Wb/nia/Moze II/5
Itimba manö ndra Moze Aʼaroni Faraʼo. Ladouʼö wamakao Iraono Gizeraëli[edit | edit source]
I . 1 Aefa daʼö, ba möi ndra Moze Aʼaroni, ba lamane khö Waraʼo: Daʼö niŵaʼö Yehowa, Lowalangi Ndraono Gizeraëli: Fofanö mbanuagu andrö, enaʼö möi ira ba danö si mate molau owasa.
2 Ba imane Faraʼo: Ha niha Yehowa andrö, fa ufondrondrongo linia, fa ufofanö Ndraono Gizeraëli? Lö uʼila Yehowa, ba löʼö göi ufofanö Ndraono Gizeraëli!
3 Ba lamane: No falukha khöma Lowalangi niha Heberaio andrö; ba fofanö ndraʼaga, tölu ngaluo fofanö ba danö si mate, enaʼö mabeʼe zumange khö Lowalangima Yehowa, fa böi ifatörö khöma wökhö waba, ba ma siʼöli. [1]
4 Ba itema lira razo Miserayi, imane: Hana wa midönisi niha, fa laböhöli halöŵöra, yaʼami Moze ba Aʼaroni? miʼae ba halöŵömi!
5 Ba imane na Faraʼo: Hiza, no töra waʼato niha ba danö, ba omasi na ami, na labato halöŵöra?
6 Ba me luo daʼö, ba ibeʼe goroisa Faraʼo ba mandru andrö, nifataro khöra ba ba zamaigimaigi halöŵöra, imane:
7 Böi saʼae mibeʼe döla wakhe ba niha andrö, si mane föna, ba wamazökhi kara tembo andrö, yaʼira zi möi mangalui töla wakhe khöra.
8 Ba faʼoya gara tembo, si no muhuku, nifazökhira, irege maʼökhṍ, ba böi milulu khöra, maʼifu böi miböhöli. Ambö halöŵöra, andrö laforege wangandrö: Damöiga mameʼe sumange khö Lowalangima!
9 Niʼabeʼeʼö halöŵö ba niha andrö, fa aʼoi dödöra ba daʼö ba fa böi lafondrondrongo waya!
10 Ba möi mandru andrö ba samaigimaigi yaʼira, ba lamane ba niha sato: Daʼö nihonogöi Waraʼo: löʼö saʼae ufabeʼeʼö khömi döla wakhe;
11 yaʼami zi möi mamaigi töla wakhe khömi, heza misöndra; ba maʼifu sa lö lawuwu halöŵömi.
12 Ba latöröi danö Miserayi maʼasagörö, ba wangalui töla wakhe, niraʼa.
13 Ba laforege khöra mandru andrö, lamane: Böi ambö halöŵömi, halöŵö maʼṍkhö, si mane mege, me so döla wakhe.
14 Ba samaigimaigi Iraono Gizeraëli, nifataro mandru andrö khö Waraʼo khöra ba lafaböziʼö ba lamane khöra: Hana wa lö ahori mirugi menewi ba me dua wongi ndrohundrohu gara tembo andrö, nihuku khömi mege?
Fangaröngaröra ba faʼabua gölöra. Fangandrö Moze[edit | edit source]
II . 15 Ba möi zamaigimaigi Iraono Gizeraëli andrö, mangaröngarö ira khö Waraʼo, lamane: He Tua! hana wa öfatörö khöma daʼö?
16 Löʼö saʼae labeʼe khöma döla wakhe, ba lamane zui: Da gara tembo! ba hiza, tebözibözi naʼi ndraʼaga; mosala mbanuamö.
17 Ba imane: Sareu ami, sareu! Andrö mimane: Möiga mamosumange Yehowa.
18 Midölö ami ba halöŵömi andrö. Töla wakhe, ba lö labeʼe khömi, ba ndrohundrohu gara tembo andrö, ba ahori miʼasogö!
19 Ba tosasa zamaigimaigi Iraono Gizeraëli andrö, me no lamane khöra: Ndrohundrohu gara tembo maʼṍkhö, ba maʼifu lö lawuwu khömi!
20 Ba me laʼotarai khö Waraʼo, ba falukha ira ndra Moze Aʼaroni, si so ba daʼö, ba wamaondragö yaʼira,
21 ba lamane khöra: Yamuhuku ami Lowalangi ba yamufaigi khöma lala, me no mofönu khöma Waraʼo, awö ngoningoninia, mibeʼe, ba me no mibeʼe ba dangara ziʼöli, ba wamunu yaʼaga.
22 Ba humede zui Moze khö Yehowa, imane: He Soʼaya! Hana wa öfatörö ba khöra wamunu andrö? Ba hadia guna wamatengeu yaʼodo?
23 Götö wa no möi ndraʼo khö Waraʼo, ba wehede khönia salahiu, ba iʼabölögö na wamakao yaʼira, ba löʼö manö niʼefaʼöu banuamö andre.
Famotokhi ba gahe[edit source]
- ↑ Faigi 3, 18.
Fabaliŵa lala[edit source]
Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö