Wb/nia/Yesaya/33

I. Fameta'u emali Ndraono Yuda; ihakhösi tödö Ndraono Yuda andrö Yehowa

1 Alai ndra'ugö dania, ya'ugö zanudugö banua ba si lö mududugö banua na! Ya'ugö si falimo, ba si lö'ö na mulimo! Na no awai khöu wanudugö banua, ba nidudugö göi mbanuau; na no a'ozu khöu walimosa andrö, ba lalimo göi ndra'ugö. 2 He Yehowa, hakhösi tödö ndra'aga! Khöu madöna-döna! Ena'ö na bagi mbulökhama ndra'ugö, ero mahemolu mbanua! Ba ena'ö na fangorifima ndra'ugö, na baŵa wamakao! 3 Ba wa'abölö we'ugu-ugu moloi soi niha, ba wa'ebuamö zumawili niha baero. 4 Ba mi'ozaragö zi toröi furi [gama-gama] nifangozaragö larewe; lafahulö si mane famahulö dolutolu. 5 Ba salaŵa Yehowa; ba zalaŵa yaŵa so nahania: fahöna huku si sökhi ba fa'atulö ba Ziona, ibe'e. 6 Götö wa'asökhi dania khömi, si lö hadia ia; fa'atua-tua ba fa'aboto ba dödö ba fangorifi, ba fahöna dania, ba amaedola girö-giröra wangata'ufi Yehowa. 7 Mangarö-ngarö tou zabölö; mege-ege sibai zinenge andrö, si no möi mangandrö fa'atulö. 8 Lö niha ba lala, molombase zikoli! No falimo ia ba wawu'usa li andrö; no ifakao mbanua, no lö ba dödönia niha. 9 Sabu tödö danö, aleu zinanö, saila hili Libano, mate yaŵa geu; salo'o ba Zarona andrö, ba no hulö danö si mate; atoru mbulu geu ba Mbazana ba ba hili Garemeli. 10 Ba imane Yehowa: Maoso sa'ae ndra'o, ufaosodo sa'ae, muzizio sa'ae ndra'odo. 11 Manabina ami du'u soköli ba mi'adonogö duhe wakhe; fabötusami andrö, ba no alitö, si manga-manga ya'ami. 12 Ba tetunu soi niha nifanunu betua, hulö za'a-sa'a mao ni'eŵa, nitunu ba galitö.

II. Ba ha satulö tödö zi falukha fanolo Yehowa. Fangorifi banua Ziona, sahöli-höli dödö zangila

13 Mifondrondrongo, ya'ami saröu, hadia nilaugu, ba ya aboto ba dödömi, ya'ami sahatö, wa'abölögu andrö! 14 Tokea zamazökhi horö andrö ba Ziona, ihawui zolau si lö sökhi fanizi-nizi. Lamane: "Ha niha khöda zangila so ba zinga galitö, si manga-manga hadia ia? Ha niha khöda si tola mangiagö ngai zi lö tebulö hola-hola?" 15 Sanörö lala satulö, ba solau si duhu, sangogorofi hare nisöndra ba wamakao niha bö'ö, sanuzu tödö femanga gana'a, sondruhö tögi dalingania, fa böi irongo na tefagölösi wange'e, samakifu hörönia, fa böi terou dödönia ba zi lö sökhi, na i'ila ena'ö. 16 Da'ö dania zonahia ba zalaŵa yaŵa; saŵatönia hati saro ba gara ba hili; tebe'e khönia mbalazonia ba lö ogo'ö gönia idanö. 17 I'ila dania razo andrö ba lakhöminia höröu; tanö sebolo misa i'ila. 18 I'angeragö dania mbaŵa wamakao andrö tödöu, ba ömane: "Hezo zangerai ana'a mege? hezo zanulo andrö? hezo zangerai malige mege?" 19 Niha safaito andrö, ba lö'ö sa'ae ö'ila, niha andrö solau li si lö ta'ila eluaha, si lö aboto ba dödöda, niha saelo lela, si lö tasöndra aekhula wehede. 20 Faigi Ziona andrö, banua gowasa khöda! I'ila höröu Yeruzalema andrö, nahia sahono ita, si lö hadia ia, ose, si lö tebulö, si lö tedeha tarutaru, irugi zi lö aetu, si lö aetu sinali fefu. 21 So sa ba da'ö zi so lakhömi Yehowa andrö, fangorifida, hulö na no tefasui ita idanö sebua, sabölö hohou ba si no ebolo, si lö owo nisola ba si lö owo sebua, sanörö. 22 Yehowa sa'ae zanguhuku ya'ita, Yehowa zamatörö ya'ita, Yehowa zalaŵada, ya'ia zangorifi ya'ita. 23 No alulu zinali khöu, no tenga fangabe'e döla loyo ba tenga famadölö loyo! Ba ba da'ö tefosasi nirabu, fahöna manö, irege zombuyu-mbuyu töla, ba lakhamö nirabu, si fahöna. 24 Ba samösa lö ba mbanua sanguma'ö: No gönado safökhö khögu. Niha si so ba da'ö, ba no si falukha fangefa horö.

Famotokhi ba gahe

Fabaliŵa lala

Olayama Yesaya: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö