Wb/nia/Yeremia/10

I. Famangelama ba waya andrö, famosumange adu. Fanuno Lowalangi sauri

1 Mifondrondrongo li Yehowa andrö, fehedenia khömi, ya'ami ma'uwu Gizeraeli! 2 Imane Yehowa: Böi mifamaha ami ba huku niha baero andrö ba böi tokea ami ba dandra andrö ba mbanua si yaŵa, me si tokea niha baero ba khönia! 3 Faya, sa nifakhoi niha baero andrö, eu, ni'eŵa ba gatua, nifazökhi danga duka, nifofoe. 4 Lafo'aya firö ba ana'a, labözi gosö'osö, fa böi mangiŵa. 5 Hulö si mane tabotabo wofo ba naha zinanö, ba si lö hede, ni'ohe'ohe, me tebai mowaö-waö: böi mi'ata'ufi ia, tebai sa ifakiko niha ba tebai göi ifa'ema wangorifi. 6 Lö'ö sa si fagölö-gölö khöu, ya'ugö Yehowa, salaŵa ndra'ugö ba no ebua döimö andrö ba wa'abölö andrö. 7 Ha niha zi lö mangata'ufi ya'ugö ena'ö, ya'ugö razo soi niha? Si nangea khöu da'ö, me lö ba zatua-tua fefu ba niha misa ba ba mbanuara fefu si fagölö-gölö khöu! 8 Dozi ira sa, ba no sambö era-era ba sowöhö mowa: famahaö andrö ba nadu — ba no eu. 9 Firö niböbözi, nihalö ba Darisi ba ana'a moroi ba Gufa, nifazökhi duka ba tanga zamahele ya'ia; ungu sowu waruwaru ba ungu soyo mbaru, nifazökhi zonekhe, ma'afefu. 10 Ba no Lowalangi si ndruhu-ndruhu Yehowa, Lowalangi sauri ia ba razo si lö tebulö; ba wönunia humisi danö, ba fa'abao dödönia, ba si tebai lataha soi niha. 11 Ba mimane khöra: Lowalangi andrö, si no tenga samazökhi banua si yaŵa ba tanö tou, ba si taya dania ba guli danö ba barö mbanua si yaŵa. 12 Ya'ia, samazökhi tanö ba wa'atua-tuania andrö ba samologö banua si yaŵa ba wa'aboto ba dödönia. 13 Na terongo linia banua andrö, ba mogoso-goso deu, ba i'ohe miyaŵa lawuo moroi ba gahe mbanua, i'asogö gari mbanua, lala deu, ba ifolala nangi moroi ba zi fahöna ia. 14 Dozi atöngö, ba tebai aboto ba dödö; dozi tuka gana'a, ba saila, ba wamaedo andrö, me no falimosa nifahele andrö ba me si lö noso. 15 Faya ia, nifazökhi fango'aya; na baŵa wamatörö huku, ba tekiko. 16 Ba tenga si fagölö-gölö ba da'ö dana khö ma'uwu Yakobo andrö, no samazökhi tanö'a ia, ba soi tana khönia Ndraono Gizeraeli, Yehowa ngahönö döinia.

II. Göna famakiko mado Yuda. Fangandrö Yeremia

17 Tuyu gama-gamau ba danö, [ya'ugö ono Ziona] nifasui nemali! 18 Imane sa Yehowa: Hiza, ufazaumba niha ba danö si samuza andre, tosasa ube'e, ena'ö la'ila [ndra'odo]. 19 Alai ndra'o ba zokhogu andre! Tebai döhö zi gönado andrö. Ba no umane dödögu: Na ha da'ö wamakaogu, ba utaha! 20 No adudu nosegu, no ahori aetu zinalinia, no aheta khögu nonogu matua, lö ya'ira sa'ae; lö sangazökhi osegu andrö, lö samologö mukonia. 21 Sambö tödö sa'ae gubalo andrö, ba lö nisofura Yehowa, andrö lö fozu khöra ba no muzaewe guriföra fefu. 22 Mifondrondrongo! muhöngö — so sa'ae moroi sa, ruru sebua moroi yöu, ba wamali'ö adudula banua mado Yuda andrö, ena'ö tobali naha nasu ana'a! 23 U'ila, ya'ugö Yehowa, wa tebai ihuku lalania niha, awö wa tebai ifanandrösa mbekania niha sanörö lala. 24 Otu'ö ndra'odo, Yehowa, ba faigi ndrohu-ndrohu, böi be'e dali wönumö, ba böi afufu ndra'o öbe'e! 25 Ba niha baero andrö lau wönumö, ba zi lö mangila ya'ugö, ba niha si lö mangaröfi li töimö, me no lahori ma'uwu Yakobo, me no lafufu ba me no labali'ö tanö si mate mbenuara.

Famotokhi ba gahe

Fabaliŵa lala

Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö