Wb/nia/Yeremia/36

I. Ifasura'ö wama'ele'önia Yeremia ba ifabaso'ö ba niha sato

1 Dofi si öfa khö Yoyaki ono Yosia, razo mado Yuda, ba humede Yehowa khö Yeremia, 2 imane: Halö garate, ba sura daroma li andrö fefu, niŵa'ögu khöu, nitandrösaigö ba Ndraono Gizeraeli ba ba mado Yuda, ba ba soi bö'ö fefu, i'otarai luo andrö, me awena humededo khöu, me luo Yosia, irugi ma'ökhö andre. 3 Ma atö labe'e ba dödöra ma'uwu Yuda wamakiko andrö fefu, si so ba dödögu nifatörö khöra, ma atö iröi lalania si lö sökhi andrö zamösana, ma lafuli ira, ba ube'e aefa khöra lalöra, awö horöra. 4 Ba humede Yeremia khö Mbarukhi andrö, ono Neriya, ba i'anura'ö Barukhi, igo'ögo'ö niŵa'ö-ŵa'ö Yeremia khönia, fefu daroma li Yehowa, niŵa'önia khönia, itanö ba zura. 5 Ba noa da'ö, ba iŵa'ö li khö Mbarukhi Yeremia, imane: So rörögu, tebai möido ba gosali Yehowa; 6 ba ae'e, ya'ugö andre, ba baso zura andrö, nisuramö, wolo'ölo'ö niŵa'ö-ŵa'ögu khöu, taroma li Yehowa andrö; farongogö ba zato ba gosali Yehowa, na baŵa wamoni; ba ba mado Yuda fefu, si no möi ba da'ö, moroi ba mbanuara misa, 7 farongogö wombaso, ma atö lakao khö Yehowa, wangide-ide'ö ya'ira, ma iröi lalania andrö si lö sökhi zamösana, ma lafuli ira: noa sa ebua wönu Yehowa ba bakhu-bakhu dödönia, fameta'u Yehowa niha andre. 8 Ba i'o'ö Barukhi, ono Neriya, fefu niŵa'ö Yeremia, sama'ele'ö, khönia, ibaso daroma li Yehowa, si so ba zura andrö, ba gosali Yehowa. 9 Ba me döfi si lima khö Yoyaki, ono Yosia, razo mado Yuda, me baŵa si siŵa, ba te'oroi'ö wamoni föna Yehowa ba mbanua Yeruzalema fefu ba ba mbanua bö'ö fefu, si möi ba Yeruzalema, moroi ba mbanua mado Yuda misa. 10 Ba ibaso huhuo Yeremia andrö Barukhi, ba gosali Yehowa, ba golayama khö Gemaria, ono Zafano, durutuli, ba golayama föna, si yaŵa, ba zinga mbawa göli si bohou, ba gosali Yehowa, ifarongogö wombaso sura andrö, ba niha sato fefu.

II. Ibaso göi ba zatua Barukhi andrö

11 Ba me no irongo Mikhaya, ono Gemaria ono Zafano, daramo li Yehowa fefu, ba zura andrö, 12 ba möi ia mitou ba gödo razo ba kato durutuli, ba no falukha ba da'ö zalaŵa fefu, ira Elisama, durutuli, Delaya, ono Zemaya ba Elinatano, ono Nakhiboro, ba Gemaria, ono Zafano, ba Sedekia, ono Hanania, ba satua bö'ö, fefu. 13 Ba i'ombakha'ö khöra Micbaya fefu nirongonia, me ifarongogö ba niha sato Barukhi wombaso sura andrö. 14 Ba lafatenge Yudi salaŵa andrö fefu, Yudi ono Natania ono Zelemia ono Khusi, lafatenge khö Mbarukhi, wanguma'ö: Ohe zura andrö, nifarongogöu ba zato ba ae khöma! Ba i'ohe zura andrö Barukhi, ono Neriya, möi ia khöra. 15 Ba lamane khönia: Dadao, ba farongogö khöma! Ba ifarongogö khöra Barukhi. 16 Ba me no larongo daroma li andrö fefu, ba faoma lafaigi mbawa nawöra, no tobali dödöra, ba lamane khö Mbarukhi andrö: Nifarongogö khö razo da'ö fefu! 17 Ba lasofu khö Mbarukhi, lamane: Tunö khöma, he öwisa wanura taroma li andrö, ni'ombakha'önia khöu. 18 Imane khöra Barukhi: Iŵa'ö-ŵa'ö khögu daroma li andre fefu, ba utanö ba zura, taŵa. 19 Ba lamane satua, khö Mbarukhi: Ae bini'ö ndra'ugö, awö Yeremia, ena'ö lö sangila heza so ami.

III. Irongo razo ba itunu zura

20 Ba möi ira khö razo, ba golayama me no la'irö'ö zura andrö ba kato durutuli Elisama, ba la'ombakha'ö khö razo da'ö no mege fefu. 21 Ba ifatenge Yudi razo, ba wangai sura andrö, ba ihalö ba kato durutuli Elisama. Ba ibaso Yudi, ifarongogö khö razo ba ba zatua andrö, fefu, si so ba ngainia. 22 Ba ba nahania na baŵa deu so razo — baŵa si siŵa —, no so galitö fönania. 23 Ba ero na no tölu irege öfa ngaroro ibaso Yudi, ba itaba razo ladawa ba itibo'ö ba galitö, irege no ahori akhozi zura andrö. 24 Ba lö tokea razo, ba he enoninia andrö fefu, samondrongo taroma li andrö fefu, lö lasika nukhara. 25 Ba he ŵa'ae la'andrö khö razo ira Elinatano, Delaya ba Gemaria, böi yamutunu zura andrö, ba lö'ö zui ifondrondrongo khöra. 26 Iŵa'ö na'i khö Yeramieli, ono razo ba khö ndra Seraya, ono Gaserieli, Selemia, ono Gabideli, lakaoni durutuli Barukhi ba Yeremia sama'ele'ö — ba no ibini'ö ira Yehowa.

IV. Fama'ele'ö ba khö razo Yoyaki

27 Ba humede Yehowa khö Yeremia, me no aefa itunu razo zura andrö, ifabaya taroma li andrö, nisura Mbarukhi, ni'ombakha'ö Yeremia khönia, imane Yehowa: 28 Halö garate bö'ö, ba sura yaŵa daroma li andrö, si mane mege, si so ba zura si föföna andrö, nitunu Yoyaki, razo mado Yuda. 29 Ba ba khö Yoyaki andrö, razo mado Yuda, ba ömane: Da'ö niŵa'ö Yehowa: No ötunu zura andrö, wanguma'ö: Hana wa ötanö bakha: "Lö zi lö möi razo Mbabeli, ba wamufu tanö da'e ba ba wangohori ba danö niha, fabaya uriföra?" 30 Andrö imane Yehowa ba khö Yoyaki andrö, razo mado Yuda: Lö nga'ötönia dania, sidadao ba dadaoma Dawido andrö, ba so tou dania mbotonia, ba zino, na ma'ökhö, ba ba wa'oafu, ba zi bongi. 31 Ba usulöni ba khönia ba ba ma'uwunia ba ba genoninia andrö lalöra, ba ba mbanua Yeruzalema ba ba mado Yuda, ba ufatörö wamakiko andrö fefu, nidaö'ö-daö'ögu khöra, lö lai wa lö nifondrondrongora. 32 Ba ihalö garate bö'ö, ibe'e khö durutulinia Barukhi, ono Neriya, ba itanö bakha da'ö fefu nösi zura andrö, nitunu Yoyaki razo mado Yuda, igo'ögo'ö niŵa'ö-ŵa'ö Yeremia khönia — ba oya lanönö na huhuo bö'ö, huhuo si manö göi.

Famotokhi ba gahe

Fabaliŵa lala

Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö