Wb/nia/Yesaya/49
I. Enoni Yehowa andrö, nikaoni sangorifi banuania ba haga ba niha baero
[edit | edit source]1 Mifondrongondrongo khögu, ya'ami hulo, mibe'e mbörö dalingami, ya'ami soi niha ba zaröu! No ikaonido Yehowa, i'otarai me sodo ba dalu ninagu; i'otarai me tabina ndra'odo itötöi döigu. 2 Ba no ibali'ö si'öli satarö mbewegu: ba lumö dangania ubini'ö ndra'odo; no ibali'ö ono wana salösö ndra'odo: no ibini'ö ndra'o ba naha nono wana andrö khönia.[1] 3 Ba no imane khögu: Enonigu ndra'ugö, ya'ugö Iraono Gizeraeli, ba ni'oroma'ögu lakhömigu andrö. 4 Ba no umane: Zaya-zaya gölögu wa'erege dödögu andrö, ba zi lö boto, ba ba zi lö guna uhori gölögu, ba dali Yehowa ba lala khögu, ba khö Lowalangigu mbalazi hadia luogu. 5 Ba iŵa'ö sa'ae Yehowa, si no mamali'ö enoninia ya'odo, i'otarai dalu ninagu, ena'ö u'ohe mangawuli khönia ma'uwu Yakobo ba ena'ö te'ozaragö khönia Ndraono Gizeraeli — ba nifosumange ndra'o, wamaigi Yehowa ba no tobali fangabölögu Lowalangigu andrö. — 6 Ba no imane: Wa enonigu ndra'ugö ba wanga'azökhi mado ma'uwu Yakobo andrö, ba no ambö, awö wa ö'ohe mangawuli ni'orifi andrö, Iraono Gizeraeli; ba andrö ubali'ö haga ba niha baero ndra'ugö, ena'ö irugi ba wondrege danö fangorifi andrö khögu.[2] 7 Imane Yehowa, sangorifi Iraono Gizeraeli, Ni'amoni'öra andrö, khö zi lö ba dödö niha bö'ö fefu, ni'ogorofi niha bö'ö si no tobali sawuyu zamatörö ya'ia: La'ila dania razo ba maoso — la'ila samatörö, ba latuhi danö, börö Yehowa, si lö faröi andrö, börö Ni'amoni'ö Ndraono Gizeraeli andrö, sanuyu ya'ugö mege! 8 Imane na Yehowa: Ufondrondrongo liu, na baŵa wa'omasi ba utolo'ö, na baŵa wangorifi: ba urorogö ndra'ugö, ba ube'e fawu'usa li ba mado Gizeraeli ndra'ugö, ena'ö ö'azökhi danö ba ena'ö öfuli ba zokhö zi no tanö si mate iada'e.[3] 9 Ena'ö ömane ba zi so ba gurunga: "Mi'ae baero", ba ba zi so ba zogömi-gömi: "Mitabu ba zohaga"! Ba zinga lala lasöndra göra, ba hili fefu, si no asele mege, manga-manga ira.[4] 10 Lö olofo ira ba lö owökhi dödöra, lö ilimo ira lumö-lumö andrö ba lö ihandro ira sino; sahakhö tödö ya'ira andrö sa'ae zolohe tangara ba ihaogö wamasao ba gumbu nidanö ya'ira.[5] 11 Ba fefu hili andrö khögu, ba ubali'ö lala, ba nitamba lala andrö khögu.[6] 12 Ba so dania zi otarai moroi ba zaröu ba so zi otarai moroi yöu ba moroi ba gaekhula luo, ba so zi otarai danö Sini.
II. Famabu'u fanga'azökhi banua Lowalangi andrö ba fangozaragö ya'ira moroi ba danö bö'ö fefu
[edit | edit source]13 A'iki, ya'ugö banua si yaŵa, ba anunö, ya'ugö tanö, mi'ebu'a'ö li, ya'ami hili, mifarongogö wa'iki! Irara sa'ae dödö mbanuania Yehowa ba ihakhösi tödö zebua famakao andrö khönia![7] 14 Ba imane Siona: "No i'erogö ndra'o Yehowa, no olifu Zo'aya ndra'odo!" 15 Hadia, olifu maö ndra alawe nononia ba mbagi zusu, fa lö ihakhösi tödö nono matua si oroi dalunia? Ba he meziŵa olifu ira [nonora], ba lö'ö zui olifu ndra'o ndra'ugö.[8] 16 Hiza ba dete dangagu no usura maedo-maedou: si lö aefa ba duduma hörögu gölimö andrö. 17 No la'ondrasi ono matua khöu, ba laheta ira khöu sanudugö ya'ugö, samakiko andrö. 18 Faöga höröu, fakhölö'ö ba faigi! No la'owuloi ira fefu, no la'ondrasi ndra'ugö! Faya wa no sauri ndra'o, iŵa'ö Yehowa, na lö öhalö ayau ira fefu, fangehaomö, na lö öbe'e ayau ira, amaedola naya nono nihalö.[9] 19 Adudula andrö ba si lö niha sa'ae ba danö andrö khöu, si no mufaitoisi, ba ambö dania naha niha [fefu], ba la'aröu'ö ira si manga ya'ugö. 20 Lamane na dania ba dögi dalingau ono andrö, ba walö'ono mege: Ambö nahagu, fonaha ndra'odo, fa u'ila ube'e nomogu! 21 Ba ömane dania dödöu: Ha niha zi adonogö khögu da'ö? — si lö ono sa mege ndra'odo, si lö nga'ötö, nitibo'ö ba si lö guna! Ba ha niha zange'ebua khögu da'ö? — ha sa ya'odo zi tosai mege, ba he moroi da'ö? 22 Andrö imane So'aya, Yehowa: Hiza, ufazaŵa dangagu ba niha solohe adu ba utaru'ö mandrera, soroma ba niha baero, fa la'ohe nonou matua, nilu'i ba lembe, fa la'angalisigö nonou alawe, wolohe khöu.[10] 23 Razo sa'ae zolaya ono khöu ba fo'omora, fo'omo razo, zamaenu. Lafalögu tou ira ba danö, wangalulu khöu ba lafelai gawu-gawu, si falemba ba gaheu, ena'ö aboto ba dödö, wa no Yehowa ndra'odo, si lö mame'e aila sanötöna khönia.[11] 24 Hadia, ta'ila musöbi ba danga zabölö nirabunia ba hadia, lasöndra woloi nitaha zabe'e?[12] 25 Imane sa Yehowa: Alakha lasöbi ba danga zabolö nitahania, ba alakha aefa ba danga zabe'e nirabunia, ba ba zi fa'udu khöu fa'udu ndra'odo, ba ya'o zangorifi onou andrö. 26 Ba ube'e ö zamalangögö ya'ugö nagolera ba mabu ira dora ube'e, timba wemabu tuo; ba aboto ba dödö niha fefu dania, wa no ya'odo, Yehowa, zangorifi ya'ugö, ba sangefa'ö ya'ugö, ya'odo, sabölö andrö ba ma'uwu Yakobo.[13]
Famotokhi ba gahe
[edit | edit source]Fabaliŵa lala
[edit source]Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö