Wb/nia/Hezekieli/16

Amaedola ndra alawe sohorö Yeruzalema.

I. No ifaigi ia Yehowa ba wa'anumania ba no ifohu

1 Ba so niŵa'ö Yehowa khögu, imane: 2 He ono niha, tegu Yeruzalema ba zogoro ita andrö khöra, ömane: 3 Da'ö niŵa'ö Zo'aya, Yehowa, ba mbanua Yeruzalema: Si otarai ya'ugö ba börötamö, ba no ba danö Ndrawa Gana'ana: Tuau, ba Iraono Gamori, ba aweu, ba Iraono Kheti. 4 Ba ba wa'atumbumö andrö, me luo tumbu ndra'ugö, ba lö mutaba wusömö ba lö mufemondri ndra'ugö, ba wangehao ösiu, ba lö mudukhu asio ndra'ugö ba lö mulölö. 5 Lö sahakhö tödö ya'ugö, ba wolau khöu hadia ia, da'ö, ba wangahakhösi tödö ya'ugö. No nitibo'ö baero ba mbenua ndra'ugö, — awai zi so ba dödöra nosou, me luo tumbu ndra'ugö. 6 Ba utörö ndra'ugö, ba anehedo, me manaranara ndra'ugö, oi do, ba umane khöu: Ya'ugö andrö ba ndro andrö khöu, tou, ba ni'orifi ndra'ugö! umane khöu: sauri ndra'ugö, ba ndro andrö khöu! 7 Ba no u'oya'öndra'ugö, timba wa'oya rozi ngawalö ndru'u ba danö, ba no manöi'ö, ebua ndra'ugö, ba no tobali fondrege omasiö ndra'ugö: no afosu ndra'ugö, ba no itugu abölö mbumö, ba si lö nukha na ndra'ugö, si lö balu-balu. 8 Ba utörö ndra'ugö, ba u'ila'ö, ba hiza, ba no irugi baŵa wa'omasi khöu. Ba ubologö gambalagu balu-balumö, ubalugö ndra'ugö, me no lö nukhau, ba fawu'u li ndra'o khöu, möido ba hölu, iŵa'ö So'aya, Yehowa, ba no khögu sa'ae ndra'ugö. 9 Ba ufemondri'ö ba nidanö, usasai ndro andrö khöu ba ubayoini fanikha ndra'ugö. 10 Ba ufonukha ndra'ugö nukha nifola'a-la'a, ba wanoso, ba ufobadagahe uli zaŵi nasi ndra'ugö; ba ufolembe ndra'ugö lembe tarafali ba salendra suto ube'e khöu. 11 Ba u fo'aya ndra'ugö ba ube'e göla ba mbulökhamö ba aya ba mbagiu. 12 Ba aya ba nikhumö ba saeru dalinga ba dalingau ba takula si sökhi sibai ba högöu. 13 Ba no nifo'aya ndra'ugö, aya ana'a ba aya firö, ba nukhamö, ba no tarafali, awö nukha sola'a-la'a. Ba fakhe samohua ba ŵe ŵani ba fanikha göu ba tobali si maulu wa'asökhiu ba ökhamö wa'asalaŵa. 14 Ba ebua duriamö ba niha baero misa, börö wa'asökhiu andrö, me no a'oi so, ba wangehao andrö, nibe'egu khöu, iŵa'ö So'aya, Yehowa.

II. Ba no ilulu wa'asökhinia ba no mohorö ia

15 Ba no öbe'e fa'abe'e dödöu wa'asökhimö andrö, ba mohorö ndra'ugö, börö duriamö andrö, öhöna wohorömö andrö ba zanörö fefu, ölulu ndra'ugö. 16 Ba öhalö nukhamö andrö ösa, ba öbe'e tufo ba hili-hili andrö khöu, sola'a-la'a ba da'ö, ba mohorö-horö'ö ba da'ö — si lö irai ba si lö'ö sa'ae göi dania. 17 Ba öhalö nayamö andrö, ana'agu ba firögu, nibe'egu khöu, ba öbali'ö famaedo ndra matua, ba mohorö'ö khöra. 18 Ba öhalö nukhamö, sola'a-la'a andrö, ba öbe'e nukhara; ba fanikha andrö khögu ba kumöyö khögu, ba öbe'e sumangera. 19 Ba kue andrö khögu, nibe'egu khöu, hamo si sökhi andrö khögu, ba no öbe'e-be'e sumangera, samohua; si manö mege, iŵa'ö So'aya, Yehowa. 20 Ba öhalö nonou matua ba onou alawe, ni'adonogömö khögu, ba ötaba, öra; hadia, sambö na wohorömö andrö, 21 wa ötaba na göi nonogu matua ba wame'e khöra, wa no ötutunu öra. 22 Ba ba zogoro ita andrö khöu fefu ba ba wohorö-horömö, ba lö'ö sa itörö tödöu götö me ono sawuyu ndra'ugö, me lö nukhau, me lö balu-balumö, ba me manaranara'ö tou ba me oi do ndra'ugö! 23 Ba nönö-nönö zi lö sökhi andrö khöu fefu, — Alai ndra'ugö, alai ndra'ugö! — iŵa'ö So'aya, Yehowa, 24 ba ölau khöu nose ba öfazökhi khöu hili-hili ba golayama misa fefu. 25 Ba ngai waerua lala fefu öfazökhi khöu hili-hili ba öbe'e ba zalakha wa'asökhimö andrö, dozi sanörö, ba öfolala khöu; no öhöna wohorömö. 26 Mohorö'ö ba nono matua Ndrawa Miserayi, si faola tanö khöu, sebua ösi; ba ötohugö na wohorömö, ba wangandrö fönugu. 27 Ba hiza, ba no u'oro'ö dangagu yaŵau ba no u'ambösi nihonogöi khöu, ba no ululu ndra'ugö ba wa'atebakha zi fa'udu khöu andrö, ono Ndrawa Wilisiti alawe, si no aila ba mbua-buamö fohorö andrö. 28 Ba no mohorö'ö ba Ndrawa Asiria, ba tebai abuso ndra'ugö; no mohorö'ö khöra ba tebai aföli'ö. 29 Ba no ötohu-tohugö na wohorömö ba danö zaniaga andrö, ba danö Galedaia, ba he ba da'ö göi, ba lö saföli ndra'ugö. 30 No si tebakha sibai dödöu! iŵa'ö So'aya, Yehowa — wa no ölau da'ö fefu, nifolou zohorö, si no maulumaulu, 31 wa no ödozigö waerua lala, wolau ose khöu, ba he ewali fefu, wamazökhi hili-hili khöu; ba no tenga zui si mane sohorö, sanguma'ö no ambö luo, ndra'ugö. 32 He alawe sohorö-horö, solulu ya'ia ba mbö'ö, lö lai wa no modonga ndra'ugö! 33 Dozi ira alawe sohorö, ba manema buala, ba ya'ugö, ba mamuala ba zomasi ya'ugö fefu, no öbe'e gana'a, ena'ö möi ira khöu, moroi ba zi fasui fefu, ba wohorö khöu. 34 Ba no tobali ba khömö andrö, no tenga si mane huku ba ndra alawe bö'ö, ba wohorö-horömö andrö, no tenga nigohi ndra'ugö, no ya'ugö zame'e luo, ba lö'ö sa mufoluo ndra'ugö. No tobali ba khömö andrö.

III. Ba te'otu'ö sa'ae ba wohorö andrö

35 Ba me no si manö, ya'ugö sohorö-horö, ba fondrondrongo li Yehowa! 36 Da'ö niŵa'ö Zo'aya, Yehowa: Me no mulau zaila'ö, ba me no mufa'ele'ö zi lö balu-balu khöu, ba wohorö-horömö andrö ba zomasi ya'ugö, ba ba nadumö andrö fefu, sihokha mbuda, ba börö na göi ndro ndraonou andrö, nibe'eu sumangera, 37 ba hiza ba u'ozaragö fefu zomasi ya'ugö, ba zi no omasiö ndra'ugö, ba somasi ndra'ugö, fabaya si lö edöna'ö ba si no te khöu öwa'ö. U'ozaragö ira khöu ba ufahoi mbalu-balu zaila'ö, ba zanehe ira, ena'ö la'ila zaila'ö andrö fefu. 38 Ba uhuku ndra'ugö, huku zohorö ufatörö khöu, huku ndra alawe sange'e, ba ube'e aduwa ndromö, ba wönugu andrö ba ba wa'olohugu. 39 Ba ube'e ba dangara ndra'ugö, ba ladudugö noseu andrö ba lafufu hili-hili andrö khöu ba laheta khöu nukhamö ba lahalö nayau ba si lö nukha sa'ae ndra'ugö, si lö balu-balu labe'e. 40 Ba falukha dania ira, udumö, ba latebu kara ndra'ugö ba la'ö'ötö ndra'ugö si'öli. 41 Ba latunu nomou ba lafatörö khöu huku, ba ato ndra alawe bö'ö samaigi-maigi, ba lö'ö sa'ae utehe sohorö-horö ndra'ugö, ba lö tola sa'ae öbe'e luora ba wohorö andrö. 42 Ba u'okafui wönugu ba khöu andrö, dohö wa'olohugu khöu, ba lö hede-hedegu sa'ae, ba lö'ö sa'ae mofönudo. 43 Me lö itörö tödöu mege, he wisa me ono sawuyu ndra'ugö, ba me no ö'andrö wönugu ba ngawalö andrö fefu, ba hiza, ba usulöni sa'ae khöu mbua-buau andrö! iŵa'ö So'aya, Yehowa, ba hadia, lö nifazökhiu fondrege horö, nönö-nönö zogoro ita andrö khöu fefu?

IV. Ebua horönia, moroi ba horö Zodoma ba moroi ba horö Zamaria

44 Hiza, dozi solau amaedola, ba laböbögö khöu, lamane: "No famaedo nina nono alawe". 45 Ono ninau ndra'ugö, ono ninau andrö, sanuzu tödö mege fo'omonia, fabaya ononia. Ba no talifusö dalifusöu ndra'ugö, sanuzu tödö fo'omora ba onora: Iraono Kheti gawemi ba Iraono Gamori duami. 46 Samaria ga'au ira alawe, ya'ia ba ononia alawe, si so ba ngaimö, ba gabera, ba akhiu andrö, si so ba gambölöu, ba ya'ia Zodoma ba ononia alawe. 47 Ba no tenga lalara nitörömö ba tenga sogoro ita khöra nilaumö; lö arara, ba tedou walösökhi mbua-buamö fefu, moroi ba mbua-buara. 48 Faya wa no sauri ndra'o, iŵa'ö So'aya, Yehowa, na no irai ilau akhiu Sodoma ba ononia alawe nilaumi onou alawe! 49 Hiza, da'ö horö nakhiu Sodoma: Hokha, ba fa'afahöna mbalazo ba fa lö fa'abu dödö zi falukha ia, ba ononia alawe, ba si numana ba sambö balazo, ba lö latolo. 50 Fayaŵa ira ba lalau zogoro ita fönagu; ba uheta ira, me u'ila da'ö. 51 Ba lö'ö na'i matonga horömö nifazökhi Zamaria; no abölö-bölö wolaumö sogoro ita andrö, moroi khöra, ba tobali no öbu'a ba hulu ndra talifusöu, ba zogoro ita andrö fefu, nilaumö. 52 Ba ötaha sa'ae göi wa'ailamö, ya'ugö andrö, me no möi'ö samu'a ba hulu ndra talifusöu, ba horömö andrö, ba zi no ölau sogoro ita, sabölö-bölö, moroi ba nilaura, ba tobali satulö moroi khöu ira. Ba yagö aila sa'ae, ba ötaha wa'ailamö, me no hulö zatulö dalifusömö öbe'e.

V. Ba ifuli zui na ihakhösi tödö ira dania Yehowa ba ifuli fawu'u li ba Yeruzalema

53 Ufuli sa'ae uhakhösi tödö ira, Sodoma ba ononia alawe ba Samaria ba ononia alawe, ba uhakhözi tödö göi ndra'ugö, ba khöra u'ohe ndra'ugö, 54 ena'ö ötaha wa'ailamö, ena'ö aila ndra'ugö ba nilaumö andrö fefu, na arara dödöra öbe'e. 55 Ba talifusoöe andrö, Sodoma ba ononia alawe, ba lakhamö si mane föna, ba Samaria ba ononia alawe, ba lakhamö, ba ya'ugö ba onou alawe, ba mikhamö si mane föna. 56 Ba lö nitörö liu Sodoma, talifusöu andrö, götö wayaŵasamö andrö, 57 me lö oroma na walösökhimö, si mane me luo la'o'aya ndra'ugö ono Ndraono Gedomo alawe, awö zi tefasui ya'ira fefu, ono Ndrawa Wilisiti alawe, sango'aya ya'ugö, fasui. 58 Fohorömö andrö ba sogoro ita andrö khöu, ba no ölu'i, iŵa'ö So'aya, Yehowa. 59 Da'ö sa niŵa'ö Zo'aya, Yehowa: Usulöni khöu nilaumö, me ö'ositengagö wahölusa andrö ba me ödudugö wawu'usa li andrö. 60 Ba ya'o, ba lö olifudo wawu'usa li andrö, me fawu'u li ndra'o khöu, me iraono ndra'ugö, ba [ufuli] fawu'u li khöu, sirugi si lö aetu. 61 Awena dania itörö tödöu mbua-buamö andrö ba aila ndra'ugö, na öhalö khöu ndra ga'au andrö, fabaya akhiu, na ube'e onou ira, ba tenga ba wawu'usa li andrö khöu. 62 Ba ulau fawu'u li khöu, ba ya aboto ba dödöu, wa no ya'o Yehowa. 63 Ena'ö itörö tödöu, ba ena'ö aila'ö, fa lö hede-hedeu sa'ae, ba wa'aila andrö, na ube'e aefa khöu nilaumö andrö fefu, iŵa'ö So'aya, Yehowa.

Famotokhi ba gahe

Fabaliŵa lala

Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö