Wb/nia/Yesaya/58
I. Fane gu famini tödö andrö
[edit | edit source]1 Ao, forege; böi bato! Ebua'ö liu, amaedola li dorofe, si terongo ba zaröu; ombakha'ö ba mbanuagu laröra, ba ba ma'uwu Yakobo farongogö horöra? 2 Ba lazofu-zofu zui ligu, bongi ma'ökhö, omasi ira la'ila lala andrö khögu! Si mane banua si no molau satulö ba si lö irai mondröi lala Lowalangira andrö: la'andrö khögu u'atulö'ö wangetu'ö huku, omasi ira na to'ele Lowalangi. [Lamane]: 3 "Hana wa mamoni ba gö ndra'aga, ba lö ö'ila, ba hana wa mafakao ndra'aga, ba lö sanehe ndra'ugö?" Ba na luo mamoni ami, ba mihalö-halö göi halöŵömi, ba mifakao zohalöŵö khömi, fefu! 4 Ba wasosota ba ba wagua-guasa aekhu wamonimi andrö, ba ba wabagosa; famonimi ma'ökhö, ba tenga ena'ö tefondrondrongo si yaŵa wangandrömi andrö. 5 Hadia, si manö maö wamoni somasi ndra'o: na ifakao ia niha ma'ökhö? na ikaöndrö ia, hulö kölöyömö ba na i'anufo goni ba awu — hadia da'ö öfotöi famoni, da'ö öfotöi luo somasi Yehowa?[1]
II. Ha ba wa'atulö dödö si ndruhu-ndruhu ba ba wa'omasi nawö tesöndra wangorifi ba howu-howu
[edit | edit source]6 Hadia, tenga da'ö wamoni somasi ndra'o: na latoto'ö wesu zi lö horö ba na laburusi mböbö galo mbagi andrö, na la'efa'ö nifakao ba na larasa galo mbagi, fefu? 7 Ena'ö öfosasi göu ba zolofo ba ena'ö ö'ohe yomo khöu zi numana, si lö nahia; na ö'ila zi lö balu-balu, ba ena'ö na öfonukha, ba fa böi ö'erogö wöfö nösiu?[2] 8 Awena dania tumbu haga khöu si mane fa'atumbu zi moluo, ba mangaösö wa'adöhö wökhöu; mowaö-waö fönau wa'atulömö, ba lakhömi Yehowa moroi furiu ba lala.[3] 9 Ba mu'ao ndra'ugö ba itema liu Yehowa; ö'angaröfi li ia, ba imane: Ya'e ndra'odo! Na öbato wangöhöndrögö awöu, na lö'ö sa'ae ötuturu niha, ba na öbato wanandraŵaisi awöu. 10 Na öbe'e ba zolofo mbalazou [somasi'ö] ba na örara dödö zebua famakao, ba humaga haga andrö khöu ba zogömi-gömi, ba hulö haga ba zi laluo zogömi-gömi andrö khöu dania. 11 Ba lö ibato wamasao ya'ugö Yehowa; i'abusoi'ö ndra'ugö ba danö si no oköliköli, i'abe'e'ö dölau. Ba tobali hulö kabu nihaogö famatörö idanö ndra'ugö, hulö gumbu, si lö aetu idanö. 12 Ba awöu andrö, ba la'otomosi zui gadudula andrö, si no arara: dayadaya ba götö föna öfuli öfa'anö. Ba labe'e töimö "Zangazökhi sadudu" ba "Sangehao lala, ena'ö ta'ila ta'iagö da'ö."[4] 13 Na lö ölau zalakha ba zabato, fa böi öhalö halöŵöu, na luo ni'amoni'ö andrö khögu; na öbe'e töi zabato "omasiö" ba töi luo ni'amoni'ö andrö khö Yehowa "nifosumange" ba na öfosumange ia, fa böi öhalö halöŵöu ba fa böi ölau nilaumö, awö deatea mbewe andrö. — 14 Ba tobali omasiö khöu Yehowa, ba ufatörö ndra'ugö ba zohili tanö, ba ube'e öu dana khö wurugömö Yakobo andrö. Hiza, no taroma li Yehowa![5]
Famotokhi ba gahe
[edit | edit source]Fabaliŵa lala
[edit source]Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö