Wb/nia/Hezekieli/6

Fama'ele'ö ba hili Ndraono Gizeraeli andrö:

I. Te'otu'ö dania wame'e adu andrö, ba tobali lö ato zi tosai niha

1 Ba so niŵa'ö Yehowa khögu, imane: 2 He ono niha, otahögö hili Ndraono Gizeraeli andrö ba ama'ele'ö nitandrösaigö ba da'ö, 3 ömane: He ya'ami hili Ndraono Gizeraeli, mifondrondrongo niŵa'ö Zo'aya, Yehowa! Imane So'aya, Yehowa ba hili andrö ba ba hili-hili, ba ba mbombo ba ba ndraso andrö: Hiza, ufatörö khömi zi'öli ba ufufu hili-hili andrö khömi. 4 Ba nidudugö naha wame'e sumange andrö khömi ba nirasa nadu luo andrö, ba föna nadumi utibo'ö tou nibunu andrö khömi. 5 Boto zi mate ba Ndraono Gizeraeli, ba utou'ö tou föna nadura, ba tölami, ba ufazawili, ufasui naha wame'e sumange andrö khömi. 6 Ba danömi misa fefu, ba banua sadudu dania ba hili-hili si no afufu, ena'ö si lö mu'oguna'ö sa'ae naha wame'e sumange khömi, ba si no adudu, si no murasa nadumi ba si no muheta, si no mutuli'ö tou nadu luo andrö ba si no muhori nifazökhi dangami andrö. 7 Ba so zi mate nibunu ba khömi, ena'ö aboto ba dödömi, wa ya'odo Yehowa. 8 Ba na so ösa, banuami, saefa ba mbawa zi'öli, ba niha baero misa, na nifazawili ami ba danö zotanö, 9 ba itörö todö zoloi andrö khömi, ba niha baero, ba ni'oloi'ö ya'ira, nibotogu tödö andrö, si no fa'ero, si no mangerogö ya'o, awö hörö, si lö aefa-aefa ba nadu, timba ba zohorö, ba ogoro ira ira, börö zi lö sökhi andrö, nilaura sogoro ita andrö. 10 Ba aboto ba dödöra, wa tenga faya me udaö'ö-daö'ö wamatörö famunu andrö khöra, ya'o, Yehowa.

II. Fa'ala'alaisa ba khö Ndraono Gizeraeli

11 No imane So'aya, Yehowa: Lau dataŵo ba börö-börö danö ba lau wa'ala'alaisa ba zogoro ita andrö fefu, ba ma'uwu Gizeraeli, me si'öli ba lofo ba fökhö waba wamunura dania. 12 Saröu, ba ba wökhö waba tekiko, ba sahatö, ba ba mbawa zi'öli mate, ba si tosai, si lö göna da'ö, ba ba lofo mate, ba tobali u'oigö wönugu ba khöra andrö. 13 Ba ya aboto ba dödömi wa ya'o Yehowa, na no so tou ba ngai nadura nibunu andrö khömi ba zi tefasui naha wame'e sumange andrö khöra, ba hili-hili salaŵa fefu ba ba zuzu hili fefu, dozi börö geu ba dozi börö manawa sabölö bulu, ba nitunura samohua ba nadura fefu. 14 Ba u'oro'ö dangagu, ba khöra andrö, ubali'ö tanö si mate ba si lö nihaniha danöra, i'otarai danö si mate andrö, irugi Ribela, ba naha mbanuara fefu; ba ya aboto ba dödöra, wa no ya'o Yehowa.

Famotokhi ba gahe

Fabaliŵa lala

Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö