Wb/nia/Hezekieli/40

Angilata Hezekieli: osali si bohou.

I. Famobörö

1 Ba ndröfi si dua wulu a lima, aefa te'oloi'ö ndra'aga, me böröta ndröfi, ba zi mewulu ba mbawa si föföna, meweleöfa fakhe aefa atu'a zanuwö ba Yeruzalema, — me luo da'ö ituyu ndra'o tanga Yehowa, ba i'ohedo ba da'ö. 2 Ba gangilata soroi ba Lowalangi i'ohedo ba danö Ndraono Gizeraeli ba itou'ö tou ndra'o ba hili salaŵa; ba ba da'ö, ba no so ba gametahögu zi hulö mbanua nitaru'ö. 3 Ba me no i'ohedo ba da'ö, ba oroma niha, hulö döla garamba wamaigigu, sinali tarafali ba helo ba dangania; ba singa mbawa göli so ia. 4 Ba humede khögu niha andrö, imane: He ono niha, nehegö ba fondrondrongo ba töngöni fefu ni'oroma'ögu khöu. Ba da'ö te'ohe ndra'ugö ba da'e, ena'ö la'oroma'ö khöu; ba ahori ö'ombakha'ö ba ma'uwu Gizeraeli ni'ilau!

II. Bawa göli ba golayama tanö baero ba ewe-ewe

5 Ba hiza göli kara baero gosali, fasui, ba so helo ba danga niha andrö, ono hela wa'anau, sahesahela a lalu'a hela andrö. Ba isu'a wa'ebolo nomo andrö: sahelo, ba fa'alaŵa, ba sahelo göi. 6 Ba möi ia bakha ba mbawa göli, si otahögö atumbukha luo; möi ia miyaŵa ba mbosinia ba isu'a doyo mbawa göli: sahelo wa'ebolo, sara toyo ba sahelo wa'ebolo, 7 ba si hulö mbate'e side-ide andrö, ba sahelo wa'anau ba sahelo wa'ebolo, ba otalua zi hulö mbate'e side-ide andrö, ba lima hela, ba toyo mbawa göli ba ngai gewe'ewe ba mbawa göli andrö, tanö bakha, ba no sahelo. 8 Ba isu'a gewe'ewe andrö, ba mbawa göli, tanö bakha, ba sahelo. 9 Ba isu'a gewe'ewe andrö ba mbawa göli, ba no ŵalu hela, ba ehomonia, ba dua hela; ba ewe'ewe andrö ba mbawa göli, ba no mibakha. 10 Ba si hulö mbate'e side-ide andrö ba mbawa göli, si otahögö atumbukha luo, ba tölutölu, fatambai. No fagölö-gölö wa'ebua zi tölu andrö; ba si manö göi gehomo andrö fatambai: no fagölöhölö wa'ebua. 11 Ba isu'a wa'ebolo mbawa göli, ba no fulu hela; fa'anau mbawa göli, ba feledölu hela. 12 Ba föna zi hulö mbate'e side-ide andrö, ba so darali, sahesahela darali andrö, fatambai; ba si hulö mbate'e andrö, ba önö'önö hela, fatambai. 13 Ba isu'a mbawa göli, i'otarai zagö mbate'e si sambua, numalö ba zagö zi sambua: dua wulu a lima hela wa'ebolo, no fatahö mbawandruhö. 14 Ba ewe'ewe andrö, ba dua wulu, ba bate'e andrö ba mbawa göli, ba no mibaero ba golayama, fasui. 15 Ba i'otarai föna mbawa göli, lala mibakha, irugi föna gewe'ewe ba mbawa göli tanö bakha, ba no lima wulu hela. 16 Ba bawa göli, ba no fasui zandrela, si no ahole ba wangotahögö si hu'ö mbate'e andrö ba ehomonia andrö, tanö bakha, ba si manö göi gewe'ewe andrö, no fasui zandrela, mibakha, ba ba gehomo andrö, ba famaedo nohi. 17 Ba i'ohedo bakha, ba golayama tanö baero. Ba so mbate'e ba da'ö, ba no mulau mbale ba golayama, fasui; tölu ngafulu mbate'e side-ide ba zinga mbale andrö. 18 Ba ngai mbawa göli so mbale andrö, dali wa'anau mbawa göli, bale tanö tou andrö. 19 Ba isu'a wa'ebolo golayama, i'otarai föna mbawa göli tanö tou, irugi wondrege golayama tanö bakha: otu hela tanö ba gatumbukha luo ba tanö miyöu. 20 Ba bawa göli ba golayama tanö baero, si otahögö tanö miyöu, ba isu'a, fa'anau ba fa'ebolo. 21 Ba si hulö mbate'e side-ide ba da'ö, ba tölutölu, no fatambai, ba ehomonia ba ewe'ewenia, ba no falaŵalaŵa ba mbawa göli no mege; lima wulu hela wa'anau ba dua wulu a lima hela wa'ebolo. 22 Ba sandrelania ba ewe'ewenia ba famaedo nohi andrö, ba no falaŵa ba mbawa göli andrö, si otahögö tanö ba gatumbukha luo; fitu bosi lala miyaŵa khönia, ba fönania gewe'ewenia andrö. 23 Ba bawa göli ba golayama tanö bakha, ba no faudu ba mbawa göli tanö miyöu ba ba mbawa göli tanö ba gatumbukha luo. Ba isu'a, i'otarai mbawa göli si sambua, numalö ba zi sambua: otu hela. 24 Ba i'ohedo miraya; ba so ba da'ö mbawa göli si otahögö tanö miraya. Ba isu'a gehomonia ba ewe'ewenia, ba no falaŵalaŵa ba zu'a-su'a no mege. 25 Ba no mosandrela, si mane ewe'ewenia göi, fasui, si mane sandrela no mege; lima wulu hela wa'anau ba dua wulu a lima hela wa'ebolo. 26 Ba fitu bosi lala miyaŵa khönia, ba fönania gewe'ewenia. Ba so wamaedo nohi, sagesageu, fatambai, ba gehomonia. 27 Ba sambua mbawa göli ba golayama tanö bakha, si otahögö tanö miraya, ba isu'a, i'otarai mbawa göli si sambua, numalö ba zi sambua, miraya: otu hela.

III. Bawa göli ba golayama tanö bakha, tölu

28 Ba i'ohedo ba golayama tanö bakha, ifatörödo, ba mbawa göli tanö miraya ba isu'a mbawa göli tanö miraya ba zu'a-su'a no mege, 29 ba si hulö mbate'e side-ide andrö ba ehomonia ba ewe'ewenia, ba zu'a-su'a da'ö göi. Ba no mosandrela, si mane ewe'ewenia göi, fasui; lima wulu hela wa'anau ba dua wulu a lima hela wa'ebolo. 30 Ba no mo'ewe'ewe, fasui, dua wulu a lima hela wa'anau ba lima hela wa'ebolo. 31 Ba ewe'ewenia, ba no tanö ba golayama tanö baero, ba ba gehomonia, ba famaedo nohi, ba ŵalu bosi lala miyaŵa. 32 Ba i'ohedo ba mbawa göli, tanö ba gatumbukha luo, ba isu'a mbawa göli andrö, ba zu'a-su'a no mege. 33 Ba bate'e side-ide andrö ba ehomonia, ba ewe'ewe andrö khönia, ba no falaŵalaŵa göi, ba no mosandrela, si mane ewe'ewe andrö khönia, fasui; lima wulu hela wa'anau ba dua wulu a lima hela wa'ebolo. 34 Ba ewe'ewenia, ba i'otahögö golayama tanö baero, ba famaedo nohi ba gehomonia, faoma fatambai; ŵalu bosi lala miyaŵa khönia. 35 Ba i'ohedo ba mbawa göli tanö yöu ba isu'a, 36 ba zu'a-su'a no mege, bate'e side-ide andrö khönia ba ehomonia ba ewe'ewenia, ba no mosandrela, fasui; lima wulu hela wa'anau ba dua wulu a lima hela wa'ebolo. 37 Ba ewe'ewenia, ba i'otahögö golayama tanö baero, ba famaedo nohi ba gehomonia, fatambai; ŵalu bosi lala miyaŵa khönia.

IV. Bate'e awö meza ba golayama tanö bakha ba hadia gunania

38 Ba so mbate'e; ba gewe'ewe mbawa göli andrö so mbawandruhönia, naha ba wanasai sumange nitunu. 39 Ba barö gewe'ewe mbawa göli andrö, ba no dombudombua meza, no fatambai, naha ba wanaba sumange nitunu ba sumange fameta horö ba sumange ogauta. 40 Ba ba zinga mbagolö tanö baero, tanö miyöu, na so zanörö bawa göli miyaŵa, ba no dombua meza, ba ba zinga mbagolö ba zi tambai, ba gewe'ewe mbawa göli, ba dombua göi meza; öfa'öfa meza, 41 no fatambai, ba zinga mbagolö mbawa göli andrö; ŵalu meza naha ba wanabanaba sumange. 42 Öfa meza ba zumange nitunu, kara, si öfa sagi, sahela a matonga wa'anau ba sahela a matonga wa'ebolo ba sahela wa'alaŵa, ba wanou'ö ba da'ö fakake andrö, nifake ba wanaba sumange nitunu ba sumange nitaba. 43 Ba no mufosinga mibakha, lalu'a wa'ebolo, fasui, ba ba meza andrö labe'e-be'e nösi zumange andrö. 44 Ba föna mbawa göli tanö bakha, ba so mbate'e, nahia zanunö ba golayama tanö bakha, sambua ba zinga mbagolö mbawa göli tanö yöu, ba i'otahögö danö miraya, ba sambua ba zinga mbagolö mbawa göli tanö ba gatumbukha luo, si otahögö tanö miyöu. 45 Ba imane khögu: Bate'e andre, si otahögö tanö miraya, ba moguna nahia gere, sangai-ngai halöŵö bakha ba gosali. 46 Ba bate'e andrö, si otahögö tanö miyöu, ba moguna nahia gere, sangai-ngai halöŵö ba naha wame'e sumange. Ma'uwu Zadoki da'ö; ha da'ö ma'uwu Lewi si tola mangahatö'ö ya'ira khö Yehowa, ngoni-ngoninia. 47 Ba isu'a golayama andrö: otu hela wa'anau ba otu hela wa'ebolo, si öfa sagi. Ba föna gosali so naha wame'e sumange. 48 Ba i'ohedo ba gewe'ewe gosali, ba isu'a gewe'ewe gosali andrö, lima hela dambai, ba fa'ebolo mbawa göli, ba feleöfa hela, ba bagolö mbawa göli, ba no tölu hela dambai. 49 Fa'anau gewe'ewe andrö, ba dua wulu hela, ba fa'ebolo, ba felendrua hela, ba fulu bosi lala miyaŵa khönia. Ba ba ngai gehomo andrö, ba so zi hulö daru nahe, faoma fatambai.

Famotokhi ba gahe

Fabaliŵa lala

Olayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö