Wb/nia/Yesaya/57

I. Fanegu Iraono Gizeraeli ba wame'e adu andrö

1 Tekiko zatulö tödö, ba lö sabu tödö ba da'ö. Mate manö zadölö tödö, ba lö sanöngöni, wa no börö walösökhi andrö, ba niha, wa mate manö zatulö tödö. 2 Ohahau dödönia we'amöi barö danö: mörö ira ba dufora, ya'ira si no manörö lala sadölö. 3 Ba ya'ami, ba mi'ae ba da'e, ya'ami ono zebua elemu ira alawe, ya'ami nga'ötö zohorö; sabao ninami. 4 Ha niha atö ni'ig-i'igi'ömi? Ha khö mifaboka mbawami, ha khö mi'oro'ö lela? Hadia, tenga ono si no fabali khö namara ami, nga'ötö walimosa andrö? 5 Si no abao ba mbörö ndruria, barö geu sobulu fefu; sanaba bagi nonora ba ndraso, ba ba dögi narö gara misa. 6 No öhalö khöu ösa gara salösö ba ndraso, ya'ia nituyumö tana khöu! No öfaduwa khönia zumange nibadu, no öbe'e zumange ni'a. 7 Hadia, utehe da'ö? Ba zuzu hili sebua ba salaŵa öbe'e wörömamö: ba da'ö göi möi'ö yaŵa, ba wanaba sumange. 8 Ba gero lagö mbawandruhö ba ba zi tambai gehomo öbe'e dandra andrö khöu, noa sa öheta gambalamö, wangerogö ya'odo, mörö'ö ba dufou, öbologö, mamagölö ndra'ugö khöra: omasi'ö na mörö ira ba ngaiu, öfaigi zogawi tanga ya'ugö. 9 No möi'ö khö razo andrö, no ö'ohe wanikha, oya öfake dalu-dalu nigule'ö, ba irugi ba zaröu öfatenge zinengeu, irugi zabakha si tou, ba mbanua tou. 10 Ba wa'asese wangörö-ngörö andrö erege dödöu, ba lö'ö sa öŵa'ö: Ubato! Tenga si mate na dangau, ö'ila, ba ikhamö na fa'abölöu. 11 Ha niha atö zaila'ö, ha niha zata'u ndra'ugö, wa si falimo ndra'ugö, wa olifu'ö ndra'odo, wa lö ba dödöu sa'ae ya'o? Tenga si manö: me lö hede-hedegu, si no arara, — andrö wa lö'ö sa'ae ö'ata'ufi ndra'odo! 12 Da'ufarongogö wa'atulö andrö khöu, ba nilaumö andrö, — ba si lö guna khöu. 13 Na mangarö-ngarö'ö, ba ndramu'orifi'ö nihönamö andrö [adu andrö]: ba ahori humombo ba nangi, i'oloi'ö oho. Ba si saŵa ya'odo, ba khönia danö, khönia hili ni'amoni'ö andrö khögu!

II. Ba zangide-ide'ö ya'ia tefabu'u wa'ohahau dödö, ba khö zebua horö, ba lö fa'ohahau dödö

14 Ba andrö imane Mifolala, mifolala! Mihaogö lala! Miheta zi fatimba ba lala mbanuagu andrö! 15 Da'ö sa niŵa'ö zalaŵa andrö sebua lakhömi, si lö tebulö ba dadaoma zalaŵa, sotöi "Ni'amoni'ö," [imane]: Ba zalaŵa yaŵa so nahiagu ba ni'amoni'ö ndra'o, ba ba si no arasa tödö ba si lö fayaŵasa dödö, ba udou'ö wangorifi zi lö fayaŵasa dödö ba ufuli u'orifi dödö zi no arasa! 16 Tenga si lö mamalö-malö watahisagu ba tenga si lö aetu wönugu, ariri sa ena'ö fönagu gehehara, awö noso andrö, niwöwöigu. 17 Börö lalönia andrö, fa'omasinia gana'a, wa no mofönu ndra'o, ba no u'otu'ö ia; no ubini'ö ndra'o ba sofönu ndra'o, ba no i'erogö [ndra'o], itörö lala somasi ia. 18 No u'ila lalania andrö, ba edöna ndra'o u'orifi ia; u'ohe dangania ba urara dödönia, tödö zabu tödö andrö khönia. 19 Ya'ia sangasogö bua-bua mbewe: "Fa'ohahau dödö, fa'ohahau dödö, he ba zahatö ba he ba zaröu," iŵa'ö Yehowa, "ba u'orifi ira." 20 Ba sebua horö andrö, ba no hulö nasi sebua dulu, tebai sa'ae ahono, ba iohe'ohe miyaŵa dai mba ba solotu dulunia andrö. 21 Ba zebua horö, ba lö fa'ohahau dödö, iŵa'ö Lowalangigu.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö