Jump to content

Wb/nia/Hezekieli/44

From Wikimedia Incubator
< Wb‎ | nia‎ | Hezekieli
Wb > nia > Hezekieli > 44

Tohu-tohu:

I. Nihonogöi ba mbawa göli andrö, ba bawandruhö ba ni'amoni'ö[edit | edit source]

1 Ba i'ohe mangawuli ndra'o, masaŵa mbawa göli ba ni'amoni'ö, bawa göli baero si otahögö atumbukha luo; ba si no mukusi da'ö. 2 Ba imane khögu Yehowa: Böi tebulö nikusi mbawa göli andre, böi labokai. Lö tola itörö niha; me no itörö ia Yehowa, Lowalangi Ndraono Gizeraeli, we'amöi bakha, andrö wa lö labokai ia.[1] 3 Ba razo zidadao ba da'ö, ba wemanga andrö, föna Yehowa. Ba gewe'ewe mbawa göli andrö itörö we'amöi bakha, ba da'ö göi lalania ba wangawuli.[2] 4 Ba i'ohedo tanö ba mbawa göli yöu, föna gosali; ba u'ila wa'anönö gosali Yehowa lakhömi Yehowa, ba ufalögu tou ndra'odo.[3] 5 Ba imane khögu Yehowa: He ono niha, töngöni ba faigi höröu ba fondrondrongo tögi dalingamö fefu niŵa'ögu khöu iya'e, ba nihonogöi andrö fefu, ba gosali Yehowa, awö nifakhoi ba khönia, fefu; töngöni lala ba we'amöi bakha ba gosali, awö lala we'amöi baero, na la'otarai ni'amoni'ö andrö. 6 Ba ömane ba zabe'e tandro andrö, ba ma'uwu Gizeraeli: Da'ö niŵa'ö Zo'aya, Yehowa: No abönö wa'ara wolau-laumi sogoro ita andrö khömi, 7 ya'ami ma'uwu Gizeraeli, me no mi'ohe bakha niha bö'ö, si lö muboto tödö, ba he ösi, me no mitehe so ira ba ni'amoni'ö andrö khögu, ba wango'aya osali khögu, na mibe'e gögu, tawö ba do, ba tobali midudugö wawu'usa li andrö khögu, nönö-nönö zogoro ita andrö khömi, fefu.[4] 8 Ba no lö mi'o'ö nifakhoi ba ni'amoni'ö andrö khögu; nikhoi dödömi zi no mibe'e dali a'ine, ba wamataro sanaro ba ni'amoni'ö andrö khögu.

II. Nihonogöi ba Nono Lewi[edit | edit source]

9 Da'ö niŵa'ö Zo'aya, Yehowa: Lö tola möi bakha ba ni'amoni'ö andrö khögu niha bö'ö si lö muboto tödö ba si lö muboto ösi, — niha bö'ö andrö fefu, si no fatewu ba Ndraono Gizeraeli. 10 Ono Lewi a'ine, si no mangerogö ya'odo, me elungu Ndraono Gizeraeli, me no laröi ndra'odo, wame'e-me'e adu andrö khöra, fa'elungu, da'ö zolui lalöra andrö. 11 Ba sangai-ngai halöŵö ba ni'amoni'ö andrö khögu ira, sanaro ba mbawandruhö gosali ba ngoni-ngoni ba gosali; sanabanaba sumange nitunu ba sumange nitaba ira, sumange nibe'e zato; la'iagö sanolo ya'ira, ngoni-ngonira.[5] 12 Me no möi ira ngoni-ngonira ba nadura andrö [föna], ba me no tobali tandraŵa golalöŵa ira ba ma'uwu Gizeraeli, andrö wa no ufazaŵa dangagu khöra, iŵa'ö So'aya, Yehowa; ba lalu'i lalöra andrö. 13 Lö tola lahatö'ö ira khögu, ba wangai-ngai halöŵö gere andrö khögu, we'amöi ba ni'amoni'ö andrö khögu fefu, ba ni'amoni'ö sibai andrö. Lalu'i wa'ailara a'ine, awö wotu ba zogoro ita andrö khöra, nilaura. 14 Ba wangai-ngai halöŵö ba gosali ufataro ira — halöŵö ngoni-ngoni andrö ba hadia ia, fefu, nihalö-halö ba da'ö, ba ya'ira zangai-ngai.

III. Nihonogöi ba gere, hadia gamonita khöra ba hadia zinemara[edit | edit source]

15 Ba ere Ono Lewi andrö — nga'ötö Zadoki —, sangai-ngai halöŵö ba ni'amoni'ö andrö khögu, mege, me la'erogö ndra'odo Iraono Gizeraeli, da'ö zangahatö'ö ya'ira khögu, ngoni-ngonigu, ba la'ondrasi ndra'odo, ba wame'e khögu tawö ba do, iŵa'ö So'aya, Yehowa.[6] 16 Möi ira bakha ba ni'amoni'ö andrö khögu ba lahatö'ö ira ba meza khögu, ngoni-ngonigu, sangai-ngai halöŵö khögu. 17 Ba na latörö mbawa göli, we'amöi ba golayama tanö bakha, ba baru tarafali la'obaru; lö tola labe'e ba nösira mbu mbiri-biri, na lahalö-halö halöŵöra barö mbawa göli golayama tanö bakha ba ba gosali.[7] 18 Saembu tarafali ba högöra ba saraeŵa tarafali ba wahara; böi la'onukha zaböböi ira.[8] 19 Ba na möi ira baero, ba golayama baero, ba niha sato, ba laheta nukhara, nukhara ba halöŵöra mege, ba latou'ö tou ba mbate'e andrö, ba nukha bö'ö la'onukha, fa böi la'amoni'ö zato, ba nukhara andrö.[9] 20 Böi lafatöwö'ö ira, ba böi göi ladudu mbu, nifalo'o a'i mbura.[10] 21 Ba agu, ba böi ibadu ere, na möi ira ba golayama bakha.[11] 22 Ba lö tola lahalö lakha ba he ira alawe nitibo'ö; ono alawe a'i lahalö, ono ma'uwu Gizeraeli; ba lakha gere sa, ba hana na lahalö.[12] 23 Ba banuagu ba lafahaö he wisa wa'afaehu ni'amoni'ö ba zi tenga ni'amoni'ö, ba fa'afaehu zi ra'iö ba zi sökhi, ba labotokhi ba dödöra.[13] 24 Ba samatunö huhuo ira; huku khögu la'o'ö ba wanguhuku, ba oroisagu, awö nifakhoigu, ba latöngöni ba luo ni'amoni'ö andrö khögu fefu, ba la'amoni'ö zabato andrö khögu.[14] 25 Ba mboto zi mate, ba böi lahatö'ö ira, fa böi ra'iö ira; ha na amara ba ma inara ba ma onora matua ba ma onora alawe ba ma talifusöra matua ba ma talifusöra alawe, si lö murai muhalö, ba hana na ra'iö ira.[15] 26 Ba na no mufuli muhaogö, ba fitu bongi na la'erai khönia.[16] 27 Ba na luo ifuli möi ba ni'amoni'ö, ba golayama bakha, ba wangai halöŵö ba ni'amoni'ö, ba ibe'e zumange fameta horö andrö khönia, iŵa'ö So'aya, Yehowa. 28 Tana khöra benua, ba lö labe'e khöra — no ya'odo dana khöra — ba böi mibe'e khöra zotöi khöra dania: no ya'odo gokhötara![17] 29 Sumange ni'a andrö ba sumange fameta horö ba sumange ogauta, da'ö göra, ba hadia fefu nilakha'ö, ba Ndraono Gizeraeli, ba khöra. 30 Ba si sökhi zi a'a, hadia ia ngawalö fefu ba hadia ia ngawalö zumange, nihalö fegero, fegero andrö fefu, ba zumange nihalö fegero, ba ere zanema. Ba si a'a hamo khömi, ba khö gere mibe'e, ena'ö möi howu-howu ba nomomi mibe'e.[18] 31 Ba hadia zi mate ba he nira'u wofo ba he nisasawi gutu ndru'u, ba lö tola la'a ere.[19]

Famotokhi ba gahe[edit | edit source]

  1. Faigi 43:4
  2. Faigi 45:7, MozII 29:32
  3. Faigi 43:5
  4. MozIII 3:17
  5. Nga'ötI 23:28
  6. Faigi 40:46; 48:11
  7. MozIII 16:4
  8. MozII 28:42
  9. Faigi 42:14; MozIII 16:4,23
  10. MozIII 19:27; 21:5
  11. MozIII 10:9
  12. MozIII 21:7,13,14
  13. MozIII 10:10; Faigi 22:26
  14. MozV 17:8; Nga'ötII 19:10
  15. MozIII 21:1–4
  16. MozIV 19:11
  17. MozIV 18:20; MozV 10:9
  18. MozII 13:2
  19. MozIII 22:8; MozII 22:31

Fabaliŵa lala[edit source]

Olayama Hezekieli: 123456789101112131415161718192021222324252627282930313233343536373839404142434445464748

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö