Wb/nia/Yeremia/18

I. Amaedola: Samöbözi bowoa

1 Fehede Yehowa khö Yeremia; imane: 2 Faoso, ae mitou ba nomo zamöbözi bowoa, ba da'ö dania so niŵa'ögu khöu. 3 Ba möido mitou ba nomo duka mbowoa, ba mohalö-halöŵö ia fönagu ba dandrösa. 4 Ba lö sökhi mbowoa andrö, niböbözinia, la'uri andrö ba danga zamöbözi. Ba ifuli ibali'ö bowoa si bohou, dali zi so ba dödö zamöbözi, wamazökhi ya'ia. 5 Ba humede khögu Yehowa, 6 imane: Hadia, lö u'ila ulau khömi nilau zamöbözi bowoa andrö, ya'ami mauwu Gizeraeli? — iŵa'ö Yehowa. Hiza, amaedola la'uri ba danga duka mbowoa ami ba dangagu, ya'ami ma'uwu Gizeraeli. 7 So, ba ufeta'u soi niha, öri heza, uhori, ududugö ba ufakiko. 8 Ba na laröi zi lö sökhi niha andrö, nifeta'ugu, ba mangesa dödögu, ba wamakao andrö, niŵa'ögu, nifatörö khöra. 9 Ba so, ba ufabu'u ba soi niha, ba ma ba nöri heza, u'azökhi ba utanö; 10 ba na latörö zi lö omasido, na lö la'o'ö goroisagu, ba mangesa göi dödögu, ba zi sökhi andrö, niŵa'ögu, nifatörö khöra. 11 Ba iya'e, ba ömane ba mado Yuda ba ba mbanua Yeruzalema andrö: Da'ö niŵa'ö Yehowa: Hiza, uwöwöi wamakao ya'ami, ikhoi tödögu nilau khömi! Mifuli ami, yamuröi lala si lö sökhi andrö khönia zamösana; mi'alui wanörö lala si sökhi ba bua-bua si sökhi! 12 Ba lamane dania: Zaya-zaya gölö! Era-erama sa'ae mafalua ba i'abe'e'ö dandronia zamösana, wolo'ö nikhoi dödönia si lö sökhi andrö.

II. Fameta'u: Tefatörö wanguhuku dania

13 Andrö wa no imane Yehowa: Mitandraigö misofu ba niha baero, na so zirai mamondrongo si mane da'ö. Si hokha mbuda sa'ae nilau nono alawe andrö, Iraono Gizeraeli! 14 Hadia, aheta maö ba dete gara ba hili deu si baku andrö, ba hili Libano? hadia, aetu mbombo si so umbu, sigoso-goso, sahele miyöu? 15 Ba banuagu andrö, ba no olifu ira ndra'odo; ba waya latunu gumöyö, ba no alau ira ibe'e, ba lalara andrö, töröŵa ba götö föna andrö, ba wanörö lala si lö muhaogö. 16 Tobali labali'ö sihokha mbuda danöra, labali'ö ni'o'aya, si lö mamalö-malö; sanörö, ba humokha mbu ba ifalikhö ia. 17 Amaedola nifazawili nangi moroi ba gatumbukha ufazaewe ira föna nemalira andrö: u'erogö ira, lö u'otahögö, na baŵa tekiko ira.

III. Lafagönaisi Yeremia. Fangandrönia, ba zi fa'udu andrö

18 Ba lamane: Talabu, te'alui wamagönaisi Yeremia andrö; lö'ö sa si taya huku, ba gere ba he famobawa lala, ba zatua-tua ba he huhuo, ba zama'ele'ö andrö. Talabu, tabunu ia lelada ba böi tafondrondrongo niŵa'önia, zambalö! 19 Faigi-faigido, ya'ugö Yehowa, ba fondrongondrongo huhuo zi fa'udu khögu andrö! 20 Hadia, sulö zi sökhi zi lö sökhi, wa no lakharu lösu-lösu khögu? Törö tödöu, wangondrasigu ya'ugö, ba wangandrö, salahira, ba wangalösi fönumö khöra! 21 Ba lulu sa'ae nonora ba wa'olofo, ba tou'ö ira ba mbawa zi'öli, ena'ö si lö ono ndra alawe khöra ba si lö ira matua sa'ae, ena'ö mate ba deu mbanua ndra matua khöra, ba ono matua, ba ena'ö ni'ö'ötö si'öli ba wasöndrata! 22 Ena'ö terongo we'ira-ira yomo khöra, na i'ogomuzaö öfatörö khöra nemali: noa sa lakharu lösu-lösu, ba wama'ala ya'odo ba no lalau wesu gahegu. 23 Ba ya'ugö Yehowa, ba no ahori ö'ila nifakhaira khögu, ba wamunu ya'odo: böi zi lö tesulöni lalöra andrö ba böi tebunu horöra fönau; ya tegaölö tou ira fönau; na baŵa tesao wönumö lau khöra!

Famotokhi ba gahe

Fabaliŵa lala

Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö