Wb/nia/Yesaya/22

I. Fama'ele'ö fanuwö Yeruzalema, börö horöra andrö

1 Nitandrösaigö ba ndraso wama'ele'ö andrö da'e: Hadia da'ö khömi, wa ahori möi yaŵa ami ba dete nomomi; 2 ya'ugö banua sebua ruru, sabölö fagua-guasa, ya'ugö banua saro, sowua-wua dödö niha? Tenga sa ni'ö'ötö si'öli zi no mate tou andrö khömi, tenga si mate ba wanuwö! 3 Fefu zolohe ya'ami, ba no ahori moloi ba no mura'u lö fana. Banuami fefu, ndrohu-ndrohu nikhamö, ba no ahori tera'u, he no aröu moloi. 4 Andrö umane: Böi mifaigi-faigigido! Da'uforege wege-ege! Böi mihötöi wondrara tödögu, ba wa'adudu mbanuada andrö. 5 Baŵa wa'atobali dödö sa'ae moroi khö Zo'aya, Yehowa ngahönö andrö, baŵa wa'adudu, baŵa wa'afakuyu ba ndraso wama'ele'ö andrö; tedudugö göli kara ba telobi ba hili we'ira-ira. 6 No latuyu naha nono wana Dawa Gelama, fao gureta zanuwö ba si fakudo ba no laheta luniluni mbaluse banua Giri andrö. 7 Ba no anönö kureta ndraso si sökhi andrö khömi, ba no lafa'anö ira si fakudo, ba gamaudu mbawa göli. 8 Ba no laheta mbalu-balu mbanua Yuda andrö, ba samaigi fangöna ami ba nomo eu gatua andrö. 9 Ba mi'ila wa no fahöna zabökha öli ba mifaonö nidanö ba mbaŵa tanö tou. 10 Ba mi'erai nomo ba Yeruzalema, ba midudugö ösa, fangazökhi göli kara. 11 Ba mifonaha nidanö ba gotalua göli si dua götö andrö, idanö ösi mbaŵa si no ara andrö. Ba lö'ö sa minehegö zolau ya'ia; si no mangohonogöi ya'ia föna sa'ae, ba lö mitöngöni. 12 Mu'ao Zo'aya, Yehowa ngahönö andrö, me luo da'ö, ba wege-ege ba ba wange'esi ba ba wanöwö bu ba ba wonukha nukha ba wa'abu dödö. 13 Ba ha sambalö fa'iki ba fa'omuso dödö ba fanaba öröbao ba famunu biri-biri ba famadu-madu agu, femanga-manga ba famadu-madu hadia ia — "si mate sa atö ita mahemolu" [miŵa'ö]" 14 Ba no ifarongo-rongogö khögu Yehowa ngahönö andrö, ba dögi dalingagu, imane: Si ndruhu, lö tebe'e aefa khömi lalömi andrö, irege mate ami — i'ŵa'ö So'aya, Yehowa ngahönö andrö.

II. Fangombakha fa'ate'ala mandru Sebena andrö ba famataro Eliaki

15 Si mane niŵa'ö Zo'aya, Yehowa ngahönö andrö: Labu, ae yomo khö mandru andrö, Sebena andrö, mandru yomo [ba ömane khönia]: 16 Hadia khöu ba ha niha khöu ba da'e, wa no öfakharu'ö khöu ba da'e lewatö? Ba hili yaŵa ifakharu'ö lewatönia, ba gara ifafahö'ö khönia mbate'e! 17 Hiza, i'abölögö ifazaumba ndra'ugö Yehowa, ya'ugö niha andrö; i'abe'e'ö danga, wondra'u ya'ugö! 18 I'olömbugö ndra'ugö, amaedola golömbu ifazaumba'ö baero ba danö sebolo; ba da'ö mate ndra'ugö; ba da'ö dania ofeta gureta andrö khöu, si sökhi sibai andrö, ya'ugö fangaila yomo ba nomo zokhö ya'ugö! 19 Utimba ndra'ugö ba nifataro ya'ugö andrö; lasöbi ndra'ugö, laheta'ö ba nahau. 20 Ba na luo da'ö, ba muhededo khö genonigu Eliaki andrö, ono Hilikia. 21 Ba ube'e barunia mbarumö andrö ba böbö talunia mböbö talumö, ba famatörömö mege, ba ube'e ba dangania, ena'ö amaedola nama ia, ba mbanua Yeruzalema ba ba ma'uwu Yuda. 22 Ba ube'e ba dangania wogoe mbawandruhö nomo Dawido andrö, ena'ö lö sokusi, na ikoe, ba lö sogoe, na ikusi. 23 Ba u'osö ia saita, ba nahia saro ia, ba ena'ö dadaoma lakhömi ia yomo ba nomo namania. 24 Ba tobali la'olembai ia fefu zi so töi yomo ba nomo namania, he daha sesolo ba he daha sise'ise, fefu gama-gama sakhökhö andrö, he figafiga andrö ba he kundri andrö fefu. 25 Ba na luo da'ö — iŵa'ö Yehowa ngahönö andrö — ba adeha zaita andrö, ni'osö ba naha saro mege, tetimba ba aekhu tou, ba nisaitagö khönia, ba tefara'u; noa sa iŵa'ö Yehowa.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö