Wb/nia/Hezekieli/47
Tohu-tohu:
I. Idanö ni'amoni'ö andrö ba gosali[edit | edit source]
1 Ba i'ohedo mangawuli, ba mbawandruhö gosali, ba hiza nidanö, si otarai doyo nomo andrö, tanö ba gatumbukha luo; atumbukha luo sa i'otahögö osali. Ba ahele mitou nidanö andrö ba gahe mbagolö gosali tanö raya, raya naha wame'e sumange.[1] 2 Ba i'ohedo baero, ifatörödo be mbawa göli tanö you ba matörö lala, ba wamasui ba mbawa göli baero, si otahögö atumbukha luo; ba hiza nidanö, si otarai narö mbagolö tanö raya. 3 Ba möi baero niha andrö, si so helo ba danga, me isaŵa tanö ba gatumbukha luo, ba isu'a, ba 1.000 hela. Ba ifatörödo ba nidanö andrö; irugi mbu'u gawono. 4 Ba ifuli isu'a, ba 1.000 hela, ba ifatörödo ba nidanö, ba irugi mbalöduhi. Ba ifuli isu'a, ba 1.000 hela, ba ifatörödo ba nidanö, ba no falaŵa sola. 5 Ba ifuli isu'a, ba 1.000 hela, ba no idanö sebua si tebai u'ötö. Me no abölö abakha nidanö andrö — no idanö solangi ita — no idanö sebua, si tebai ta'ötö. 6 Ba imane khögu: Hadia, no anehe'ö da'ö, ono niha? Ba i'ohedo mangawuli ba mbewe nidanö andrö. 7 Ba me ufulido, ba hiza, no fahöna geu ba mbewe nidanö andrö, faoma fatambai. 8 Ba imane khögu: Idanö andre, ba isaŵa baero ba danö tanö ba gatumbukha luo, ba Garaba misi tou moluaha; ba na irugi zilua asi andrö [silua asi si mate] ba nidanö sasi-asi, ba idanö si sökhi nasi andrö.[2] 9 Ba hadia ia fefu saliŵa-liŵa, solihaliha ba da'ö, heza irugi hohounia, ba auri, ba si fahöna dania gi'a; na no irugi sa'ae idanö andrö, ba tobali idanö si sökhi [nasi andrö], ba hadia ia fefu ba zirugi idanö andre, ba auri.[3] 10 Ba so dania zangai i'a ba mbewe, i'otarai Enigedi, numalö ba Enegela'i; naha ba nilau kiri dania ia; oi so ngawalö gi'a, si mane i'a ba nasi sebua, fahöna. 11 Ba laza andrö khönia, awö zi faonö andrö, ba lö tobali, dörödörö asi-asi a'ine, ba wangasio. 12 Ba ba mbewe nidanö andrö, ba ngöfinia fatambai, ba so ngawalö geu sowua, ö niha; bulunia, ba lö aleu, ba bua, ba si lö aetu. Sarasara waŵa, ba so mbua si bohou; me no ba ni'amoni'ö andrö i'otarai idanö andrö khönia. Bua, ba ö niha, ba bulu, ba dalu-dalu.[4]
II. Ola ba wamaosa tanö ni'amoni'ö[edit | edit source]
13 Da'ö niŵa'ö Zo'aya, Yehowa: Da'ö nola danö andrö, nifaosami khömi, dali mado Ndraono Gizeraeli andrö, si felendrua; ba ba mado Yosefo, ba dombua waosatö.[5] 14 Mifagölö-gölö waosatö khömi, ondröita dania, me no fahölu ndra'o me föna, ube'e khö ndra tuami, ba tobali ya'ami zokhö tanö andre, ondröita.[6] 15 Ba da'ö nola danö, tanö yöu: I'otarai nasi sebua ba ituturu Hetelono, irugi lala ba Zedada, 16 Hamata ba Berota ba Sibera'i, ba nolara danö Ndramaseko danö Hamata, irugi Hasara-Enono, ba nola Haurana.[7] 17 Tobali i'otarai nasi ola andrö, ba irugi Hasara-Enono, tobali italu'i miyöu tanö Ndramaseko ba tanö Hamata; da'ö danö miyöu. 18 Ba tanö ba gatumbukha luo: I'otarai Hasara-Enono ba gotaluara Ndramaseko Haurana, ba no Yoridano nolara Gileadi danö Ndraono Gizeraeli, irugi zilua asi tanö ba gatumbukha luo, irugi danö ba Damara; da'ö danö ba gatumbukha luo. 19 Ba tanö miraya: I'otarai Damara, irugi Me-Meriboto ba ngai Gadesi ba ituturu mbombo andrö mitou ba nasi sebua; da'ö danö miraya.[8] 20 Ba tanö ba gaekhula luo: Asi sebua nola, irugi ba gamaudu sibai lala ba Hamata; da'ö danö ba gaekhula luo. 21 Da'ö danö andrö nifaosami khömi, dali mado Ndraono Gizeraeli andrö.[9] 22 Milau dahö-dahö, ba wamaosa ya'ia ondröita khömi ba ba niha bö'ö andrö, si no fatewu khömi, si no mo'ono ono matua ba khömi. Si falaŵalaŵa ba Ndraono Gezeraeli, ono ba danö, ira, mibe'e. Sanema ondröita göi ira, awömi, bakha ba hunö mado Ndraono Gizeraeli. 23 Ba mado andrö, ba zi so niha bö'ö andrö, mituturu khönia gondröita khönia, iŵa'ö So'aya, Yehowa.
Famotokhi ba gahe[edit | edit source]
Fabaliŵa lala[edit source]
Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö