Wb/nia/Yesaya/23

I. Fama'ele'ö fa'adudu Diro andrö

1 Nitandrösaigö ba mbanua Diro andrö da'e: Mi'ege-ege, ya'ami si otarai moloyo ba Dateso! hiza fönami wa'adudu; tobali lö omo, lö nahia sa'ae. Moroi ba danö Ndrawa Giti te'ombakha'ö khöra. 2 Böi mihede-hede sa'ae, ya'ami si hene asi. No mege anönö danö saniaga andrö, banua Zidona, soloyoloyo ba nasi. 3 Ba nasi sa'ae möi khöra mbua nowi Nilo, nibasi ba ndraso nidanö sebua andrö, tobali kade niha baero ba khöra. 4 Aila ndra'ugö, ya'ugö Sidona! Noa sa imane asi, banua saro andrö ba mbewe nasi: "Lö safökhö hulugu, lö sadono ndra'odo! lö ni'urigu ono matua ba lö ni'e'ebuagu ono alawe!" 5 Na terongo ba Ndrawa Miserayi, ba tobali dödöra ba duria Diro andrö. 6 Mi'oloyo, misaŵa Dateso! Mi'ege-ege, ya'ami si hene asi! 7 Hadia, da'ö mbanuami andrö, somuso dödö niha, si no götö-götö fa'ara, me tetaru'ö, sanaŵa saröu ba wanaru'ö banua misa? 8 Ha niha zi honogöi da'ö, nifatörö ba Diro andrö, banua sama'ema saembu ana'a, ba zi no salaŵa zi so lafo ba ba zi no fondrege zabölö ba guli danö zaniaga? 9 Yehowa ngahönö andrö zi no mangohonogöi, ba wango'aya famahokha gama-gama andrö fefu ba ba wame'e faya fondrege zalaŵa andrö ba guli danö, fefu. 10 Minönöi danömi, ya'ami banua Dateso, si mane Nilo andrö; lö ba'a-ba'a sa'ae. 11 No i'oro'ö dangania Yehowa yaŵa nasi, no ifahisi nöri andrö; no i'oroi'ö Yehowa ba khö Gana'ana andrö, ba wanudugö banua saro khöra. 12 No imane: Lö'ö sa'ae fa'omuso dödö khömi ya'ami banua Zidona amaedola nono alawe ni'o'aya! Milabu, misaŵa Ndrawa Giti misi yefo! Ba he ba da'ö, ba lö fa'ahono khömi. 13 Hiza danö Ndrawa Galedaia andrö — da'ö soi andrö, si no muzaewe! No latehe ba gutu ndru'u ba danö si mate Dawa Asiria. No lalau malige, naha zanaro; na lafaulugö wanudugö gödo khöra, no labali'ö adudula. 14 Andrö mi'ege-ege, ya'ami soloyo ba Dateso, me no mududugö mbanua saro andrö khömi!

II. Na no ara ba tefaigi zui Diro andrö

15 Ba na luo da'ö, ba fitu ngafulu fakhe wa'ara, ba lö itörö tödö niha Diro andrö, sagötö noso razo. Ba na no aefa zi fitu ngafulu fakhe, ba itörö ba Diro andrö wanunö andrö nitandrösaigö ba ndra alawe sohorö-horö [imane]: 16 "Halö mbiola, törö-töröi newali, yaugö ira alawe sohorö-horö andrö, si lö itörö-törö tödö niha sa'ae! Haogö wolau, forege wanunö, ena'ö ifuli itörö tödö niha ndra'ugö!" 17 Na aefa zi fitu ngafulu fakhe, ba ifuli ifaigi Diro andrö Yehowa ena'ö ifuli isöndra luonia ba wohorö-horö andrö, ba ena'ö mohorö-horö ia ba mbanua niha fefu, ba guli danö ma'asagörö. 18 Ba ölönia andrö luonia wohorö-horö, ba ni'amoni'ö khö Yehowa; lö labe'e yaŵa ba lö lahöna; sabönö böli gö a'ine ba böli nukha si sökhi ba zowanua ba gamaudu nahia Yehowa andrö.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö