Wb/nia/Yeremia/8

I. Tohu-tohu wameta'u Yeruzalema

1 Ba na luo da'ö — iŵa'ö Yehowa — ba lakhau döla razo mado Yuda andrö ba lewatö, ba töla zatuara ba töla gere ba töla zama'ele'ö ba töla nösi mbanua Yeruzalema andrö. 2 Ba labologö ba zino ba ba haga mbaŵa ba ba haga ngahönö andrö ba mbanua si yaŵa, somasi ira mege, nifosumangera, nigo'ögo'öra, nisofura li ba sangalulu ira: lö lafuli la'ozaragö ba lö lafuli lako'o, tobali fangatabö zinanö ba danö. 3 Ba omasi dania ira wa'amate, moroi ba wa'auri, dozi si tosai andrö, si lö ahori niha si lö sökhi andre, ba danö andrö fefu misa, ba nitibo'ögu ya'ira, iŵa'ö Yehowa ngahönö andrö.

II. Tebai döhö wökhöra andrö

4 Ba ömane sa'ae khöra: Da'ö niŵa'ö Yehowa: Hadia, alau maö niha, lö maoso? hadia, ta'erogö hadia ia, ba lö tafuli ta'otahögö? 5 Ba hana wa la'erogö Yeruzalema niha andrö, si lö tebulö fa'erosa: Hana wa lö laböhöli waya, hana wa te khöra wamuli ya'ira? 6 No ufondrondrongo ba no terongo khögu: faya lalau, samösa lö sangesa todö ba walösökhinia andrö, fa iŵa'ö: Hadia nilaugu? Oi dozi la'erogö, la'osisi lalara, si mane kudo, sondrölö ya'ia ba zi fasöndra niha. 7 He sumbila ba dalu mbanua, ba i'ila mbaŵania, ba buru'u ba katawaena ba tumbao, ba lö latalu'i mbaŵa wangawulira, ba banuagu andrö, ba lö la'ila gamakhoita Yehowa andrö. 8 Hadia wa tola miŵa'ö: Satua-tua ita ba so khöda goroisa Yehowa? Ya'ia! ba no ibali'ö faya fanura waya andrö ba danga zanura. 9 Saila zatua-tua andrö, si tobali tödö ba nira'u; hiza, taroma li Yehowa andrö, ba no la'ositengagö, ba hadia wa'atua-tua si so khöra? 10 Andrö ululu ba niha bö'ö ndrongara, ba niha bö'ö dania zokhö benuara; i'otarai sa'ae ndraono, numalö ba zatua, ba oi sangalui hare, ba he sama'ele'ö ba he ere, ba oi dozi solau faya ba falimosa. 11 Ba lafayaigö wamadöhö fökhö mbanuagu andrö, wanguma'ö: Fangorifi! fangorifi! ba lö'ö sa fangorifi. 12 Saila ira ena'ö, me no lalau zogoro ita, ba lö'ö sa aila ira, lö'ö sa'ae la'ila hadia wa'aila. Andrö tegaölö tou ira dania, awö zalau andrö; na baŵa wamatörö huku khöra, ba tetaru mbagi iŵa'ö Yehowa. 13 Ufarahugö, uhori ira — iŵa'ö Yehowa — Lö bua ba nagu ba ba marafala, no aleu mbulu; noa sa uhonogöi zi manga ya'ia.

III. Itörö huku, lö mudöna-döna

14 Hadia wa dumao-dao manö ita? Mitabu fefu, datasaŵa mbanua saro andrö, ena'ö ba da'ö mate ita. Ibe'e sa'ae tekiko ita Lowalangida Yehowa, ifabadugö khöda langu, me no tafazökhi horö khö Yehowa! 15 Tadöna-döna wangorifi, ba lö hadia ia zi sökhi; tadöna-döna mbaŵa wamadöhö fökhö, ba hiza wa'atobali dödö! 16 Moroi ba Dano terongo wehöfu kudo, humeu danö ma'asambua, ba wa'abölö wedele kudo si matua, ba so ira ba la'a danö, fabaya ösinia ba banua, fabaya niha bakha. 17 Hiza sa, ufa'aso khömi gulö, sita, si lö fanaka, ena'ö lara'u ami, iŵa'ö Yehowa.

IV. Fa'abu dödö Yeremia

18 Heza usöndra wa'omuso dödö, ba wa'abu dödö andre! No mofökhö sibai bakha dödögu! 19 Hiza, ebua li we'ao mbanuada andrö, moroi ba danö saröu, lamane: "Hadia, lö'ö sa Yehowa ba Ziona? Hadia, lö ba khöra razora? — Hana wa no la'andrö wönugu, ba geu nifobawa andrö khöra, ba nadu niha bö'ö! 20 No awai wamasi, no ahori mu'ozaragö mbua geu, ba ya'ita, ba lö nisöndrada fangorifi! 21 Me no arasa mbanuada andrö, ba no arasa göi dödögu: Sabu tödö ndra'odo, no tobali dödögu. 22 Hadia, lö dalu-dalu sa'ae ba Gileadi ba lö'ö sa'ae sodalu-daluni fökhö? Hana sa, wa lö lafalemba dalu-dalu ba mbanuada andrö?

Famotokhi ba gahe

Fabaliŵa lala

Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö