Wb/nia/Hezekieli/39

Tohu-tohu wama'ele'ö andrö, nitandrösaigö khö Gogi ba ba Magogi:

I. Tefaulugö dania wamakiko Gogi

1 Ba ama'ele'ö, ya'ugö ono niha, nitandrösaigö khö Gogi andrö, ömane: Da'ö niŵa'ö Zo'aya, Yehowa: Hiza, ulau khöu, ya'ugö Gogi, Razo ba Rosi ba ba Mesekhi ba ba Dubala, 2 ba udönisi ndra'ugö ba ufasao'ö ba u'ohe miyaŵa ndra'ugö, moroi ba wondrege yöu, u'ohe ba hili Ndraono Gizeraeli ndra'ugö. 3 Ba utimba ba dangau kabera wana ba ahele ba dangau kambölö nono wana ube'e. 4 Ba hili Ndraono Gizeraeli mate ndra'ugö, ya'ugö ba sabölö andrö khöu fefu, awö soi bö'ö andrö awöu. Ba wofo sandra'undra'u andrö, ba zo'afi fefu ba ba gutu ndru'u ba danö utehe ndra'ugö, öra. 5 Baero ba mbenua tegaölö tou ndra'ugö, me no ya'o zanguma'ö, iŵa'ö So'aya, Yehowa. 6 Ba ugule'ö galitö ba Magogi ba ba zihene asi andrö, si lö fa'abu dödö, ena'ö aboto ba dödöra, wa no ya'odo Yehowa! 7 Ba terongo döigu ni'amoni'ö bakha ba hunö mbanuagu Iraono Gizeraeli ube'e, ba lö'ö sa'ae ube'e ni'o'aya döigu andrö, ni'amoni'ö, ena'ö aboto ba dödö niha baero, wa no ya'odo Yehowa, ni'amoni'ö ba Ndraono Gizeraeli. 8 Hiza, itörö, alua, iŵa'ö So'aya, Yehowa: da'ö mbaŵa andrö niŵa'ögu. 9 Ba möi baero dania zi so ba mbanua Ndraono Gizeraeli ba labe'e fangebua galitö ba fangasoso gö wangöna andrö, dange ba baluse ba fana ba ono wana ba bago gama ba toho, mewitu fakhe wa'ara labe'e fangebua galitö da'ö. 10 Lö lahalö geu ba mbenua, lö la'obö ba gatua; fangöna andrö labe'e fangebua galitö ba larabu gama-gama zorabu, gama-gamara mege, ba lahalö gana'a zangai ana'ara mege, iŵa'ö So'aya, Yehowa. 11 Ba na luo da'ö ba uhonogöi naha Gogi, naha lewatönia ba Ndraono Gizeraeli, ba ndraso zikoli andrö, tanö ba gatumbukha, na ta'otarai nasi; ba tobali ba'a-ba'a lala zikoli. Ba da'ö lako'o dania Gogi, fabaya sabölö andrö khönia fefu, ba labe'e töi ndraso andrö ndraso zato andrö khö Gogi. 12 Ba fitu waŵa, wa'ara la'oko'o'ö ira Iraono Gizeraeli, ba wangehao tanö. 13 Niha sato ba danö fefu zogo'o ya'ira, ba tobali fangebua döira, na luo ufa'ele'ö lakhömigu, iŵa'ö So'aya, Yehowa. 14 Ba latutuyu dania niha, lafataro ba wanöröi tanö, ba wogo'o si tosai na tou ba danö, sikoli, ba wangehao tanö, na no aefa zi fitu wawa, ba la'aalu-alui. 15 Ba na latöröi danö ba na so zangila töla niha, ba yamube'e dandra ba ngai, irege lako'o ba ndraso zato andrö khö Gogi sogo'o si mate andrö. 16 Ba labe'e töi mbanua Hamona ("sato") Ba lahaogö danö ba zi manö.

II. Ba da'ö dania to'ele lakhömi Yehowa ba niha baero

17 Ba ya'ugö ono niha, da'ö niŵa'ö Zo'aya, Yehowa: Ömane ba wofo andrö so'afi, fefu ba ba gutu ndru'u ba mbenua, fefu: Mi'owuloi ami ba mi'aine, mifa'aso ami, moroi ba zi fasui fefu, ba wemanga zumange andrö ni'asogögu khömi, — sumange sebua ba hili Ndraono Gizeraeli, ba niami ösi ba ba nibadumi do. 18 Ösi zabölö mi'a ba do zalaŵa ba guli danö mibadu: biri-biri si matua ba ono mbiri-biri ba nambi si matua ba ono zaŵi, awö nibula mbanua Mbazana fefu! 19 Ba tawö mi'a, irege abuso ami ba do mibadu, irege mabu ami, sumange andrö khögu, ni'asogögu khömi. 20 Ba wemanga khögu abuso ami kudo ba koreta ba sabölö ba sanuwö, ha niha ira, iŵa'ö So'aya, Yehowa. 21 Ba ufa'ele'ö ba niha baero lakhömigu andrö, ba dozi niha, ba la'ila huku andrö, nifatörögu, ba tangagu, fombambaya ya'ira. 22 Ba ba ma'uwu Gizeraeli, ba ya aboto ba dödö, wa no ya'odo Yehowa, Lowalangira, i'otarai luo da'ö, ba mitou dania. 23 Ba ba niha baero, ba ya aboto ba dödö, wa no lalö Ndraono Gizeraeli mbörö, wa no tetibo ira, — börö me no la'erogö ndra'odo; tobali ubini'ö mbawagu khöra, ba ube'e ira ba danga nemalira, ba tobali ahori mate ira ba mbawa zi'öli. 24 Dali ba wolaugu khöra wa'ara'iöra ba fangerogöra ya'odo, ba no ubini'ö mbawagu khöra.

III. Ba Iraono Gizeraeli, ba banua Yehowa

25 Andrö wa imane So'aya, Yehowa: Iya'e, ba u'ohe mangawuli ni'oloi'ö andrö, ma'uwu Yakobo, ba uhakhösi tödö Ndraono Gizeraeli fefu, ba amaedola zolohu ndra'o, ba döigu andrö ni'amoni'ö. 26 Ba akha olifu ira wa'ailara andrö ba fangerogöra ya'odo fefu, na ahono zui ira ba danö, lö hadia ia, lö si keani ya'ira. 27 Na u'ohe mangawuli ira, moroi ba niha baero, ba na u'ozaragö ira ba danö nemalira; ba ufa'ele'ö ba khöra andrö, wa no ni'amoni'ö ndra'o, ba zanehe niha baero, soya soi, 28 ena'ö aboto ba dödöra, wa no ya'odo Yehowa Lowalangira, me noa sa utibo'ö ira ba niha baero misa, ba me no ufuli u'ozaragö ira ba danöra; samösa lö uröi furi ba da'ö. 29 Ba lö'ö sa'ae ubini'ö mbawagu khöra, me no ulau Gehehagu ba ma'uwu Gizeraeli, iŵa'ö So'aya, Yehowa.

Famotokhi ba gahe

Fabaliŵa lala

Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö