Wb/nia/Hezekieli/46

Tohu-tohu:

I. Amakhoita ba zumange nibe'e razo

1 Da'ö niŵa'ö Zo'aya, Yehowa: Bawa göli andrö ba golayama bakha, tanö ba gatumbukha luo, ba si önö ngaluo barö zabato, ba lö labokai, ba na luo sabato, ba labokai, ba si manö göi ba wasulöna. 2 Ba itörö gewe'ewe, mbawa göli andrö razo, moroi baero, we'amöi bakha, ba i'iagö ba ngai mboha mbawa göli. Ba labe'e zumange nitunu andrö khönia ba sumange fangorifi ere; ba ya'ia, ba sangalulu, ba zilötö mbawa göli andrö, ba aefa da'ö, ba ifuli möi baero, ba bawa göli ba lö lakusi, irege bongi. 3 Ba niha ba danö, ba sangalulu khö Yehowa, föna mbawa göli na luo sabato ba ba wasulöna. 4 Ba da'ö zumange nitunu andrö, nibe'e razo khö Yehowa: na luo sabato, ba önö rozi nono mbiri-biri, si lö si sala, ba sageu mbiri-biri si matua, 5 si lö si sala, ba nifo'awö sumange ni'a, tölutölu lauru ba mbiri-biri si matua andrö; balazi ira ha wa'ebua zumange ni'a andrö awö nono mbiri-biri andrö, ba tölu hinaoya wanikha ba zi tölu lauru. 6 Ba ba wasulöna, ba ono zaŵi si matua, si lö si sala, ba önö rozi nono mbiri-biri ba sageu mbiri-biri si matua, oi si lö si sala [nibe'e]. 7 Ba sumange ni'a, ba tölu lauru i'asiwai, awö nono zaŵi andrö, ba tölu lauru, awö mbiri-biri si matua; ba awö nono mbiri-biri andrö, ba dali ia ha wa'ebua, ba tölu hinaoya wanikha ba zi tölu lauru. 8 Ba na möi bakha razo, ba ewe'ewe mbawa göli andrö itörö, ba da'ö göi lalania we'amöi baero. 9 Ba na la'ondrasi Yehowa niha ba danö, na baŵa gowasa, ba sanörö bawa göli tanö yöu we'amöi bakha, ba bawa göli tanö raya itörö we'amöi baero, ba sanörö bawa göli tanö raya we'amöi bakha, ba bawa göi tanö yöu itörö we'amöi baero; böi latörö ba wangawuli mbawa göli nitöröra ba we'amöi bakha; ba zi fatahö a'i latörö ba we'amöi baero. 10 Ba razo, ba bakha ba hunöra so, na möi ira bakha, ba fao ia khöra, na möi ira baero. 11 Ba ba gowasa ba na luo ni'amoni'ö, ba tölutölu lauru zumange ni'a, awö nono zaŵi andrö ba awö mbiri-biri si matua; ba balazi ira ha wa'ebua ba nono mbiri-biri andrö; ba tölutölu hinaoya wanikha ba zi tölutölu lauru. 12 Ba na ibe'e game'ela saoha gölö razo, sumange nitunu ba ma sumange fangorifi, saoha gölönia khö Yehowa, ba labokai khönia mbawa göli, tanö ba gatumbukha luo; ba ibe'e sumange fangorifi, nibe'e-be'enia, na luo sabato, ba ifuli möi baero; ba no möi ia baero, ba nikusi mbawandruhö. 13 Ba ero ma'ökhö, ba sara ibe'e ono mbiri-biri si döfi fa'ebua ba si lö si sala, sumange Yehowa, sumange nitunu; ero na mahemolu mbanua ibe'e. 14 Ba ifo'awö sumange ni'a — ero mahemolu — dua dumba, ba samba hinaoya wanikha, ba wanefe hamo si sökhi andrö, sumange Yehowa, sumange ni'a, amakhoita si lö tebulö. 15 Ba si manö wame'era ono mbiri-biri andrö ba sumange ni'a andrö, awö wanikha, ero mahemolu, sumange nitunu, si lö mamalö-malö.

II. Amakhoita ba mbenua andrö, nibe'e razo buala

16 Da'ö niŵa'ö Zo'aya, Yehowa: Na ibe'e khö nononia mbenua razo, bualania, ba iraononia zokhö, ondröita. 17 Ba na khö genoninia ibe'e buala mbenua, ba ha irugi ndröfi wangefa andrö, wa khönia. Ba ba da'ö, ba mangawuli khö razo; ba benua ba ndraononia andrö, ba lö tebulö wa khöra. 18 Ba lö tola ihalö hadia ia mbenua zato razo, wamakao ya'ira, na i'ambösi dana khöra; benua khönia, ba hana na ibe'e ba ndraononia, ondröita, fa böi tetimba mbanuagu, ha niha ia, ba dana khönia.

III. Naha wondrino sumange, nibe'e gere

19 Ba ifatörödo ba mbawandruhö andrö, ba mbagolö ba zinga mbawa göli andrö ba mbate'e ni'amoni'ö andrö, nihonogöi nahia gere, tanö miyöu. Ba ba da'ö, ba so nahia ba watalinga ba wondrege tanö ba gaekhula luo. 20 Ba imane khögu: Da'ö naha andrö ba nirino gere sumange ogauta andrö ba sumange fameta horö ba ba nigore sumange ni'a andrö, fa böi la'ohe baero ba golayama, ba golayama baero, ba we'amoni'ö niha sato. 21 Ba i'ohedo baero, ba golayama baero, ifa'amöido ba watalinga golayama andrö, si öfa, ba hiza, dozi fatalinga golayama, ba so golayama [side-ide]. 22 Ba watalinga golayama andrö, si öfa, ba so golayama ni'oniagö, 40 hela wa'anau ba 30 hela wa'ebolo; no fagölö-gölö wa'ebua zi öfa andrö, nahia andrö, ba watalinga. 23 Ba no mubale kara, fasui, ma'a'öfa, ba ba gahe mbale andrö, ba so nawu, fasui. 24 Ba imane khögu: Da'ö nahia koki andrö; ba nirino zangai-ngai halöŵö ba gosali sumange nitaba andrö, nibe'e niha sato.

Famotokhi ba gahe

Fabaliŵa lala

Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö