Wb/nia/Moze II/40
I. Oroisa ba wama'anö ose andrö ba ba we'amoni'ö ya'ia awö wakake awö gere[edit | edit source]
1 Ba humede Yehowa khö Moze, imane:[1]
2 Ba desa'a ba mbaŵa si föföna öfa'anö nahia ose wama'ele'ö andrö,[2] 3 ba öbe'e bakha dawöla gamabu'ula li andrö ba öba'a dawöla ba'a-ba'a andrö.
4 Ba öbe'e bakha göi meza andrö ba öbe'e yaŵa nifinaetagö andrö [roti], öfa'anö; ö'ohe bakha naha wandru andrö ba öbe'e yaŵa wandrunia.
5 Ba naha wanunu kumöyö andrö, ana'a, ba föna dawöla zura goroisa öbe'e ba ötaŵi mba'a-ba'a mbawandruhö nose.
6 Ba naha wame'e sumange nitunu, ba ba zinga mbawandruhö ba nahia ose wama'ele'ö öfa'anö, 7 ba gala andrö, ba ba gotaluara nose wama'ele'ö naha wame'e sumange andrö öbe'e, ba ölau yaŵa nidanö.
8 Ba öfa'anö mba'a-ba'a golayama andrö, fasui, ba ötaŵi mba'a-ba'a mbawa göli ba golayama.
9 Ba öhalö wanikha andrö, famayoini, ba öbayoini nose, awö nösinia fefu, ö'amoni'ö, awö wakake khönia fefu, ena'ö ni'amoni'ö. 10 Ba he naha wame'e sumange nitunu göi, fabaya fakake andrö khönia, fefu, ba öbayoini, ö'amoni'ö naha wame'e sumange andrö, ena'ö ni'amoni'ö sibai. 11 Ba he gala andrö, fabaya ahenia, ba öbayoini ba ö'amoni'ö.
12 Ba öŵa'ö khö Ga'aroni ba ba ndraononia, ndramu'iagö zinga mbawandruhö nose wama'ele'ö, ba öfemondri ira.[3] 13 Ba öfonukha Ga'aroni nukha ni'amoni'ö andrö, öbayoini ia, ö'amoni'ö, ena'ö ihalö halöŵö gere.
14 Ba öŵa'ö ba nononia, ndramu'ondrasi, ba öfobaru ira kameza; 15 ba öbayoini ira, si mane famayoiniu amara, ena'ö ere ira khögu, ba ba wamayoini andrö tetehe khöra, ere ira, si lö mamalö-malö, götö-götö wa'ara.
II. La'o'ö goroisa andrö[edit | edit source]
16 Ba i'o'ö sibai Moze niŵa'ö Yehowa khönia; si manö wolaunia.
17 Ba desa'a ba mbaŵa si föföna, ba ndröfi si dua tefa'anö nahia andrö. 18 Ifa'anö nahia andrö Moze: ifedadao gahe ba itaru'ö yaŵa wafa andrö, ifa'anö lazi ba ifasindro daru nahe. 19 Ibologö dufo sagö andrö, sagö nose ba ibalugö zagö andrö balu-balu andrö, si mane niŵa'ö Yehowa khö Moze.
20 Awena ihalö zura goroisa ba ibe'e barö dawöla andrö, ifohea-hea dawöla ba ibe'e yaŵa lagö-lagö andrö. 21 Ba i'ohe bakha ba nose dawöla, itaŵi mba'a-ba'a andrö, iba'a dawöla zura goroisa, si mane niŵa'ö Yehowa khö Moze.
22 Ba ibe'e göi ba nose wama'ele'ö meza andrö, tanö yöu, baero mba'a-ba'a andrö. 23 Ba ibe'e yaŵa nifinaetagö andrö [roti], ifa'anö, föna Yehowa, si mane niŵa'ö Yehowa khö Moze.[4]
24 Ba ibe'e göi ba nose wama'ele'ö naha wandru andrö, ba gamaudu meza no mege, tanö raya ba nose, 25 ba ibe'e yaŵa wandru andrö, föna Yehowa, si mane niŵa'ö Yehowa khö Moze.
26 Ba si manö göi naha wame'e sumange andrö, ana'a, ibe'e ba nose wama'ele'ö, föna mba'a-ba'a andrö, 27 ba itunu yaŵa zamohua, si mane niŵa'ö Yehowa khö Moze.
28 Ba itaŵi mba'a-ba'a mbawandruhö nose.
29 Naha wame'e sumange nitunu andrö, ba ibe'e ba zinga mbawandruhö nahia ose wama'ele'ö ba ibe'e yaŵa zumange nitunu ba sumange ni'a, si mane niŵa'ö Yehowa khö Moze.
30 Ba gala andrö, ba ibe'e ba gotaluara nose wama'ele'ö naha wame'e sumange andrö, ba ilau yaŵa nidanö, ba wanasa. 31 Ba lasasai ba da'ö dangara ba ahera ira Moze A'aroni ba ononia, 32 ero na möi ira bakha ba nose wama'ele'ö ba na la'ondrasi naha wame'e sumange lasasai ira, si mane niŵa'ö Yehowa khö Moze.
33 Ba ifasindro mba'a-ba'a golayama, ifasui nose, fabaya naha wame'e sumange andrö, ba itaŵi mba'a-ba'a mbawa göli ba golayama.
III. Anönö nose lakhömi Yehowa[edit | edit source]
34 Ba me no i'asiwai wama'anö Moze, ba ibalugö nose wama'ele'ö lawuo ba anönö nose lakhömi Yehowa.[5] 35 Ba tebai möi bakha ba nose Moze, me no ibalugö lawuo andrö ba me no anönö nose lakhömi Yehowa.
36 Ba ero na isaŵa miyaŵa lawuo andrö, moroi ba nose, ba lafazaŵa ira Iraono Gizeraeli; mofanö, götö we'asora ba lala. 37 Ba na lö isaŵa miyaŵa lawuo, ba lö lafazaŵa ira, balazi ifuli isaŵa yaŵa.
38 Na ma'ökhö sa, ba yaŵa nose so lawuo andrö khö Yehowa, ba ba zi bongi, ba mo'alitö ia, anehe Ndraono Gizeraeli fefu, götö we'asora ba lala.[6]
Famotokhi ba gahe[edit | edit source]
Fabaliŵa lala[edit source]
Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö