Wb/nia/Yeremia/25

Add links
From Wikimedia Incubator
< Wb‎ | nia‎ | Yeremia
Wb > nia > Yeremia > 25

I. Tefa'ele'ö wa fitu ngafulu fakhe lataha ira ba Mbabeli[edit | edit source]

1 Taroma li niŵa'ö khö Yeremia ba mado Yuda fefu, me no alua medölu fakhe razo Yoyaki andrö, ono Yosia, razo mado Yuda — döfi si föföna da'ö khö Nebukanesa andrö, razo Mbabeli. 2 Nifa'ema Yeremia ba mado Yuda fefu ba ba mbanua Yeruzalema fefu, imane: 3 I'otarai me alua mewelendrua fakhe razo Yosia, ono Gamoni, razo mado Yuda, ba irege ma'ökhö andre — no dua wulu a tölu fakhe sa'ae — wa no humede-hede khögu Yehowa, awö wa lö satagedo fangombakha khömi —, ba lö nifondrondrongomi.[1] 4 Ba lö sadagedage Yehowa famatenge khömi enoninia fefu, sama'ele'ö andrö, ba lö nifondrondrongomi, lö nibe'emi börö dalingami, ba wamondrongo ena'ö.[2] 5 No mamane: "Mifuli ami! Yamuröi lalania si lö sökhi andrö zamösana, miböhöli mbua-buami andrö, si lö sökhi, ba si lö tebulö ba danö ami, ba danö nibe'e Yehowa khömi ba khö ndra tuami mege, si no götö-götö fa'ara.[3] 6 Ba böi mifahulö Lowalangi bö'ö, ba wamosumange ya'ira ba ba wangalulu khöra, böi mi'andrö wönugu nilau dangami andrö, fa böi ufatörö wamakiko khömi!" 7 Ba lö'ö zui mifondrondrongo khögu — iŵa'ö Yehowa — ba wangandrö fönugu nilau dangami andrö, famakikomi. 8 Andrö imane Yehowa ngahönö adrö: Me lö nifondrondrongomi taroma ligu, 9 ba ufakaoni'ö fefu soi moroi yöu — iŵa'ö Yehowa — ba enonigu andrö, Nebukanesa, razo Mbabeli, ba lahawui danö andre ube'e, awö niha ba danö, awö soi bö'ö andrö fefu si tefasui ya'ira, ba ube'e nifakiko, ube'e börö wehokha mbu ba börö wa'iki ba börö wango'aya si lö mamalö-malö.[4] 10 Ba ubunu ba khöra li wa'owua-wua dödö ba li wa'omuso dödö, li zangowawalu ba li nono nihalö ba koko halu ba haga wandru.[5] 11 Ba tanö da'e ma'afefu, ba nibali'ö sasai'ö, nibali'ö tanö si mate, ba soi andre, ba sawuyu razo Mbabeli, fitu ngafulu fakhe wa'ara.

II. Tehuku dania Ndrawa Galedaia[edit | edit source]

12 Ba na no alua zi fitu ngafulu fakhe, ba usulöni khö razo Mbabeli ba ba soi niha andrö golalöŵara andrö — iŵa'ö Yehowa — ba ba danö Ndrawa Galedaia andrö; ba ubali'ö tanö si mate, si lö mamalö-malö.[6] 13 Ba itörö ba danö andrö ligu fefu, niŵa'ögu, ube'e — fefu nisura ba zura andre, nifa'ele'ö Yeremia, ba soi niha andrö fefu. 14 Ya'ira sa'ae dania göi, ba ni'osawuyu soi sabölö ba ni'osawuyu razo sebua, ba usulöni khöra nifazökhira, nilau dangara andrö.[7]

III. Tefabadugö zalimbuanö ira ba niha baero fefu[edit | edit source]

15 Noa sa imane khögu Yehowa Lowalangi Ndraono Gizeraeli: Tema zi samba mako agu andre ba dangagu, agu fönu, ba fabadugö ba soi niha andrö fefu, ba nifatengegu ya'ugö.[8] 16 Ena'ö labadu ba ena'ö mabo, ena'ö owöhö ira, ba zi'öli andrö, nifatörögu khöra.[9] 17 Ba uhalö mako andrö ba danga Yehowa, ba ufabadugö ba soi niha andrö fefu, ba nifatenge Yehowa ya'odo. 18 Ba Yeruzalema ba ba mbanua mado Yuda, ba razora ba ba zatuara, ba wamali'ö tanö si mate tanöra, ena'ö börö wehokha mbu ba börö wa'iki ba börö wangelifi, si mane ma'ökhö andre. 19 Fara'o andrö, razo Miserayi, fabaya enoninia ba kumandrunia ba banuania fefu,[10] 20 ba Erebi andrö, ma'afefu, numalö fefu razo ba danö Usi ba fefu razo ba danö Wilisiti, ya'ia Gasikalo ba Gasa ba Ekerona ba si tosai Gasoto;[11] 21 Iraono Gedomo ba Iraono Moabi ba Iraono Gamoni;[12] 22 numalö fefu razo Diro ba fefu razo Zidona ba razo ba hulo ba nasi.[13] 23 Ba Dedano ba Tema ba Busi ba nifalo'o bu andrö, fefu.[14] 24 Ba dozi razo Ndrawa Ara ba dozi razo Gerebi andrö, ba danö si mate. 25 Numalö dozi razo Zimeri ba dozi razo Gelama ba dozi razo Ndrawa Media,[15] 26 awö razo yöu, fefu, si fahatö ba si fandröundröu, — fefu gamatöröŵa razo ba guli danö; ba afuriata, ba mamadu razo Zezakhi (Babeli)![16] 27 Ba ömane khöra: Da'ö niŵa'ö Yehowa ngahönö andrö, Lowalangi Ndraono Gizeraeli: Mibadu, ena'ö mabu ami, ena'ö muta ba ena'ö tegaölö tou ami, si lö femaoso, ba zi'öli andrö, nifatörögu khömi! 28 Ba ma lö edöna ira, latema mako andrö ba dangau, ba wamadu, ba ömane khöra: Da'ö niŵa'ö Yehowa ngahönö andrö: Lö tola lö mamadu ami! 29 Hiza sa, ba mbanua andrö, si no fao ba döi töigu, ubörötaigö wamatörö famakiko, ba hadia, saefa ami? Tenga saefa ami, ukaoni sa'ae zi'öli, nifatörö ba niha ba guli danö fefu! — iŵa'ö Yehowa ngahönö —.[17] 30 Ba öfa'ema khöra daroma li da'e fefu, ömane khöra: Mundröndröndröndrö dania Yehowa, moroi ba mbanua si yaŵa, ba moroi ba nahiania andrö, ni'amoni'ö ifarongogö linia! Ebua linia wendröndröndröndrö ba mbenua andrö khönia, ikaraini wa'iki, si mane si hundragö folazi, ba niha ba guli danö, fefu.[18] 31 Humöngö, irugi ba wondrege danö; fasoso sa'ae Yehowa ba soi niha; ifatörö huku ba nösi guli danö fefu; sebua horö andrö, ba ilulu ba mbawa zi'öli! — iŵa'ö Yehowa.

IV. Tefatörö khöra huku[edit | edit source]

32 Imane Yehowa ngahönö andrö: Hiza wamakiko, itöröi soi niha, tesao nangi sabölö, moroi ba wondrege danö. 33 Ba so tou ba danö dania nibubunu Yehowa, na luo da'ö, i'otarai wondrege danö, numalö ba wondrege tanö sa; lö'ö sa la'e'esi ba lö la'ozaragö ba wogo'o: tobali fangatabö zinanö ba nowi.[19] 34 Mi'ege-ege, ya'ami kubalo, milau mu'ira-ira, mifagaölö ami ba danö, ya'ami satua nikubaloi; noa sa irugi baŵa khömi, ba wanaba ya'ami, ba ba ŵa wamazawili ya'ami, ba tobali aekhu tou ami, si mane figa sebua böli![20] 35 Lö'ö sa'ae saŵatö gubalo ba lö lala woloi ba zalaŵa nikubaloi, 36 Mifondrondrongo! — fe'ira-ira gubalo ba fege-ege zalaŵa nikubaloi andrö, me ibali'ö tanö si mate naha göra Yehowa, 37 ba benua si lö hadia ia mege, ba nifufu ba wa'aukhu wönu Yehowa andrö! 38 No iröi ndru'u andrö khönia (mbini-mbini), si mane singo; tanö si mate sa'ae danöra, ba zi'öli andrö, sabölö sibai ba ba wa'aukhu wönunia andrö.

Famotokhi ba gahe[edit | edit source]

  1. ↑ Faigi 29:19; 35:14
  2. ↑ Faigi 7:25
  3. ↑ RazII 17:13; Faigi 18:11
  4. ↑ Faigi 1:15
  5. ↑ Yes 24:8; Fam 18:22
  6. ↑ Nga'ötII 36:21; Dan 9:2
  7. ↑ Faigi 27:7
  8. ↑ Yob 21:20
  9. ↑ Yes 51:17; Sin 60:5; 75:9; Yob 21:20
  10. ↑ Faigi 46:2
  11. ↑ Faigi 47:1
  12. ↑ Faigi 49:7; 48:1; 49:1
  13. ↑ Yes 23:8; Faigi 47:4
  14. ↑ Faigi 9:26
  15. ↑ Faigi 49:34
  16. ↑ Yer 51:41
  17. ↑ Faigi 49:12; FetI 4:17
  18. ↑ Yoel 3:16; Amos 1:2
  19. ↑ Faigi 16:4
  20. ↑ Faigi 4:8; 6:26

Fabaliŵa lala[edit source]

Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yeremia/25&oldid=6272422"