Wb/nia/Hezekieli/27
I. Fange'esi Tiro. Fa'asökhi mbanua mege ba fa'ebua gana'ara[edit | edit source]
1 Ba so niŵa'ö Yehowa khögu, 2 imane: Ba ya'ugö ono niha, ö'e'esi Diro andrö, 3 ömane khönia: Si so ba mbewe nasi, ba mbewe labua, saniaga ba niha baero, ba zihene asi misa: Da'ö niŵa'ö Zo'aya, Yehowa: Ya'ugö Tiro, ba no ömane dödöu: "No fondrege zi sökhi ndra'o!"[1] 4 No ba dalu nasi so nahiamö; no maulu wa'asökhimö labe'e sanaru'ö ya'ugö. 5 No senobari moroi ba Zeniri labe'e fafamö fefu, ba eresi moroi ba hili Libano lahalö, ba wamotöla loyo ya'ugö. 6 Ba tali gae moroi ba Mbazana labe'e sola, ba bagolömö ba tetemö ba simalambuo, moroi ba hulo Ndrawa Giti, nifosinga ifö guaza.[2] 7 Ba tarafali nigili sola'ala'a, moroi ba danö Miserayi, öbologö mandreramö, ba ungu sowu waruwaru ba soyo, moroi ba mbewe nasi ba Gelisa mba'a-ba'a zino khöu. 8 Banua Zidona ba banua Garawada öhalö sanola; ba sabölö onekhe si so ba khöu, ya'ugö Tiro, ba no möi sangamuri. 9 Satua mbanua Gebala ba tuka khöra zi möi sanga'azökhi si böla ba khöu; owo ba nasi fefu, awö nono nowo, ba no so ba khöu.[3] 10 Dawa Weresia ba Dawa Ludi ba Dawa Wuti, ba no möi saradadu khöu ba wasuwöta; baluse ba tetenaulu, ba no lasaitagö ba khömö andrö, nönö-nönö lakhömiu. 11 Banua Garawada andrö ba sabölö andrö khöu [fefu], ba no so ba gölimö, fasui, ba sabölö zi so yaŵa ba maligemö. Balusera, ba no lasaitagö ba gölimö fasui; lafo'ahonoa wa'asökhimö.
II. Fa'abölö waniagara[edit | edit source]
12 Tarisi zaniagö khöu, ba wa'oya ngawalö waniaga. Firö ba si'öli ba simo mbanua ba simo itö la'ohe ba kade khöu. 13 Yawano ba Tubalo ba Mesekhi zaniaga khöu; sawuyu ba fakake töla garamba la'ohe khöu, faniaga. 14 Ma'uwu Dogarima zolohe ba kade khöu kudo gureta ba kudo ba wakudosa ba kalide kudo. 15 Dawa Dedano zaniaga khöu. No möi barö mbawau ba waniaga zihene asi misa; ifö guaza ba eu zati labe'e beo khöu. 16 Dawa Garamo zaniaga khöu, ba wa'oya ngawalö nekhe-nekhe danga khöra; feremata zumurudi ba ungu ba nukha nigili sola'ala'a ba tarafali ba meredia ba yasia la'ohe ba kade khöu, 17 Mado Yuda ba iraono Gizeraeli zaniaga khöu. Gandru moroi ba Miniti ba kue sami ba ŵe ŵani ba fanikha ba fanikha samohua la'ohe khöu faniaga. 18 Damaseko zowöliwöli khöu, ba wa'oya ngawalö nekhe-nekhe danga khöu, ba wa'afahöna waniaga, agu moroi ba Helebono ba bu mbiri-biri, moroi ba Zakhara, si takile fa'afusi, la'ohe. 19 Wedano ba Yawano ba Usala zolohe faniaga ba kade khöu; fakake si'öli ba kuli mani ba deringu la'ohe khöu faniaga. 20 Dedano zaniaga khöu, dane-dane zela kudo, ba wakudosa. 21 Dawa Ara ba salaŵa Gedara fefu, ba no so barö mbawau saniaga: ono mbiri-biri ba biri-biri si matua ba nambi si matua la'ohe: da'ö waniagara khöu. 22 Sikoli Zaba ba sikoli Raema zaniaga khöu. Fondrege zi sökhi rembaremba, awö ngawalö weremata ba ana'a la'ohe ba kade khöu. 23 Harana ba Kane ba Edena, sikoli Zeba ba sikoli Dawa Asiria ba sikoli Gilimada zaniaga khöu. 24 Faniagara ba kade khöu, ba baru luo ba baru sebua ungu sowu waruwaru ba nukha nigili sola'ala'a ba ambala sokhoikhoi ba sinali ni'otaŵi gatölu ba sinali nitali. 25 Owo Darisi zolohe faniaga khöu, ba tobali sebua ana'a ndra'ugö ba sebua lakhömi, ba dalu nasi.
III. Fa'adudunia ba fange'esi da'ö[edit | edit source]
26 Misi tou ba nasi la'ohe ndra'ugö sanola owou; — ba irasa ndra'ugö angi timu, ba dalu nasi. 27 Ana'amö ba faniagamö ba ösi lafo ba ono nowo khöu ba sangamuri, sanga'azökhi si böla khöu, ba samawamawa faniaga andrö khöu ba saradadumö, fefu, si so yomo ba mbanua khöu, fabaya niha sato fefu khöu, ba sahöndrö ba dalu nasi dania, na luo wa'adudumö. 28 Ba ba we'ira-ira zangamuri andrö khöu, ba humisi nowo soya. 29 Ba dozi sangamuri, ba laröi nowora; ono nowo ba dozi sangamuri, ba nasi, ba möi yaŵa ba danö. 30 Ba la'e'esi ndra'ugö ba mu'ira-ira ba lalau gawu-gawu ba högöra, ba lahawui ira awu.[4] 31 Latöwö mbura, börö ndra'ugö, ba la'onukha nukha ba wa'abu dödö ba mege-ege ira ba khömö andrö, abu sibai dödöra, afökhö sibai khöra. 32 Ba ba wa'abu dödöra andrö, ba mangarö-ngarö ira ba khömö andrö, ba la'e'esi ndra'ugö lamane. Ha niha zi no si mane Tiro andrö, si lö nini-nini sa'ae bakha ba dalu nasi! 33 Me möi yaŵa moroi ba nasi waniagamö andrö, ba no oya soi zabuso öbe'e; ba wa'ebua gana'amö ba ba wa'oya waniagamö, ba no öfo'ana'a razo ba guli danö. 34 Ba iya'e, ba no aboto ndra'ugö, no aheta'ö ba nasi yaŵa; no ahöndrö si tou waniagamö andrö, fabaya niha sato fefu, ösiu. 35 Dozi si hene asi, ba tobali dödö ba khömö andrö, ba humokha mbu zalaŵara, mangerau mbawa. 36 Saniaga andrö ba niha bö'ö, ba la'o'aya ndra'ugö; no i'ogomuzaö adudu ndra'ugö, ba lö'ö manö ya'ugö sa'ae.
Famotokhi ba gahe[edit | edit source]
Fabaliŵa lala[edit source]
Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö