Wb/nia/Yeremia/20

I. Ibe'e ba galo Yeremia Fasuri andrö. Ifa'ele'ö Yeremia zi göna Wasuri dania

1 Ba me irongo Fasuri, ono Gimeri, satua zanaro ba gosali Yehowa, ifa'ema daroma li andrö Yeremia, 2 ba itema ibözi Yeremia Fasuri ba ibe'e ba galo, ba mbawandruhö mado Mbeniyami tanö yaŵa, ba gosali Yehowa. 3 Ba mahemolu ö, ba zanguhulö wongi, me no i'efa'ö Yeremia ba galo Fasuri, ba imane khönia Yeremia: Tenga sa'ae Fasuri ibe'e töimö Yehowa, Magori-Misabibi (Ameta'uö fasui) ibe'e töimö. 4 Imane sa Yehowa: Hiza, ubali'ö ameta'uö ndra'ugö, khöu ba ba nawöu fefu; mate dania ira ba mbawa zi'öli nemalira, ba zanehe ndra'ugö, ba mado Yuda ma'afefu, ba ube'e ba danga razo Mbabeli, ena'ö i'oloi'ö ba Mbabeli ba ena'ö ibunu si'öli. 5 Ba fefu nihöna ba mbanua andre, awö nibaya-bayara fefu, awö gana'ara fefu, ba ululu; fabaya girö-girö razo mado Yuda, ba ube'e ba danga nemalira, akha larabu ba akha la'oloi'ö ba Mbabeli. 6 Ba ya'ugö fasuri ba si so yomo khöu fefu, ba ni'oloi'ö ami ba ba Mbabeli örugi, ba da'ö lako'o ndra'ugö, — ya'ugö ba awöu andrö fefu, ba ni'ombakha'öu faya.

II. Fangarö-ngarö Yeremia, ba zamakao ya'ia. Fanötönania khö Yehowa

7 No öfowöhö ndra'o, ya'ugö Yehowa, ba no ube'e nifowöhö ndra'odo; no öra'udo ba no ölaŵa ndra'o. No tobali fama'iki niha ndra'odo, si lö mamalö-malö, dozi la'o'aya ndra'o. 8 Ero muhededo, ba mangarongarödo ba mu'aodo: "Famakao ba famalangögö!" Noa sa tobali börö wama'iki khögu daroma li Yehowa ba börö wango'aya ya'odo, ma'öma'ökhö. 9 Ba umane: Akha lö'ö sa'ae ufa'ema niŵa'önia, ba tobali hulö galitö sihola-hola ba dödögu bakha, si no te'u'u ba nösigu; u'eregesi dödögu wanaögö ya'ia, ba tebai. 10 No ato nirongogu fehede zafökhö tödö — ameta'uö fasui —, lamane: "Ni'ombakha'ö ia!" ba "Data'ombakha'ö ia!" Dozi sa ba zi fahuwu ndra'o, ba ladarodarogö ndra'odo, ma atö molalö ndra'o, lamane: "Ma ibe'e nifowöhö ia, ena'ö talaŵa ia ba talau mbalöda khönia." 11 Ba i'oawögö ndra'o Yehowa, amaedola zabölö sibai, ba salau dania zolohi ya'odo ba si tebai, tobali fondrege zi lö boto, me no tenga folau zatua-tua wolaura — tobali fa'aila si lö aetu, si lö taya ba dödö niha. 12 Ba ya'ugö Yehowa ngahönö, sanandraigö satulö tödö, sangila bua ba tödö: oroma'ö khögu wolau balöu khöra; noa sa ube'e noro dödöu huhuogu andrö. 13 Mi'anunö khö Yehowa, misuno Yehowa, me no sangefa'ö noso zi numana ba danga zolau si lö sökhi!

III. I'elifi mbawa wa'atumbunia

14 Ni'elifi mbaŵa si tumbu ndra'o; baŵa andrö ba ni'adonogö ninagu ya'odo, ba böi tefahowu'ö! 15 Ni'elifi niha andrö sangombakha khö namagu turia somuso dödö andrö, wanguma'ö: No tumbu khöu nono matua! same'e omuso sibai dödönia! 16 Ya tefatörö ba niha andrö nifatörö ba mbanua andrö, nifaulugö Yehowa fanudugö, lö fa'ahakhö dödö, ba yamurongo wege-ege na mahemolu mbanua ba fe'ao-ao ba wanuwö na laluo! 17 Me lö nibununia ya'odo ba dalu ninagu, ena'ö tobali lewatögu ninagu ba ena'ö lö'ö manö tebulö dabinania! 18 Hana sa wa böla ndra'o moroi ba dalu ninagu, ba wangila famakao ba fa'abu dödö ba ba wa lö mamalö-malö wa'aila, sagötö ya'odo!

Famotokhi ba gahe

Fabaliŵa lala

Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö