Wb/nia/Hezekieli/32

I. Fange'esi Fara'o razo Miserayi

1 Ba ba ndröfi si felendrua, ba zi sambua desa'a ba mbaŵa si felendrua, ba so niŵa'ö Yehowa khögu, 2 imane: He ono niha, e'esi Wara'o andrö, razo Miserayi, ömane khönia: Ya'ugö ono zingo ba niha baero, lö ya'ugö sa'ae! no timba mbuaya ba molö ndra'ugö, no izö'izö nikhumö, no ö'olotui nidanö ahemö, no manambunambu ndra'ugö ba hohou. 3 Da'ö niŵa'ö Zo'aya, Yehowa: Uhawui sa'ae ndra'ugö dialagu ba zoya aekhu soi niha, ba ladöni yaŵa ndra'ugö, ba ndrialagu andrö. 4 Ba ufazaumba yaŵa ba danö ndra'ugö, ba mbenua utibo'ö tou ndra'ugö, ba manuge ba mbotomö wofo ba dalu mbanua fefu ube'e; ba utu ndru'u ba guli danö ma'asagörö, ba u'abusoi'ö ösiu. 5 Ba u'ohe yaŵa ba hili nösiu, ba ufo'ösi ndraso amatelamö. 6 Ba ba danö ninönöimö mege, ba ufabadugö ndromö, irugi ba gahe hili, ba afönu ngöfi mbombo öbe'e. 7 Ba ba wa'amatemö, ba alu mbanua ube'e ba ubalugö saitö ndröfinia; luo, ba ubalugö lawuo, ba baŵa, ba si lö haga. 8 Sihaga andrö ba mbanua si yaŵa, ba ubalugö saitö, börö ndra'ugö, ba uhawui sogömi-gömi danömo, iŵa'ö So'aya, Yehowa. 9 Ba oya soi niha, ba abu dödö ube'e, na u'ohe ba niha baero gadudulamö, ba danö zotanö, si lö örai ö'ila. 10 Ba oya soi niha zi tobali tödö ube'e, ba khömö andrö, ba razora, ba sihokha mbu, börö ndra'ugö, na ufaligoi zi'öli fönara, ba sanizi-nizi ira, si lö mamalö-malö; ba nosonia manizi-nizi zamösana, na luo wa'ate'alamö andrö. 11 Imane sa So'aya, Yehowa: Irugi dania ndra'ugö si'öli razo Mbabeli. 12 Si'öli zabölö andrö ube'e famufu lakhömimö andrö; fondrege zafaito niha fefu. Da'ö dania zamufu hokha Miserayi andrö; ba lakhömira fefu, ba nihori. 13 Ba uriföra fefu ba zabölö idanö andrö, ba uhori, ba sara lö ahe niha sa'ae dania si olotui idanö andrö, ba he sa'a zaliŵa-liŵa ba danö. 14 Ba ohahau dania nidanö andrö khöra, ube'e, ba hulö wanikha wa'ahele hohounia, iŵa'ö So'aya, Yehowa, 15 na ubali'ö tanö si mate danö Miserayi, na no afufu danö ba na si lö ösi sa'ae, na ubunu fefu zowanua ba danö, ena'ö aboto ba dödöra, wa no ya'odo Yehowa. 16 Fange'esi da'e, nilau, ono niha baero alawe zolau ya'ia: ba danö Miserayi ba ba lakhömira andrö fefu latandrösaigö, iŵa'ö So'aya, Yehowa.

II. Fange'esi Dawa Miserayi sato

17 Ba ba ndröfi si felendrua, ba duli, ba so niŵa'ö Yehowa khögu, 18 imane: He ono niha, e'esi lakhömi Miserayi andrö, ba dada tou ia ba mbanua tou, ba zi no numalö mitou ba gohokoho, ya'ugö ba ono soi sebua alawe. 19 Hadia, tenga no omasiö ndra'ugö moroi ba niha bö'ö fefu? Ae si tou ba be'e nifaförö ba ngai zi lö muboto ndra'ugö! 20 Bakha ba hunö nibunu si'öli tegaölö tou ira. No mube'e zi'öli; ba tefaförö tou ia, fabaya lakhöminia fefu! 21 Ba lamane dania khönia sabölö andrö moroi ba dalu mbanua tou, khönia ba ba zi no fa'awö khönia: No ahöndrö si tou, no so tou ba da'ö zi lö muboto, nibunu si'öli andrö. 22 Hiza Asiria ba sato khöra fefu, si no tefasui lewatönia, — oi nibunu tou, si mate ba mbawa zi'öli mege — 23 ba wondrege ba watalinga tebe'e mege lewatöra, ba no tefasui satonia lewatönia, oi nibunu tou mege, si mate ba mbawa zi'öli, sameta'u niha mege ba danö niha sauri. 24 Hiza Gelama ba satonia fefu, si tefasui lewatönia, oi nibunu tou mege, si mate ba mbawa zi'öli, si no numalö mitou ba mbanua tou lö muboto, sameta'u niha mege, ba danö niha sauri, ba solu'i iya'e wa'ailara, awö zi no numalö mitou ba gohokoho. 25 Bakha ba hunö nibunu lafazökhi khönia naha wemörö, awö naha zatonia andrö, tefasui ia lewatöra, oi si lö muboto, si mate ba mbawa zi'öli mege — noa sa sameta'u niha mege ira ba danö niha sauri —; ba lalu'i iya'e wa'ailara, ba ngai zi no numalö mitou ba gohokoho, bakha ba hunö nibunu tebe'e nahara. 26 Hiza Mesekhi ba Tubala ba satora fefu, no tefasui ia lewatö da'ö, oi si lö muboto, si mate ba mbawa zi'öli mege, sameta'u niha mege, ba danö niha sauri. 27 Tenga ba ngai zabölö andrö so ira, tenga ba ngai zabölö si mate nibunu ba götö föna sibai, si lö aheta fangaro, ba welalö mitou, ba mbanua tou, nibe'e tandraya si'ölira, ba ambala gamatelara mbalusera; noa sa sata'u niha zabölö andrö, ba danö niha sauri mege. 28 Ba bakha ba hunö zi lö muboto arasa ndra'ugö, ba ba ngai nibunu si'öli mörö tou ndra'ugö! 29 Hiza Gedomo andrö, awö razora, awö zalaŵara fefu, si no mube'e ba ngai nibunu si'öli, ba wa'abölöra andrö; ba ngai zi lö muboto tou so ira, ba ngai zi no numalö mitou ba gohokoho. 30 Hiza razo moroi yöu ba banua Zidona fefu, si no numalö mitou nibunu, lö lai wa no sata'u ita mege, lua-lua wa'abölöra, si no aila ira. No tou ba da'ö so ira, lö muboto, ba ngai nibunu si'öli; ba lalu'i wa'ailara, awö zi no numalö mitou ba gohokoho. 31 Da'ö [fefu] ni'ila Wara'o andrö dania, ba arara dödönia, ba lakhöminia andrö fefu; nibunu si'öli Wara'o andrö, awö zabölö andrö khönia fefu, iŵa'ö So'aya, Yehowa. 32 Noa sa sata'u niha ia mege ba danö niha sa'uri; andrö wa labe'e tou ia bakha ba hunö zi lö muboto, ba ngai nibunu si'öli: Fara'o andrö, fabaya lakhöminia fefu, iŵa'ö So'aya, Yehowa.

Famotokhi ba gahe

Fabaliŵa lala

Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö