Wb/nia/Yesaya/14

I. Fa'ahono mbanua Lowalangi. Fanunö Ndraono Gizeraeli, me no te'ala razo Mbabeli andrö

1 Ihakhösi sa tödö ma'uwu Yakobo Yehowa ba ifuli ituyu Ndraono Gizeraeli, ifuli ifataro ira ba danöra. La'ondrasi dania ira niha bö'ö, möi awö ma'uwu Yakobo ira. 2 Lahalö ira niha baero, la'ohe ba nahara, ba ma'uwu Gizeraeli zokhö ya'ira (niha bö'ö andrö) ba danö Yehowa andrö, sawuyura, ira matua ba ira alawe. Tobali lara'u zondra'u ya'ira mege ba labe'e barö mbawara zamakao ya'ira mege. 3 Ba na no ahono ndra'ugö ibe'e Yehowa, na no döhö wamakao ba fa lö ahono-hono andrö ba fa'asawuyu sabe'e andrö, nihare'ö khöu mege, 4 awena dania manunö ndra'ugö, fango'aya razo Mbabeli andrö, ömane: "Ha lö ahono zamakao andrö, ha lö atebato wamakao andrö! 5 No ifatö Yehowa zi'o zebua horö, si'o zalaŵa andrö, 6 samözi-mözi soi niha ba wa'abao dödönia andrö, famözi si lö aetu, sanguhundragö niha baero ba wönunia, fanguhundra si lö fondrege. 7 Ahono danö ma'asagörö, molombase: ma'iki-iki ira. 8 He naru'u, ba omuso dödö, wamaigi ya'ugö andrö, ba eresi ba hili Libano, lamane: "Götö wa no te'ala ndra'ugö, ba lö si möi miyaŵa ba da'e khöma, ba wolobö ya'aga." 9 Banua tou, ba humufa ba khöu andrö, me so'ö; ikeani fönau mbekhu zi mate, fefu zamatörö mege ba guli danö; maoso moroi ba dadaomara, iŵa'ö, fefu razo soi niha andrö. 10 Ba dozi, ba latema, lamane khöu: "Hadia, ya'ugö göi zi no amono, si mane ya'aga; no fagölö-gölö ndra'ugö khöma? 11 No numalö ba mbanua tou andre wayaŵasamö andrö, fabaya li mbiola andrö khöu; bonga sa'ae dufou, ba kuökuö gambalamö. 12 Ha lö atoru ndra'ugö moroi yaŵa ba mbanua, ya'ugö madala sabölö haga! Ha lö mu'obö ndra'ugö, ya'ugö si hundragö soi niha mege!" 13 Ba noa sa'ae öŵa'ö tödöu: "Da'usaŵa mbanua si yaŵa; alaŵa yaŵa ndröfi andrö khö Lowalangi ube'e dadaomagu; ba hili walukhata andrö dumadao ndra'o, ba wondrege yöu. 14 Utalu'i lawuo si yaŵa, ufagölö-gölö ndra'o khö Wondrege Zalaŵa andrö!" 15 Ba tetimba ba mbanua tou ndra'ugö, ba wondrege zabakha kohokoho! 16 Sangila ya'ugö, ba lafaigi-faigi'ö, latöngöni ndra'ugö ba lamane: "Hadia, da'ö niha andrö, same'e manizi-nizi uli danö, samahisi amatöröŵa razo misa? 17 Hadia, ya'ia zamali'ö tanö si mate uli danö, sanudugö banua ba detenia, si lö mame'e mangawuli ba khöra nirabunia?" 18 Dozi razo soi niha andrö — ba a'oi molombase, si lö ambö sumange, oi dozi monahia. 19 Ba ya'ugö, ba nitibo'ö, hulö ndraha geu si lö ba dödö niha, no aröu lewatömö; nihawui nibunu ndra'ugö, fabaya nitaru'ö si'öli mege, no timba gamatela nihundrahundra. 20 Lö fao ndra'ugö ba zogamö lewatö kara tou, me no öfakiko danöu ba me no öbubunu mbanuamö; lö'ö sa'ae itörö li niha nga'ötö zebua horö andrö, götö-götö wa'ara. 21 Mifazökhi nahia, ba wanaba bagi nononia, börö horö ndra amara andrö, fa böi ebua ira, fa böi labe'e barö mbawara danö ba fa böi labe'e anönö danö adudula mbanua. 22 Ba utema maoso khöra, iŵa'ö Yehowa ngahönö, ba uhori ba Mbabeli döira ba hadia zi tosai ba ono ba ma'uwu, iŵa'ö Yehowa. 23 Ba tobali naha mbogo ube'e ba tobali baŵa nidanö, ba ubözini ezoe fangohori, iŵa'ö Yehowa ngahönö andrö.

II. Tödö Lowalangi ba Ndrawa Asiria

24 No fahölu Yehowa ngahönö andrö, no imane: Si ndruhu, itörö nihonogöigu tödögu ba alua niŵa'ögu! 25 Urasa Ndrawa Asiria ba danö khögu; ba hili khögu uhundragö tou ia, ena'ö aheta galo mbagi andrö khönia ba mbagira ba ena'ö abu'a ba galisira nora andrö khönia. 26 Da'ö nihonogöi, nifatörö ba guli danö ma'asagörö; da'ö danga andrö, si no mu'oro'ö yaŵa niha baero, fefu. 27 Yehowa ngahönö andrö sa zi hönogöi ya'ia, ba ha niha zi wu'ai? Na no i'oro'ö dangania, ba ha niha zamöda?

III. Fama'ele'ö huku si göna Ndrawa Wilisiti

28 Ba ndröfi wa'amate razo Ahasi, ba da'e niŵa'ö: 29 Böi omuso dödöu, ya'ugö tanö Ndrawa Wilisiti fefu, me no afatö nue andrö, bözi-bözi si tohare khöu mege; moroi ba gamatela gulö mege alua sa'ae dania daritö ba lua-lua da'ö, ba naga sihombo. 30 Ba si a'a zi numana, ba lasöndra gö, ba si lö töi ba falukha mörö lö hadia ia. Ba ŵa'amö andrö, ba ubunu fa'olofo, mate zi tosai khöu ibe'e. 31 Ege'ege, ya'ugö bawa göli! Ira'ira, ya'ugö banua! Anizi-nizi, ya'ugö tanö Ndrawa Wilisiti, ma'afefu! Moroi yöu sa'ae i'otarai simbo, ba lö si fabali ba zato khöra. 32 Ba hadia niŵa'ö, fanema li zinenge niha baero andrö? [Tamane]: Yehowa zanaru'ö banua Ziona andrö, ba ba da'ö lasöndra zaŵatö si numana mbanuania andrö.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö