Wb/nia/Yesaya/54

I. Ifuli fawu'u li Yehowa ba Ndraono Gizeraeli, fa'ebua dödö

1 Owua-wua'ö dödöu, ya'ugö si lö ono, si lö irai madono! A'iki ba lau liwaliwa, ya'ugö si lö irai afökhö hulu! Noa sa'ae oya nono matua khö zi lö awö'awö, moroi ba zi no muhalö donga, iŵa'ö Yehowa. 2 Ebolo'ö naha noseu, alakha ebolo sibai zagö nahiau andrö, labe'e; böi tenaŵa! Anau'ö gasönia, aro'ö wanaru'ö! 3 Öfa'ese sa dania ndra'ugö, ba gambölö ba ba gabera: Labe'e dania barö mbawara soi [bö'ö] ma'uwumö andrö ba lafuli lafo'ösi mbanua si lö niha sa'ae. 4 Böi busi dödöu, tenga nibe'e ba zi lö boto ndra'ugö, ba böi aila'ö, tenga sa safusi bawa ndra'ugö dania. Olifu'ö sa'ae dania wa'ailau andrö, me ono alawe na ndra'ugö, ba lö'ö sa'ae itörö tödöu wa'ailamö andrö, me lakha mbanua ndra'ugö. 5 Fo'omou sa'ae zomböi ya'ugö andrö: Yehowa ngahönö döinia; ba sangorifi ya'ugö Ni'amoni'ö Ndraono Gizeraeli andrö: Lowalangi zi sagörö uli danö döinia. 6 Noa sa ikaoni ndra'ugö Yehowa, amaedola ndra alawe ni'erogö mege ba si no abu sibai tödö; ba si bohou muhalö —, ba hadia, ni'erogö da'ö? iŵa'ö Lowalangi. 7 Duhu, no u'erogö ndra'ugö, si lö arara, ba u'ebua'ö wa'ahakhö dödögu, wangahatö'ö ya'ugö khögu. 8 Me tesao wönugu, ba no ubini'ö mbawagu khöu, si lö arara, ba ufuli uhakhösi tödö ndra'ugö, fa'ebua dödö si lö aetu, iŵa'ö sangorifi ya'ugö andrö, Yehowa. 9 Timba wa'anönö danö idanö andrö, me luo Noakhi, khögu da'ö: si mane fahölusagu andrö, wa lö tola ifuli inönöi danö idanö andrö khö Noakhi, si manö wahölusagu, wa lö'ö sa'ae mofönudo khöu, awö wa lö'ö sa'ae utegu'ö. 10 Alakha sa'ae aruru hili ba alakha mangiwa hili-hili, ba lö'ö sa tebulö khöu wa'ebua dödögu ba tebai mangiwa wawu'usa li andrö khögu, iŵa'ö sahakhö tödö khöu, Yehowa andrö.

II. Edöna ifuli itaru'ö Ziona, ba wa'atulö

11 He ya'ugö sabu tödö, nifaheu nangi, si lö fondrara tödö! Hiza, ube'e latalatamö weremata manika ba ufotoyo ndra'ugö feremata nila. 12 Ba yasia ube'e mbumbu gölimö ba bawa gölimö, ba feremata ita, be fefu gowe nolamö andrö, ba batu indra'indra. 13 Ba onou fefu, ba nifahaö Yehowa; ebua wa'ohahau dödö nonou andrö. 14 Fa'atulö dania latalatamö, fangaro; ya aröu khöu wamakao! alakha lö ata'u'ö ba ya aröu gameta'uö, lö'ö sa ihatö'ö ia khöu. 15 Ba na so zi fa'udu khöu, ba ma'ifu tenga nilau dödögu: gofu ha niha zi fasöndra khöu, ba si tekiko! 16 Hiza, ya'o zomböi siambu andrö, si duruduru'ö si'öli ba galitö, samazökhi fangöna, nekhe-nekhe dangania; ya'o göi zomböi samakiko, ba wamufu ya'ia. 17 Fefu wangöna, nibago ba wamakiko ya'ugö, ba si lö boto ba dozi lela si fa'udu khöu, hadia ia huhuo, ba ö'ila ölaŵa. Da'ö dana khö genoni Yehowa andrö, awö wangatulö andrö, si falukha ira khögu, iŵa'ö Yehowa!

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö