Wb/nia/Yesaya/36
I. Fanuwö Yeruzalema[edit | edit source]
1 Me no alua meweledölu fakhe razo Hisikia andrö, ba so moroi si tou Zaneribi, razo Asiria, ba wanuwö banua saro andrö, fefu, ba Ndraono Yuda; ba atu'a ira.[1] 2 Ba ifatenge ba Yeruzalema Rabisake andrö razo Asiria, moroi ba Lakhisi, ba wanuwö razo Hisikia, ato khönia zanuwö; ba tebato ira ba lala hele ba mbaŵa nidanö tanö si yaŵa, ba zinga lala ba mbenua zolokhoi nukha.[2] 3 Ba möi baero khö Rabisake Geliaki, mandru ba gödo, awö Zebena, durutuli awö Yoakhi, za'asa sebua, ono Gasafo. 4 Ba imane khöra Rabisake: Mimane khö Hisikia: Da'ö niŵa'ö razo sebua andrö, razo Asiria: Hadia we'e-we'e dödö andrö, nidöna-dönamö?[3] 5 Ma öwai, noa mbewe fa'abe'e dödö ba fangabölö ba wanuwö? Ha niha atö zabe'e dödöu, wa no ö'erogö ndra'odo? 6 Hiza, ödöna-döna ba Ndrawa Miserayi, si'o lewuö andrö, si no afatö, ba dozi si ani'o ya'ia, ba ifahö danga, atöla ibe'e! Si manö Wara'o andrö, razo Miserayi, ba zabe'e tödö khönia, fefu.[4] 7 Ba na mimane ena'ö khögu: Khö Yehowa, Lowalangima, madöna-döna, ba no ya'ia niböhöli Hisikia hili-hili andrö, awö naha wame'e sumange, wanguma'ö ba Ndraono Yuda ba ba mbanua Yeruzalema: Föna naha wame'e sumange andre mangalulu ami! 8 Ba labu, lau fataru khö zokhö ya'o, razo Asiria: da'ube'e khöu kudo, dua ngahönö nga'eu, ba faigi, na ö'ila ösöndra zi fakudo yaŵa. 9 Ba hadia, ö'ila ötimba, he ha samösa zolau khöu kumandra, enoni zokhö ya'o, fondrege zide-ide? ba noa zui abe'e dödöu ba Ndrawa Miserayi andrö, börö gureta ba si fakudo? 10 Ba hadia, tenga sinehe Yehowa we'amöigu miyaŵa, ba wanuwö banua ba danö andre ba ba wanudugö? No ya'ia, Yehowa, zanguma'ö khögu: Ae suwö mbanua ba danö andrö ba dudugö!
II. Fehede zinenge Zaneribi, fayaŵasa[edit | edit source]
11 Ba lamane khö Rabisake ira Eliaki, Sebena, Yoakhi: Li Garamo lau ba genonimö, ma'ila sa'ae da'ö; böi lau li niha Yehuda, fa böi larongo sato, si so ba göli. 12 Ba imane Rabisake: Hadia, khö zokhö ya'ugö ifatenge ndra'odo sokhö ya'o, ba ma khöu, ba wangombakha da'ö? hadia, tenga ba niha si so ba göli, ba wemanga daira ba ba wamadu giöra, ifatenge ndra'odo! 13 Ba maoso Rabisake ba mu'ao ba li niha Yehuda, imane: Mifondrondrongo li razo sebua andrö li razo Asiria: 14 Da'ö niŵa'ö razo: Böi mibe'e nifowöhö Hisikia ami; tebai sa i'orifi ami. 15 Ba böi mifondrondrongo, na ituturu we'e-we'e dödömi Yehowa Hisikia, wanguma'ö: Lö zi lö i'orifi ita Yehowa; lö'ö sa telulu ba danga razo Asiria mbanua andre! 16 Böi mifondrondrongo khö Hisikia! Imane sa razo Asiria: Mi'atulö'ö ami khögu, milulu ami ba dangagu, ba i'a mbua nagu khönia, awö mbua marafala zamösana ba ibadu nidanö ba mba'a khönia. 17 Irege sodo, ba wolohe ya'ami ba danö, si fagölogölö ba danömi, tanö si fahöna bua nowi ba ösi nagu, tanö si fahöna balazo ba kabu nagu. 18 Böi mibe'e nifowöhö Hisikia ami, na imane: I'orifi ita Yehowa! He wisa Lowalangi niha baero andrö? Hadia, no i'efa'ö mbanuania zamösana ba danga razo Asiria? 19 Heza so Lowalangi andrö ba Hamata ba ba Garafada? Heza so Lowalangi ba Zefarawa'i? Ba heza so Lowalangi danö Zamaria? Hadia no la'efa'ö Zamaria ba dangagu?[5] 20 Heza so ba Lowalangi danö andrö fefu zi no mangefa'ö banuara ba dangagu, fa i'efa'ö ena'ö Yeruzalema Yehowa, ba dangagu andre? 21 Ba lö hede-hedera sa'ae, lö latema linia, sambua li lö'ö. Noa sa iŵa'ö razo: 22 Böi mitema linia: Ba lafuli ira: ira Eliaki andrö, ono Hilikia, mandru ba gödo ba Sebena durutuli ba Yoakhi, ono Gasafo, za'asa sebua andrö khö Hisikia; no lasika nukhara, ba la'ombakha'ö khönia niŵa'ö Rabisake andrö.
Famotokhi ba gahe[edit | edit source]
Fabaliŵa lala[edit source]
Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö