Wb/nia/Hezekieli/1
I. Fama'ele'ö lakhömi Yehowa khö zama'ele'ö andrö
[edit | edit source]1 Me no arakha 30 fakhe ndra'o, me sodo ba ni'oloi'ö andrö ba mbewe Khebara, ba zi melima ba mbawa si öfa, ba teboka mbanua ba u'ila gangilata khö Lowalangi. 2 Ba zi melima ba mbawa da'ö (no töra mendröfa fakhe, me te'oloi'ö razo Yoyaki)[1] 3 ba humede Yehowa khö Hezekieli, ono Mbusi, ere, ba danö Galedaia, ba mbewe Khebara, ba ira'u ia tanga Yehowa, ba da'ö. 4 Ba u'ila, ilabu angi sabölö-bölö, moroi yöu, ba fao lawuo sebua, ba alitö si no amaedola nimbayaini, ba si no moragi lawuo andrö, fasui, ba moroi bakha ba galitö andrö, ba so zihaga, timba dola garamba, si takile.[2]
II. Amuata zaliŵa-liŵa andrö, sauri, solu'i dadaoma Lowalangi
[edit | edit source]5 Ba öfa nga'eu zi oroi bakha ba galitö andrö saliŵa-liŵa ba danö. Ba famaigida ya'ira, ba no monga'eu niha.[3] 6 Ba dozi ira, ba öfa'öfa mbawa ba öfa'öfa gafi.[4] 7 Ba ahera, ba no adölö, ba lalua kahera, ba no si mane lalu'a kahe nono zaŵi ba si takili, timba wa'atakile döla garamba si no mudukhu. 8 Ba barö gafira, ba tanga niha, föna ba furi ba faoma fatambai, öfa'öfa. 9 Ba bawa zi öfa andrö ba afira — oi si fatöfa ba nawöra gafi andrö — ba lö labali'ö ira, na mofanö ira, idölö manö ia zamösana. 10 Ba famaigida bawara, ba tanö föna, ba no bawa niha, ba ba gambölö, ba bawa zingo, ba zi öfa andrö, ba ba gabera, ba bawa zaŵi si matua, ba zi öfa andrö, ba bawa moyo, ba zi öfa, mibakha.[5] 11 Ba afira, ba si no mubologö miyaŵa: dua-dua zi no fatöfa, ba dua-dua mbalu-balu mbotora.[6] 12 Ba dozi, ba ladölö manö ira; heza i'o'ou ira Eheha, ba da'ö möi ira; ba lö laholehole'ö ira, na mofanö ira. 13 Ba ba gotalua zaliŵa-liŵa andrö, ba hulö mbo galitö, wamaigigu, hulö zulu sangörö-ngörö ba ba gotalua zaliŵa-liŵa andrö, ba sihaga galitö andrö, ba i'otarai galitö andrö gari mbanua. 14 Ba mangörö-ngörö zaliŵa-liŵa andrö, si mane haga gari mbanua.
III. Gaolo ba gureta dadaoma andrö
[edit | edit source]15 Ba me ufaigi na zaliŵaliwa andrö, ba hiza, ba sambuasambua gaolo ba danö, ba ngai zaliŵa-liŵa andrö si öfa nga'eu. 16 Ba gaolo andrö ba famazökhi ya'ia, ba famaigida, ba no timba wa'atakile weremata wirusi. Ba ha sambua wonga'eu zi öfa andrö; ba famaigida ba famazökhi ya'ia, ba hulö na bakha ba nawönia so zi sambua. 17 Miföna ba mifuri, ba faoma fatambai lasaŵa na mofanö; lö tobali, na mofanö. 18 Ba gama gaolo, ba no alaŵa ba sata'u ita; ba no si falawu hörö gama andrö, fasui, ba zi öfa andrö fefu.[7] 19 Ba na mofanö zaliŵa-liŵa andrö, ba mofanö gaolo andrö, ba ngaira, ba na lafazaŵa ira moroi ba danö saliŵa-liŵa andrö, ba muzaŵa göi gaolo. 20 Heza ifatörö ira Eheha, ba da'ö lasaŵa, ba ero na lafazaŵa ira, ba fao göi gaolo, me no ba gaolo so Geheha zaliŵa-liŵa andrö. 21 Na mofanö da'ö, ba mofanö göi gaolo, ba na labadugö ira, ba ahono göi gaolo, ba na lafazaŵa ira, moroi ba danö, ba fao göi wezaŵa gaolo, me no ba gaolo so Geheha zaliŵa-liŵa andrö.
IV. Dadaoma Yehowa, sihaga
[edit | edit source]22 Ba yaŵa zaliŵa-liŵa andrö, ba so zi hulö mbanua si yaŵa, si takile, timba mbaluri, sata'u ita, no tebolosö yaŵara. 23 Ba barö zi hulö mbanua andrö, ba no tebolosö gafira, no faondra; ba no dua zageu gafi, balu-balu mbotora. 24 Ba urongo ruru gafira, no timba wegoso-goso nidanö sebua, timba mbanua khö Zi lö ambö fa'abölö; na mowaö-waö ira, ba timba werararara ba golombaseŵa zanuwö li weruru andrö; ba na labadugö ira, ba sadada manö gafira. 25 Ba terongo ruru yaŵa zi hulö mbanua andrö, yaŵara; ba na labadugö ira, ba sadada manö gafira.[8] 26 Ba yaŵa zi hulö mbanua andrö, yaŵara, ba no hulö weremata nila wamaigida, amuata dadaoma, ba so zidadao ba dadaoma andrö, hulö niha wamaigida, yaŵa.[9] 27 Ba u'ila haga, timba wa'atakile döla garamba, si takile, timba haga galitö, bakha ba nahia, i'otarai zi hulö zolania wamaigida, miyaŵa; ba i'otarai zi hulö zolania ba mitou, ba no hulö galitö, wamaigigu. Ba si tefasui ya'ia, 28 ba no haga: si mane dumi, ni'ilada ba lawuo na luo moteu, si manö wamaigida haga andrö, fasui. Si manö wa'oroma lakhömi Yehowa andrö wamaigigu. Ba me u'ila, ba ufalögu tou ndra'o. Ba urongo li zihede.
Famotokhi ba gahe
[edit | edit source]Fabaliŵa lala
[edit source]Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö