Wb/nia/Yeremia/52
I. Si göna Zedekia ba si sambao mo ya'ira, me atu'a ba Yeruzalema zanuwö[edit | edit source]
1 Dua wulu a sara fakhe Zedekia, me tumaro razo ia, ba felezara fakhe razo ia ba Yeruzalema. Hamutala döi ninania, ono Yeremia, banua Libena.[1] 2 Ba si lö omasi Yehowa ilau, si mane si'aikö folau Yoyaki andrö. 3 Itörö sa'ae mbanua Yeruzalema, awö mado Yuda [si lö sökhi andrö], börö wönu Yehowa, irege no itimba ira ba duduma hörönia. Ba fabali Zedekia khö razo Mbabeli. 4 Ba me no ahatö irugi meziŵa fakhe razo ia, ba zi mewulu ba mbaŵa si fulu, ba so Nebukanesa, razo Mbabeli, awö zabölö khönia fefu, ba wanuwö Yeruzalema, lafa'u'u, lafazökhi mba'a-ba'ara, fasui. 5 Ba tobali te'u'u mbanua, irugi ndröfi si felezara khö Zedekia. 6 Ba ba zi meziŵa ba mbaŵa si öfa, me no abölö lofo ba mbanua, me lö'ö sa'ae ö niha ba danö, 7 ba atöla göli labe'e sanuwö ba moloi razo, awö zabölö fefu, ba zi bongi, laröi mbanua, latörö mbawa göli ba gotalua göli si dua, tanö ba kabu razo (ba samasui banua na Ndrawa Galedaia) ba latörö lala ba Garaba. 8 Ba lagohi razo sabölö Ndrawa Galedaia ba lakhamö Zedekia ba ndraso ba Yerikho, me no laröi ia sabölö khönia fefu, me no muzaewe. 9 Ba lara'u razo, la'ohe khö razo Mbabeli ba Ribela ba danö Hamata; ba i'etu'ö hukunia da'ö. 10 Ba ifataba'ö mbagi ndraono Zedekia razo Mbabeli, ba zanehe Zedekia, ba fefu zalaŵa mado Yuda, ba ifataba'ö mbagi, ba Ribela. 11 Ba ifakoe'ö hörö Zedekia, ba larate iŵa'ö. Ba ifa'ohe'ö ba Mbabeli razo Mbabeli ba ifakuru'ö, irugi wa'amatenia.
II. Fa'adudu mbanua, fabaya osali[edit | edit source]
12 Ba ba zi mewulu ba mbaŵa si lima, — me no sara ambö dua wulu fakhe dania razo Nebukanesa, razo Mbabeli andrö — ba so Nebusa-Adano andrö, sarasa wazuri, si lö aefa-aefa khö razo Mbabeli, möi ia ba Yeruzalema, 13 ba itunu gosali Yehowa, awö gödo razo ba omo ba Yeruzalema fefu; omo zalaŵa fefu, ba itunu. 14 Ba sara öli Yeruzalema, fasui, ba ladudugö sabölö Ndrawa Galedaia, dozi ira, si fao khö zarasa wazuri andrö. 15 Ba si tosai niha, si lö ahori ba mbanua ba si no möi khöra mege, sanaŵa razo Mbabeli andrö, ba si tosai tuka, ba i'ohe ba Mbabeli Nebusa-Adano, sarasa wazuri. 16 Ba niha si numana ba danö, ba isaigö ösa Nebusa-Adano, sarasa wazuri, iröi sohalöŵö ba kabu nagu ba sonowi. 17 Ba taru nahe töla andrö ba gosali Yehowa ba dayadaya andrö ba gala nidanö andrö, töla, ba gosali Yehowa, ba larasa Dawa Galedaia; ba tölania fefu, ba la'ohe ba Mbabeli.[2] 18 Ba bowoa andrö ba sundrusundru ba si'öli ba figa ba wanefe ba figa bö'ö ba fefu wakake töla, ba wame'e sumange, ba lahalö, 19 ba mako sebua andrö ba gali ba figa ba wanefe ba bowoa ba naha wandru ba mako ba wamadu, fefu wakake ana'a ba fefu wakake firö, ba ihalö sarasa wazuri andrö. 20 Dua rozi taru nahe andrö ba sambua gala nidanö ba saŵi töla andrö, si felendrua, dayadayania, dayadaya andrö, nifazökhi razo Selomo, ba gosali Yehowa, — tebai tetulo döla wakake andrö fefu.[3] 21 Ba taru nahe andrö, ba felendrua hela wa'alaŵa zara ba mato daöfa manalagu; öfa turu wa'awe'e-we'e, ni'okoro, lö ösi bakha. 22 Ba mohögö töla; sambua högö, ba lima hela wa'alaŵa, ba no tefasui ni'obua dalimo högö andrö, töla manö; ba si manö göi ba daru nahe si sara. 23 Siŵa wulu a önö ni'obua dalimo, soroma, ba otu fefu ni'obua dalimo, fasui ba ni'otarali andrö.
III. Te'oloi'ö Ndraono Gizeraeli[edit | edit source]
24 Ba ihalö sarasa wazuri zatua gere andrö, Seraya, ba tambalinania ere, Sefania, ba sanaro ba mbawandruhö, datölu. 25 Ba ihalö ba mbanua genoni yomo, zamösa, si no kumandra zabölö göi, ba dafitu zi lö aefa-aefa mege khö razo, nisöndra ba mbanua, ba durutuli gumandra sebua, sanutuyu saradadu niha danö ba önö ngafulu na niha ba danö, nisöndra ba mbanua. 26 Da'ö nihalö Nebusa-Adano, sarasa wazuri, ba i'ohe khö razo Mbabeli ba Ribela. 27 Ba ifabunu'ö ira razo Mbabeli, ba da'ö ba Ribela, ba danö Hamata. Si manö wa'aheta mado Yuda ba danöra, fangoloi'ö ya'ira. 28 Da'e wa'ato niha, ni'oloi'ö Nebukanesa: Me döfi si fitu khönia, ba tölu ngahönö a dua wulu a tölu mado Yuda i'oloi'ö; 29 ba me döfi si feleŵalu, ba ŵalu ngaotu a tölu ngafulu a rua, banua Yeruzalema. 30 Ba me döfi si dua wulu a tölu khö Nebukanesa, ba fitu ngaotu a öfa wulua lima mado Yuda i'oloi'ö Nebusa Adano, sarasa wazuri; tobali öfa ngahönö a önö ngaotu niha, fefu.
IV. Te'efa'ö ba gurunga Yoyakhi andrö, ba Mbabeli[edit | edit source]
31 Ba me döfi zi tölu ngafulu a fitu, i'otarai me te'oloi'ö Yoyakhi andrö, razo mado Yuda, ba zi dua wulu a lima, ba mbaŵa si felendrua, ba ihakhösi tödö Yoyakhi andrö, razo mado Yuda, Ewili-Merodaki, razo Mbabeli — ba ndröfi me tumaro ia razo, i'efa'ö ba gurunga.[4] 32 Ihaogö wehedenia khönia ba yaŵa naha dadaoma zalaŵa bö'ö, awönia ba Mbabeli, ibe'e dadaoma Yoyakhi. 33 Ifaheta'ö nukhania ba gurunga ba awönia ia ba wemanga, götö wa'anau nosonia na. 34 Ba razo Mbabeli zanaha balazonia — balazonia si lö mamalö-malö, hadia zahori ma'ökhö, irugi wa'amatenia, götö wa'anau nosonia na.
Famotokhi ba gahe[edit | edit source]
Fabaliŵa lala[edit source]
Olayama Yeremia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö