Wb/nia/Yeremia/27
I. Amaedola: Fesu ba kalo mbagi, nifa'ohe'ö Yeremia ba razo ba ngaira[edit | edit source]
1 Ba me awena razo Zedekia andrö, ono Yosia, razo mado Yuda, ba humede Yehowa khö Yeremia. 2 Imane [Yeremia]: Imane khögu Yehowa: Fazökhi khöu wesu ba kalo magi, ba be'e ba mbagiu,[1] 3 ba fa'ohe'ö khö razo Ndraono Gedomo ba khö razo Ndraono Moabi ba khö razo Ndraono Gamoni ba khö razo Diro ba khö razo Zidona, fa'ohe'ö ba zinenge andrö, si no möi khö Zedekia, razo mado Yuda, ba Yeruzalema. 4 Ba oroi'ö khöra, ndramane ba razora: Da'ö niŵa'ö Yehowa ngahönö andrö, Lowalangi Ndraono Gizeraeli: Mimane ba razomi: 5 Ya'odo zomböi tanö, awö niha, awö gurifö niha, ba guli danö ba wa'abölögu andrö, si lö ambö ba tangagu ni'oro'ö, ba ube'e ba zomasido.[2] 6 Ba iya'e, ba ube'e barö mbawa genonigu Nebukanesa andrö, razo Mbabeli danö andrö fefu, numalö saliŵa-liŵa ba danö, ba ube'e khönia, ena'ö ngoni-ngoninia.[3] 7 Ba amaedola zawuyunia ba sawuyu nononia ba sawuyu ma'uwunia fefu soi, balazi irugi baŵa danönia andrö göi, irege labe'e amaedola zawuyura ia soi sabölö ba razo sabe'e. 8 Ba na so soi, na so nöri niha, si lö edöna möi enoninia, enoni Nebukanesa, razo Mbabeli andrö, si lö edöna mame'e bagira ba galo mbagi andrö khö razo Mbabeli, ba ufatörö zi'öli ba lofo ba fökhö waba ba niha da'ö, iŵa'ö Yehowa, irege no uhori ira tangania. 9 Ba ya'ami, ba böi mitöngöni niŵa'ö zama'ele'ö andrö khömi, ba he niŵa'ö zi faeta andrö, ba he fangifimi, ba he niŵa'ö zangombakha eluaha dandra hadia ia, ba he niŵa'ö zebua elemu, na lamane khömi: "Tenga si möi enoni razo Mbabeli ami".[4] 10 Faya nifa'ele'öra khömi, ba wameta ya'ami ba danömi; ena'ö utimba ami ba ena'ö tekiko ami. 11 Ba soi same'e baginia ba galo mbagi andrö khö razo Mbabeli, ba we'amöi enoninia, ba lö ubulö'ö ba danönia — iŵa'ö Yehowa —, ena'ö mangahalö ira ba ena'ö soso ira ba da'ö.
II. Si manö göi niŵa'ö khö Zedekia[edit | edit source]
12 Ba khö Zedekia, razo mado Yuda andrö göi, ba uŵa'ö-ŵa'ö da'ö fefu, umane: Mi'oro'ö mbagimi andrö khö razo Mbabeli ba mi'ae enoninia ba enoni mbanuania, ba sauri ami. 13 Hana sa, wa edöna mate ami ba mbawa zi'öli ba ba lofo ba ba wökhö waba, nidaö'ö-daö'ö Yehowa ba soi andrö, si lö edöna möi enoni razo Mbabeli, ya'ugö ba banuau andrö? 14 Böi sa mifondrondrongo niŵa'ö zama'ele'ö andrö, na lamane khömi: "Tenga si möi enoni razo Mbabeli ami!" — faya sa nifa'ele'öra khömi.[5] 15 Tenga sa ya'odo zamatenge ya'ira — iŵa'ö Yehowa — sofaya sa'ae ira, wama'ele'ö ba döigu, ena'ö utimba ami ba ena'ö tekiko ami, fabaya sama'ele'ö khömi.
III. Famangelama ba zama'ele'ö sofaya[edit | edit source]
16 Ba umane göi ba gere ba niha da'e fefu: Da'ö niwa'ö Yehowa: Böi mifondrondrongo niŵa'ö zama'ele'ö andrö, na mama'ele'ö ira khömi, na lamane: "Hiza, alio sa'ae tefuli wakake ba gosali Yehowa andrö, moroi ba Mbabeli!" — faya sa'ae nifa'ele'öra khömi. 17 Böi mifondrondrongo khöra, mi'ae enoni razo Mbabeli, ba sauri ami! Hana wa tanö si mate dania naha mbanua da'e? 18 Ba na sama'ele'ö atö ira ba na so khöra daroma li Yehowa, ba ndramu'andrö khö Yehowa ngahönö andrö, ena'ö böi te'ohe ba Mbabeli wakake andrö si tosai ba gosali Yehowa ba ba gödo razo mado Yuda ba ba Yeruzalema. 19 Imane sa Yehowa ngahönö andrö, ba gehomo andrö ba ba mbaŵa nidanö andrö ba ba dadaoma andrö, ba ba zi tosai fakake, si tosai ba mbanua andre,[6] 20 niröi Nebukanesa, razo Mbabeli, me i'oloi'ö Yekhonia, ono Yoyaki, razo mado Yuda, moroi ha Yeruzalema, me i'ohe ba Mbabeli, fabeya salaŵa mado Yuda fefu ba salaŵa Yeruzalema:[7] 21 imane sa'ae Yehowa ngahönö andrö, Lowalangi Ndraono Gizeraeli, ba wakake andrö, si tosai na ba gosali Yehowa ba ba gödo razo mado Yuda ba ba Yeruzalema: 22 Ba Mbabeli te'ohe dania, ba ba da'ö ahono, balazi irugi baŵa ufuli ufaigi — iŵa'ö Yehowa — ba wangai ya'ia, ba wamuli ba naha andre.[8]
Famotokhi ba gahe[edit | edit source]
Fabaliŵa lala[edit source]
Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö