Wb/nia/Yesaya/29

I. Fama'ele'ö fa'atosasa mbanua Yeruzalema ba fangorifi andrö, si lö mudöna-döna

1 Alai ndra'ugö, ya'ugö Arieli! Arieli banua ba nibe'e Dawido nahiania. Mifatohu ndröfi; na ituo wunia, na no fatutu mbaŵa gowasa andrö, 2 ba usasagö Garieli andrö, irege tesao wege-ege ba fangarö-ngarö, ba tobali Arieli ia khögu! 3 Ba ufa'u'u ndra'ugö, ufasui ndra'ugö nahiagu andrö; ufera'ö ndra'ugö fari ba ube'e mba'a-ba'a zanuwö ba gamaudumö. 4 Ena'ö moroi ba danö tou muhede ndra'ugö, moroi ba gawu-gawu tou terongo liu; ena'ö hulö li mbekhu moroi tou barö danö limö, ba hulö zi fangöngö-ngöngö moroi tou ba gawu-gawu huhuomö. 5 Ba fa'ato nemaliu andrö, ba timba ngawua nene, ba fa'ato zamakao ya'ugö, ba timba ndrami wakhi sihombo ba nangi; ba i'ogomuzaö, lö mudonadona. 6 Ifatörö Yehowa ngahönö andrö we'ugu-ugu mbanua ba siheu ba fa'ofetu, ba angi sabölö ba teu laöhö ba hola-hola galitö si manga-manga hadia ia. 7 Ba lala ba wangifi, lala ni'ilada ba zi bongi dania lala soi andrö fefu, sanuwö Arieli andrö, ha wa'ato ira, dozi si möi manuwö ya'ia, banua saro andrö ba hili, dozi sanasagö ya'ia. 8 Ba hulö na so zangifi manga ia, ba na tokea ia, ba lö tebulö wa'olofo — ba hulö zowökhi tödö na mangifi ia ibadu nidanö, ba na tokea ia, ba serege tödö ia, ba lö mamalö-malö wa'otufo bakha lela — si manö dania soi andrö fefu, ha wa'ato ira, sanuwö hili Ziona andrö.

II. Fanegu famini tödö andrö ba khöra

9 Ya atöngö ami, ya ahöli-höli dödömi! Ya tobalu hörömi, ya lö mi'ila niha! No mabu ira, ba tenga si mabu agu; mangiwa ira, ba tenga ba zi mabu niha. 10 Me no ilau khömi Yehowa Geheha wemörö sabe'e, ba me no iduhö hörömi andrö, sama'ele'ö andrö, ba me no ibalugö högömi, sangi'ila andrö. 11 Ba fefu wama'ele'ö da'ö no mege, ba hulö daroma li, si so ba zura, si no mufotandro, khömi, na labe'e ba zangila mombaso sura ba na lamane khönia: Baso we! Ba imane: Tebai ubaso, me no mufotandro! 12 Ba na labe'e ba zi lö mangila mombaso sura zura andrö, ba na lamane khönia: Baso we! Ba imane: Lö u'ila ubaso zura! 13 Ba imane So'aya: Me lahatö'ö ira bawara niha andre ba me lafosumange ndra'o bewera ba me no aröu khögu dödöra ba me ha sambalö amakhoita niha, nitöngönira, wawangata'ufira Lowalangi. 14 andrö wa ba zahöli-höli dödö niha ufatörö soi andre, zamuza tö, ba zahöli-höli dödö ba ba zi lö larai mila, ena'ö taya wa'atua-tua andrö ba zatua-tuara, ba ena'ö tobini wa'onekhe ba zonekhera. 15 Alai zamorege famini'ö khö Yehowa tödöra, solau ba zagömi-gömi nilaura, sanguma'ö tödöra: Ha niha zanehe, ha niha zangila ya'aga? 16 Alai wa'atefuyu dödömi! Ma tola tefaomagö ira la'uri zamöbözi bowoa? Fa tola iŵa'ö niwöwoi ba khö zomböi ya'ia: Tenga niwöwöinia ndra'odo! ba ma fa tola iŵa'ö bowoa khö zamöbözi ya'ia: Lö i'ila watahögö hadia ia!

III. Famabu'u fa'ahakhö dödö dania

17 Hadia, tenga hatö ma'ifu tö, fa tobali kabu zinanö hili Libano, awö wa atua kabu zinanö, taŵa'ö. 18 Na luo da'ö, ba larongo safiso daroma li si so ba zura, ba i'ila niha hörö zau'a, moroi ba wa'atebalu, moroi ba zogömi-gömi. 19 Ba sebua famakao, ba ifuli omuso dödö ba khö Yehowa, ba fondrege zi numana ba niha, ba owua-wua dödö ba khö Ni'amoni'ö Ndraono Gizeraeli andrö. 20 Lö'ö sa'ae samakao dania, ba nihori zango'aya, ba dozi samakhai si lö atulö mege, ba no ahori, 21 samowöhö niha ba zi lö atulö, na so huhuo, solau fesu ba zolohe ba lala, ba mbawa göli, sangöhöndrögö si lö horö faya andrö. 22 Andrö imane Yehowa, sangorifi Aberahamo no, ba khö Yakobo: Lö'ö sa'ae te'ailasi dania Yakobo ba lö'ö sa'ae afusi mbawania. 23 Ba na i'ila dania — ma'uwunia andrö — nilau dangagu khönia, ba la'amoni'ö sa'ae döigu andrö; la'amoni'ö Ni'amoni'ö Yakobo andrö ba la'ata'ufi Lowalangi Ndraono Gizeraeli andrö. 24 Si no elungu tödö mege, ba lasöndra wa'aboto ba dödö, ba si fabalö mege, ba latöngöni wamahaö.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö