Wp/apc/ويكيبيديا:ملحوظية (الأشخاص)

noborder

هيدي الصفحة هي صفحة إرشادات بويكيبيديا شامي.

الإرشاد هو معيار مقبول بالعموم، و لازم كل المحررين يتبعو بالاعتماد على الحس السليم، مع العلم إنو الإرشادات ما بتندرج تحت بند السياسات.

على ويكيبيديا، الملحوظية هي اختبار بيستخدمه المحررين ليقررو إذا كان موضوع معيّن بيستاهل يكون إلو مقالة خاصة فيه. بالنسبة للأشخاص، الشخص اللي هو موضوع مقالة سيرته الذاتية لازم يكون "جدير بالملاحظة" أو "مثير للاهتمام" - يعني "لافت" أو "مهم، شيّق، أو غريب كفاية ليستحق الانتباه أو التوثيق" على ويكيبيديا كسرد مكتوب عن حياة هالشخص. "ملحوظ" بمعنى مشهور أو محبوب - رغم إنه مش غير مهم - بيجي بالدرجة التانية.

هالخطوط العريضة للملحوظية بالسير الذاتية بتعكس إجماع وصلولو من خلال مناقشات و بيتم تعزيزها بالممارسات المتبعة، و بتساعد باتخاذ قرارات إذا كانت المقالة عن شخص لازم تنكتب، تندمج، تنحذف، أو يتم تطويرها أكتر.

عنوان المقالة لازم يحدد شو المقالة بتحكي. إذا كان فيه محتوى كافي و معتبر يملأ مقالة عن شخص معيّن، فاسم هالشخص بيكون عنوان مناسب، متل أبراهام لينكولن أو ماري أنطوانيت. أما إذا كان فيه معلومات كافية بس عن حدث واحد ملحوظ مرتبط بهالشخص، فالعنوان لازم يكون خاص بهالحدث، متل حادثة ترافيس والتون. أحياناً لما شخص مشهور بيموت، بيكون فيه معلومات كافية لمقالة عن وفاته، متل وفاة مايكل جاكسون أو وفاة ديانا، أميرة ويلز. إذا المقالة الرئيسية عن شخص ملحوظ كانت طويلة كتير لدرجة إنه ما بتتسع لكل أعماله، فممكن يتم إنشاء صفحة منفصلة لهالمعلومات، متل فهرس أعمال جورج أورويل. و إذا كان الشخص ضحية جريمة قتل ملحوظة، فالعنوان المناسب بيكون متل "جريمة قتل كيتي جينوفيز".

المعايير الأساسية

الأشخاص بيُعتبرو ملحوظين إذا حصلو على تغطية مهمة ضمن مصادر ثانوية منشورة متعددة، موثوقة، و مستقلة فكرياً عن بعضها البعض، و كمان مستقلة عن الموضوع نفسه.

• إذا كانت التغطية بأي مصدر معيّن ما بتكون معمقة بشكل كافي، فممكن جمع مصادر مستقلة متعددة لإثبات الملحوظية. أما التغطية البسيطة أو التافهة للموضوع من مصادر ثانوية، فغالباً بتكون مو كافية لتثبيت الملحوظية.
• المصادر الأولية ممكن يتم استخدامها لدعم محتوى المقالة، لكنها ما بتساهم بإثبات ملحوظية الموضوع.

الأشخاص اللي بيحققو المعايير الأساسية ممكن يُعتبرو ملحوظين بدون ما يحتاجو يحققو المعايير الإضافية المذكورة تحت. و مع هيك، ممكن ما يتم إنشاء مقالات لهالأشخاص إذا وقعو تحت معايير الاستثناء، متل إنون ملحوظين بس بسبب حدث واحد، أو بسبب أمور مذكورة ضمن صفحة ويكيبيديا:ويكيبيديا مو.

معايير إضافية

الأشخاص غالباً بيكونو ملحوظين إذا حققو أي من المعايير الجاي. الفشل بتحقيق هالمعايير ما بيعتبر دليل قاطع على إنه الموضوع ما لازم يندرج، و بالمقابل، تحقيق واحد أو أكتر منها ما بيضمن إنه لازم يندرج.

الشخص اللي ما بيحقق هالمعايير الإضافية ممكن يكون ملحوظ حسب ويكيبيديا:الملحوظية. المحررين ممكن يلاقو هالمعايير مفيدة لما يقررو إذا كان لازم تعليم المقالة بأنها بحاجة لمصادر إضافية (باستخدام {{BLP sources}} مثلاً)، أو بدل هيك البدء بمناقشة حذف المقالة.

أي سيرة ذاتية

1. الشخص حصل على جايزة أو تكريم معروف و مهم، أو تم ترشيحه لهالجايزة أكتر من مرة؛ أو
2. الشخص قدم مساهمة معترف فيها بشكل واسع و صارت جزء من السجل التاريخي الدايم بمجال محدد؛ أو
3. الشخص إلو مدخل بمعجم السيرة الوطنية الرسمي لبلد (متل معجم السيرة الوطنية).

الأكاديميين

كتير من العلما، الباحثين، الفلاسفة و غيرهم من الأكاديميين بيكونو مؤثرين بعالم الأفكار بدون ما تكون سيرهم الذاتية موضوع لمصادر ثانوية.

المحترفين المبدعين

هالمعايير بتنطبق على الكتّاب، المحررين، الصحفيين، صناع الأفلام، المصورين، الفنانين، المعماريين و غيرهم من المحترفين المبدعين. الشخص بيكون ملحوظ إذا:

1. الشخص بيُعتبر شخصية مهمة أو بيتم الاستشهاد فيه بشكل واسع من زملاؤه أو خلفاؤه؛ أو
2. الشخص معروف بأنه أسس مفهوم، نظرية، أو تقنية جديدة ومهمة؛ أو
3. الشخص أنشأ أو لعب دور كبير بصنع عمل أو مجموعة أعمال معروفة أو مهمة. بالإضافة، لازم هالعمل يكون موضوع مقالات دورية مستقلة متعددة أو تقييمات، أو يكون عمل مستقل و ملحوظ (متل كتاب، فيلم، أو مسلسل تلفزيوني، بس عادةً مش حلقة وحدة من مسلسل).
4. عمل الشخص (أو أعماله) صار: (أ) نصب تذكاري مهم، (ب) جزء كبير من معرض مهم، (ج) حصل على اهتمام نقدي كبير، أو (د) انضم للمجموعات الدائمة بعدة معارض أو متاحف معروفة.

ضحايا الجرائم و مرتكبينها

الشخص المعروف بس بعلاقته مع حدث إجرامي أو محاكمة ما لازم يكون بالعادة موضوع لمقالة منفصلة إذا كان فيه مقالة موجودة ممكن تندمج المواد الموسوعية المتوفرة عن هالشخص.

إذا كانت المقالة موجودة، ممكن يكون مناسب إنشاء مقالة فرعية، بس إذا كان ضروري بسبب حجم المقالة.

إذا ما كان فيه مقالات موجودة مناسبة، الضحية أو الجاني لازم يكون موضوع مقالة بس إذا:

بالنسبة للضحايا أو الأشخاص اللي انتهمو أو أندانو بالخطأ:

1. الضحية أو الشخص اللي أُدين بالخطأ، وفقاً لويكيبيديا:السير الذاتية لأشخاص ملحوظين بس بسبب حدث واحد، لعب دور كبير ضمن حدث تاريخي موثق كتير. الأهمية التاريخية بتكون واضحة من التغطية المستمرة للحدث بمصادر ثانوية موثوقة بتكرس اهتمام كبير لدور الشخص.

بالنسبة للمرتكبين:

1. ضحية الجريمة شخصية معروفة على المستوى الوطني أو الدولي، متضمنة، لكن مو محصورة، بالسياسيين أو المشاهير؛ أو
2. دافع الجريمة أو طريقة تنفيذها غير مألوف - أو تم اعتباره ملحوظ - لدرجة إنه صار حدث تاريخي موثق. الأهمية التاريخية بتكون بالعادة واضحة من التغطية المستمرة للحدث بمصادر ثانوية موثوقة، بتستمر بعد التغطية الإخبارية الوقتية و بتكرس اهتمام كبير لدور الشخص.
   • ملاحظة: الشخص الحي اللي متهم بجريمة بيُفترض إنه بريء إلا إذا المحكمة قررت العكس. المحررين لازم يعطو اهتمام جدي بعدم إنشاء مقالة عن الشخص المتهم إذا ما صار إدانة لسا.

الفنانين

لمعايير الموسيقيين، الفرق الموسيقية، المؤلفين الموسيقيين، و كتّاب الأغاني، شوف ويكيبيديا:الملحوظية (الموسيقى).

هالمعايير بتنطبق على الممثلين، مؤدي الأصوات، الكوميديين، صناع الرأي، ممثلين الأفلام الإباحية، العارضين، و المشاهير. الشخص ممكن يُعتبر ملحوظ إذا:

1. الشخص كان إلو أدوار كبيرة بمشاريع معروفة متعددة متل أفلام، مسلسلات تلفزيونية، عروض مسرحية، أو إنتاجات تانية؛ أو
2. الشخص قدم مساهمات فريدة، غزيرة الإنتاج، أو مبتكرة بمجال الترفيه.

السياسيين و القضاة

الجايين بيُعتبرو ملحوظين بشكل عام:

• السياسيين و القضاة اللي شغلو منصب دولي، وطني، أو (بالنسبة للبلدان اللي عندها أنظمة فدرالية أو مشابهة) منصب على مستوى الولاية/المقاطعة، أو كانو أعضاء بأجسام تشريعية بهالمستويات. هالشي بينطبق كمان على الناس اللي تم انتخابهم لهالمناصب بس لسا ما استلموها.
• الشخصيات السياسية المحلية الرئيسية اللي حصلت على تغطية صحفية مهمة.

إنو الشخص مجرد مسؤول محلي منتخب، أو مرشح مو منتخب لمنصب سياسي، ما بيضمن الملحوظية، رغم إنه هالأشخاص ممكن يكونو ملحوظين إذا حققو معيار الملحوظية العام.

الشخصيات الرياضية

الرياضي بيُعتبر ملحوظ إذا حصل على تكريم كبير، و بالتالي من المرجح إنه حصل على تغطية مهمة بمصادر ثانوية موثوقة و مستقلة عن الموضوع. السير الذاتية للرياضيين لازم تتضمن مرجع واحد عالأقل لمصدر بيعطي تغطية مهمة للموضوع. تحقيق هالمتطلب لحاله ما بيدل على الملحوظية، لكنه بيشير إنو بالغالب فيه مصادر كافية لتحقيق معيار الملحوظية العام.

المعايير المو صالحة

• وجود علاقة بين شخص "أ" و شخص معروف "ب"، متل إنو "أ" زوج/مرت أو ابن/بنت "ب"، ما بيعتبر سبب لإنشاء مقالة مستقلة عن "أ" (إلا إذا كان فيه تغطية مهمة عن "أ"). العلاقات لحالها ما بتمنح الملحوظية. مع هيك، ممكن ذكر الشخص "أ" ضمن المقالة المرتبطة بـ"ب". مثلاً، جيسون ألين ألكساندر مذكور بمقالة بريتني سبيرز، و صفحة جيسون ألين ألكساندر بتعمل إعادة توجيه لهالمقالة.
• إتجنب استخدام معايير بتعتمد على إحصائيات محركات البحث (متل عدد النتائج بغوغل)، أو قياس عدد الصور المنشورة أونلاين. مثلاً، صناعة الأفلام الإباحية بتستخدم "غوغل بومبينغ" لتأثير عالترتيب. بالنسبة لمعظم المواضيع، محركات البحث ما بتقدر تميّز بسهولة بين المراجع المفيدة و التطابقات النصية العادية. لما تستخدم محرك بحث للمساعدة بتحديد ملحوظية موضوع، قيّم جودة النتائج، مو كميتها، و الروابط المرتبطة فيها.

الفشل بتحقيق كل المعايير

إذا ما تم تحقيق أي معيار لا لمقالة مستقلة و لا للإدراج بمقالة عامة، و ما نجحت أو ما كان ممكن تحسين المقالة، ففيه تلات إجراءات حذف ممكنة:

• إذا كان معيار الحذف السريع A7 بينطبق، استعمل الوسم {{db-person}} لطلب الحذف السريع.
• بالنسبة للمقالات اللي ما بتلبي معايير الحذف السريع، بس مرشحة للحذف بدون جدل، استخدم الوسم {{subst:prod}}. هالوسم بيسمح بحذف المقالة بعد 7 أيام إذا ما اعترض حدا (شوف ويكيبيديا:الحذف المقترح).
• إذا كنت مو متأكد من الحذف أو بتعتقد إنه غيرك ممكن يعترض، رشّح المقالة لإجراء نقاش الحذف. خلال هالإجراء، رح يتم مناقشة أهميتها لمدة 7 أيام.

الحالات الخاصة

الفشل بتحقيق المعايير الأساسية لكن تحقيق معايير إضافية

إذا ما كان فيه تفسير مُرضي أو مصادر مناسبة لمقالة مستقلة، بس الشخص بيحقق معيار أو أكتر من المعايير الإضافية:

• دمج المقالة بمقالة أوسع بتوفر السياق.
• حط وسم {{Mergeto}} على الصفحة، مع الإشارة للمقالة اللي ممكن دمج الصفحة فيها.
• إذا ما كان في مقالة موجودة حاليًا لدمجها، فكر بكتابة المقالة بنفسك أو اطلب من شخص يكتبها.

الفشل بتوضيح ملحوظية الموضوع

إذا المقالة ما وضحت ملحوظية موضوعها، حاول تحسينها عن طريق:

• إضافة قالب {{cleanup biography}} اللي بيطلب معلومات مثل تاريخ الميلاد والأهمية التاريخية.
• إعادة كتابة المقالة بنفسك.
• طلب النصيحة من المحرر/المحررين اللي اشتغلو على المقالة.

المصادر المو كافية

إذا المقالة ما استشهدت بمصادر كافية: دور عن مصادر بنفسك. اطلب نصيحة المحرر/المحررين عن أماكن ممكن تلاقي فيها مصادر. حط قالب {{notability|biographies}} على المقالة لتنبيه المحررين التانيين. إذا المقالة عن مجال متخصص، استخدم قالب {{expert needed}} مع تحديد مشروع ويكي معين لتجذب المحررين اللي عندون معرفة بالمجال، و اللي ممكن يكون عندون وصول لمصادر موثوقة مو متاحة أونلاين.

الأشخاص البارزين بسبب حدث واحد بس

لما يكون الشخص معروف لدوره بحدث واحد، أحيانًا بيكون مو واضح إذا لازم تنكتب مقالة عن الشخص، أو عن الحدث، أو عن التنتين مع بعض. بعملية اتخاذ القرار بخصوص إنشاء مقالات منفصلة، لازم يتم النظر لأهمية الحدث نفسو، و دور الشخص فيه. القاعدة العامة هي تغطية الحدث، مو الشخص. مع هيك، إذا التغطية الإعلامية للحدث و لدور الشخص زادت، ممكن تبرير وجود مقالات منفصلة.

إذا كان الحدث مهم كتير، و دور الشخص فيه كبير، فبالعادة بيكون مناسب كتابة مقالة منفصلة. مثال على هيك هو غافريلو برينسيب اللي اغتال سياسي بارز، و كان الحدث مغطى بشكل واسع بمصادر موثوقة ركزت على دوره بالحدث.

إذا كان دور الشخص بالحدث أقل أهمية، و ما كان فيه معلومات إضافية كافية لكتابة سيرة متوازنة، بالغالب ما بيكون إنشاء مقالة مستقلة ضروري. بهالحالة، لازم يتم تغطية الشخص ضمن مقالة عن الحدث، و بيتم توجيه اسم الشخص لهالمقالة (مثال: جورج هوليداي اللي صور حادثة ضرب رودني كينغ، بيتم توجيهه لمقالة رودني كينغ). إذا كان الحدث مهم بشكل استثنائي، حتى المشاركين الأقل أهمية ممكن يستحقو مقالات خاصة. مثال: هوارد برينان، اللي كان شاهد على اغتيال جون كينيدي.

لما يكون دور الشخص كبير بحدث صغير، بهالحالة، ما بيكون مناسب كتابة مقالات منفصلة عن الشخص و الحدث. بالعادة، اسم الشخص لازم يتم توجيهه لمقالة الحادثة، خصوصاً إذا كان معروف بس بسبب الحدث، و كان هالحدث هو كل اللي مذكور عنه بالمصادر. مثال: صفحة Travis Walton بتوجه لصفحة حادثة الأجسام الطائرة المرتبطة فيه. مع هيك، بحالات معينة، إذا كان الشخص اللي اشتهر بحدث واحد معروف أكتر من الحدث نفسه، بيكون مناسب تسمية المقالة عن الحدث باسم الشخص، مثل Tank Man (رجل الدبابة).

نصائح للمحررين: إتجنب كتابة سير ذاتية زائفة و مو ضرورية، خصوصاُ للأشخاص اللي لسا عليشين. إتذكر إنو "البارز" مو مرادف لـ"المشهور". ممكن شخص يكون مشهور بسبب حدث واحد، لكنه بارز بأكتر من حدث. و العكس صحيح: شخص ممكن يكون مشهور عموماً، لكن التغطية المهمة بتركز على حدث وحيد متعلق فيه.

قوائم الأشخاص

المقالات اللي بتحتوي على قوائم أشخاص (أو بتكون قائمة مستقلة بحد ذاتها) لازم تحدد معايير الإدراج بناءً على المعايير العادية الموضوعة لهالصفحة. بالنسبة للقوائم الموجودة ضمن المقالات، معايير الإدراج فيها لازم تكون متوافقة مع WP:SOURCELIST، يعني الإدخالات لازم يكون إلها نفس الأهمية للموضوع و كأنها كانت جزء من نص المقالة نفسها، و حسب سياسات و إرشادات ويكيبيديا (متل ويكيبيديا:أقسام التوافه).

العيلة

إنو الشخص مرتبط بشخص بارز ما بيعطيه أي مستوى من الملحوظية بحد ذاته. المقالات عن أشخاص بارزين اللي بتذكر أفراد عيلاتون بشكل عابر، ما بتثبت إنو هالشخص من العائلة ملحوظ.

المقالات عن محررين ويكيبيديا

فيه محررين بويكيبيديا عندون مقالات عنون. مع هيك، إنون محررين ويكيبيديا بحد ذاته ما إلو أي تأثير على ملحوظيتون، بغض النظر إذا كانو حررو ويكيبيديا قبل أو بعد إنشاء المقالة عنون. إرشادات تضارب المصالح (Wikipedia:Conflict of Interest) بتضل تنطبق لما بيحررو مقالات عن حالون. كل المقالات لازم يتم تقييمها بناءً على الإرشادات و السياسات المعتمدة، متل هالإرشادات، و سياسة ويكيبيديا عن سير الأشخاص العايشين، و مو بحث أصلي، و قابلية التحقق.