Wb/nia/Yesaya/3

I. Fangotu'ö Yehowa banuania, si no fabali khönia, oföna zalaŵara

1 Hiza sa, iheta So'aya, Yehowa ngahönö, fefu ngawalö we'e-we'e ba Yeruzalema ba ba Ndraono Yuda; fefu we'e-we'e ba mbalazo ba fefu we'e-we'e ba nidanö. 2 Sabölö ba si möi fasuwö ba sanguhuku ba sama'ele'ö ba sangi'ila ba satua. 3 Kumandra ba si so töi ba anofula ba tuka ba sonekhe ba waetasa. 4 Ba ube'e salaŵara nono matua [iŵa'ö So'aya] ba iraono zamatörö ya'ira. 5 Ba famakao ba mbanua; oi zara fa'udu ira ba nawöra: afaito nono matua ba zatua ba si numana ba zalaŵa. 6 Na so zondra'u talifusönia, ono namania [wanguma'ö]: "Si so baru ndra'ugö, iagö salaŵama; ya so barö mbawau gadudula andre;" 7 ba imane dania na luo da'ö: "Te khögu wodalu-daluni sesokho; yomo khögu, ba lö balazo ba lö baru, — böi mibe'e salaŵa mbanua ndra'odo." 8 Sadudu sa Yeruzalema ba si tegaölö tou Ndraono Yuda, me si fa'udu khö Yehowa wehedera ba folaura, safökhö famaigi khönia hörönia, hörö zalaŵa. 9 Bawara zama'ele'ö ya'ira, ba lafarongogö horöra, lö labini'ö si mane banua Zodoma. Alai ira! Khöra lalau zi lö sökhi. 10 Miwa'ö ba zatulö tödö andrö, lö hadia ia! 11 La'a sa lua-lua wolaura andrö. Alai zebua horö andrö! itörö ia si lö sökhi; tesulöni sa khönia wolaunia andrö. 12 Alai mbanuagu andrö! Iraono zamakao ya'ira ba ira alawe zalaŵara. He ya'ami, banuagu! samaelungu zolohe ya'ami, ba no lafakuyu lala andrö, nitörömi ena'ö. 13 No so ba da'ö Yehowa, ba wamatunö huhuo; no maoso ia, ba wanguhuku soi niha. 14 I'ohe ba huku Yehowa zatua mbanuania, fabaya salaŵara: "Ya'ami sa si manga mbua ba kabu nagu andrö khögu! Baomo khömi so nirabu ba zi numana. 15 Hadia khömi da'ö, wa mifufu mbanuagu andrö, wa mirasa zi numana?" Da'ö niŵa'ö Zo'aya, Yehowa ngahönö andrö.

II. Fangotu'ö hokha ndra alawe, banua Yeruzalema

16 Ba imane na Yehowa: Me no mohokha nono Ziona alawe, me lafaöga mbagira, na latörö ba me lafakhölö ira, lö aila-aila, me hulö zanarinari manö, ba me lafariti naya ba gahe; 17 andrö batule galizuzu nono Ziona alawe ibe'e So'aya, ba iheta mbalu-balu zaila ira Yehowa. 18 Na luo da'ö, ba iheta Yehowa naya ba gahe, si sökhi sibai andrö, awö roto, 19 awö rai, awö walewale, awö göla, 20 awö zalendra andrö, awö mbala högö, awö ritiriti ba gahe, awö mböbö dalu, awö mbulibuli zamohua andrö, 21 awö hazima, awö laeduru, 22 awö naya ba nikhu, awö mbaru ba walöŵa, awö lembe, awö gabaya, 23 awö mbola, awö walu, awö muko si sökhi andrö, awö zalendra, awö mbalu-balu mbawa andrö. 24 Ba fangali zamohua andrö zaböu, ba fangali mböbö dalu si sökhi andrö zinali, ba fangali mbu nindrandra andrö wa'abatule, ba fangali gabaya sebua goni, ba fangali wa'asökhi mbawa laheto zakhozi. 25 Bawa zi'öli wamunu ndra matua khömi, ba sabölö khömi, ba ba wanuwö mate. 26 Ba mangarö-ngarö dania mbawa göli mbanua, ba abu dödö, ba dumadao ia ba danö, oi ahori fefu hadia ia.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö