين لمحاولة استغلال النظام لصالحهم. هالتصرف بالعادة بيأدي لنتائج عكسية بشكل كبير. إتذكر دايماً إنو آليات حل النزاعات موجودة لمساعدة المحررين على التعاون لكتابة موسوعة، مو لكسب معارك شخصية أو سياسية. بموجب ويكيبيديا:القرارات ما بتخضع لإجماع المحررين، شوية نزاعات بتنحل بمنتديات مختلفة باستخدام طرق هالمنتديات.