Wb/nia/Yeremia/13
I. Böbö talu ba migö, ba wamadomaisi fangoloi'ö Iraono Gizeraeli[edit | edit source]
1 Imane khögu Yehowa: Ae öli khöu mböbö talu muko, ba amöbö talu, ba böi basöi idanö. 2 Ba u'öli mböbö talu andrö, u'o'ö niŵa'ö Yehowa khögu; ba u'amöbö talu. 3 Ba ifuli muhede khögu Yehowa imane: 4 Halö mböbö talu andrö ba löwi-löwiu, ni'öliu andrö, ba ae ba Oifarati ba bini'ö ia ba da'ö ba dögi gara. 5 Ba möido mubini'ö ia ba mbewe Oifarati, si mane niŵa'ö Yehowa khögu. 6 Ba ara ma'ifu, ba imane khögu Yehowa: Ae ba Oifarati ba halö ba da'ö mböbö talu andrö, niŵa'ögu khöu nibini'ö ba da'ö. 7 Ba möido ba Oifarati, u'alui, ukharu ba uhalö mböbö talu andrö ba nahania andrö, ba nibini'ögu ya'ia, ba hiza, no obou mböbö talu andrö, lö gunania sa'ae. 8 Ba humede khögu Yehowa, imane: Da'e niŵa'ö Yehowa: 9 Si manö dania wamakikogu fayaŵasa mado Yuda andrö ba fayaŵasa mbanua Yeruzalema, si no ebua sibai. 10 Niha si lö sökhi andrö, si lö edöna mamondrongo ligu, si no abe'e tandro, wanörö nikhoi dödöra, wolo'ö ba Lowalangi bö'ö, ba wamosumange ba ba wangalulu khöra, — ba hulö si mane böbö talu andrö, si lö guna sa'ae dania ira.[1] 11 Hulö si mane böbö talu sa'ae, si fatöfa ba löwi-löwi niha, si manö wamatöfagu khögu ma'uwu Gizeraeli fefu ba ma'uwu Yuda fefu — iŵa'ö Yehowa — ena'ö banuagu ba fangebua duriagu ba fanuno ya'odo ba lakhömigu ira, ba lö lafondrondrongo khögu. 12 Ba ömane sa'ae khöra: Da'ö niŵa'ö Yehowa, Lowalangi Ndraono Gizeraeli: Fefu migö, ba tefo'ösi agu! Ba na lamane dania khöu: Hadia, lö ma'ila wa tefo'ösi agu migö fefu? 13 Ba ömane khöra: Imane Yehowa: Hiza, ufo'ösi femabu fefu niha ba danö andre, awö razo andrö, ma'uwu Dawido, sidadao ba dadaomania andrö, ba ere andrö ba sama'ele'ö ba dozi banua Yeruzalema andrö.[2] 14 Ba faoma urasa ira ba nawöra, he ama ba he ono matua, nifarahugö, iŵa'ö Yehowa; lö alimagö ba lö afökhö khögu ba lö ahakhö dödögu, fa lö ufakiko ira ena'ö. 15 Mifondrondrongo ba mitöngöni! Böi fayaŵa ami, me no Yehowa zihede! 16 Mifosumange Lowalangimi Yehowa, fatua lö ogömi-gömi na, fatua lö manendre gahemi ba hili si no ogömi-gömi! Ba da'ö mibazebaze'ö sa dania haga, ba fa'ogömi-gömi sabölö ibe'e, si lö oroma turu.[3] 17 Ba na lö mifondrondrongo, ba me'e ndra'o ba zi lö oroma ndra'odo, ba wayaŵasa andrö, ya böi döhö wenguwengu, ya mangele daŵa hörögu, me ni'oloi'ö zanuwö rorogöfö Yehowa andrö.[4]
II. Fanegu razo ba inania andrö, ba horöra andrö[edit | edit source]
18 Omane khö razo ba khö zamatörö andrö, ira alawe: Mi'ae tou, tanö tou sibai mi'iagö, me no ahele ba högömi naya ba högö, saembu si sökhi sibai andrö![5] 19 No laduhö mbawa göli mbanua raya ba lö samokai sa'ae; te'oloi'ö mado Yuda fefu, ahori te'oloi'ö! 20 Mifaöga hörömi ba mifaigi zi otarai moroi yöu andrö! Heza so nikubaloi andrö, nibe'e rorogöföu, rorogöfö si sökhi sibai andrö? 21 Hadia öŵa'ö, na ifataro salaŵamö zi fahuwu khöu andrö, nifamahau khöu? Hadia, lö ira'u ndra'ugö fa'afökhö hulu, si mane ba zadono? 22 Ba na ömane ena'ö dödöu: Hadia wa gönado si mane da'ö? — Ba wa'afahöna gölalöŵamö tefahoi gahe lembeu ba tefakao mbörö sisiu![6] 23 Hadia, i'ila i'afusiö nösinia Dawa saitö ba i'ila iheta la'ala'ania harimo? awena dania mi'ila milau zi zökhi, ya'ami si no to'ölö wolau si lö sökhi. 24 Ba ufazawili sa'ae ira, si mane dami wakhe, ni'oloi'ö nangi moroi ba danö si mate! 25 Da'ö dania dana khöu, urakhau, nihukugu khöu — iŵa'ö Yehowa —, me no olifu'ö ndra'odo ba me no abe'e dödöu ba waya. 26 Ba ufahoi göi gahe lembeu ba gangango mbisiu, ena'ö oroma zaila'ö![7] 27 Fohorömö andrö ba fedeleu, fohorömö salakha andrö, — ba hili-hili andrö ba ba mbolo mbenua, ba no u'ila zalakha andrö khöu! Alai ndra'o ndra'ugö, Yeruzalema, tebai aheta khöu — ha wa'ara na dania![8]
Famotokhi ba gahe[edit | edit source]
Fabaliŵa lala[edit source]
Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö