Wb/nia/Moze II/28

I. Nukha gere

1 Ba halö khöu ga'au A'aroni, awö nononia, nitutuyu ba Ndraono Gizeraeli fefu, ena'ö ere ira khögu, A'aroni ba Nadabi ba Abihu ba Eleazari ba Itamari, ono Ga'aroni andrö.

2 Ba öfatagu'ö mbaru ni'amoni'ö khö Ga'aroni, sumange ba famoadu. 3 Ba hede ba duka andrö fefu, nibe'egu tödö ba wa'atuka, ena'ö latagu nukha andrö khö Ga'aroni, fa ta'ila ta'amoni'ö ia, ena'ö ere ia khögu. 4 Ba da'ö nukha andrö, nitagura: Bola ba ono mbaru ba doto ba baru sebua ba kameza, muko si gara-gara, ba bala högö ba böbö talu. 5 Ba latagu nukha ni'amoni'ö khö Ga'aroni ba ba nononia, ena'ö ere ia khögu. Böna ame labe'e ba ungu sowu waru-waru ba soyo ba kirimisi ba tarafali.

II. Baru gere sebua

6 Ba ba nono mbaru ba doto, ba böna ame labe'e ba ungu sowu waru-waru ba soyo ba kirimisi ba tarafali bana. 7 Dua görö labe'e balu-balu galisi, nifaböbö khönia, ba mbalönia si dua tefaböbö.

8 Ba taŵi-taŵi andrö, si so khönia ba wobaru ya'ia, ba si manö göi wamazökhi, ba si fadoro khönia, böna ame ba ungu sowu waru-waru ba soyo ba kirimisi ba tarafali bana.

9 Ba dombua öhalö feremata una ba ösua yaŵa döi Ndraono Gizeraeli, 10 önö döi ba weremata si sambua, ba si önö, si tosai, ba ba zi sambua; öfa'oli, dali wa'asia'a. 11 Halöŵö zanua kara, fa'atuka zogao tandro wanua feremata andrö si dombua, dali döi Ndraono Gizeraeli; ba öfosinga ana'a. 12 Ba feremata andrö, si dombua, ba öfakhai ba mbalu-balu galisi andrö, ba nono mbaru ba doto andrö, famasugi ba dödö [Yehowa] Ndraono Gizeraeli; tobali i'angalisigö döira A'aroni föna Yehowa, fa böi olifu ia.

13 Ba öfosinga ana'a.

14 Ba dua öfazökhi raeŵe-raeŵe si ndruhu mbalaki; si mane sinali nitali öbe'e, ba raeŵe-raeŵe sinali andrö, ba ba zinga no mege öfakhai.

15 Ba öfazökhi mbola waetasa, nifolau duka wanoso, dali wamazökhi ono mbaru ba doto andrö ba wolaumö ya'ia, böna ame ba ungu sowu waru-waru ba soyo ba kirimisi ba tarafali bana öbe'e. 16 Ni'o'öfa sagi, dua winaeta, lito wa'anau ba lito wa'ebolo. 17 Ba öfa'oli ba detenia weremata, öfa ngenoli: feremata aki ba feremata zabarazadi ba feremata zumurudi ngenoli moroi yaŵa.

18 Ba ba wanetenia, ba feremata manika ba feremata nila ba feremata ita. 19 Ba ba wanetenia, ba feremata fusifaraga ba batu siabu ba feremata mariti. 20 Ba ba wanetenia ba feremata firuza ba feremata una ba feremata yasia; da'ö nifa'oli khönia, nifasui singa ana'a andrö.

21 Ba felendrua weremata andrö, dali döi Ndraono Gizeraeli andrö, si felendrua; sambu-sambua feremata, ba sambua-sambua nisua töi mado Ndraono Gizeraeli andrö, si felendrua, nifolau duka, sogao tandro.

22 Ba öfakhai ba mbola andrö raeŵe-raeŵe nitali andrö, balaki. 23 Ba bola andrö, ba öfotumbo ni'ogaolo, dombua; ba watalinga mbola andrö, si dombua öfakhai dumbo andrö, si dombua.

24 Ba raeŵe-raeŵe balaki andrö, si dua rozi, ba ba dumbo mbola andrö, si dombua, öfakhai. 25 Ba si föfö raeŵe-raeŵe andrö, si dua, ba öfakhai ba zinga no mege ba öfaböbö ba mbalu-balu galisi andrö ba nono mbaru ba doto, tanö föna.

26 Ba dombua öfazökhi tumbo ni'ogaolo, ana'a, ba öbe'e ba watalinga mbola andrö, ba watalinga tanö barö, si otahögö ono mbaru ba doto. 27 Ba dombua tö öfazökhi tumbo ni'ogaolo, ana'a, ba öfakhai ba mbalu-balu galisi andrö ba nono mbaru ba doto, tanö tou sibai, miföna, ba nifaböbö ya'ia, yaŵa mböbö nono mbaru ba doto. 28 Ba bola andrö nifotumbo ba öfakhai ba dumbo nono mbaru, sinali ungu sowu waru-waru, nifatörö ba dete mböbö nono mbaru andrö, ba tobali lö maliŵa-liŵa mbola ba dete nono mbaru.

29 Ba i'ohe-ohe döi Ndraono Gizeraeli A'aroni ba dete mbola waetasa andrö, ba dotonia, na möi ia ba ni'amoni'ö, föna Yehowa ena'ö lö mamalö-malö itörö tödönia ira.

30 Ba ba mbola waetasa andrö öbe'e Urimi ba Tumimi (haga ba fa'atulö) andrö, ena'ö ba doto Ga'aroni so, na möi ia si bakha, föna Yehowa, fa böi mamalö-malö ba doto Ga'aroni waetasa andrö ba Ndraono Gizeraeli, föna Yehowa.

31 Ba baru sebua andrö, daya-daya nono mbaru andrö, ba ha sambalö ungu sowu waru-waru öbe'e, 32 ba nitöla'ö, lala högö, ba dalu, ba nifasui rendra zatöla andrö, rendra nisoso, si mane ba lala högö ba göröba, fa böi atika. 33 Ba ba dagu-tagunia, ba öbe'e ni'obua dalimo, ungu sowu waru-waru ba soyo ba kirimisi — ba dagu-tagunia, fasui — ba öfasolisi riti-riti, ana'a, sambu-sambua riti-riti 34 ba sambu-sambua ni'obua dalimo, fasui, ba dagu-tagu mbaru sebua andrö, nifasolisi.

35 Ba i'obaru A'aroni, ba halöŵönia, ena'ö terongo linia [li riti-riti andrö], na möi ia si bakha, ba ni'amoni'ö andrö, föna Yehowa, ba na möi baulu, fa böi mate ia.

36 Ba öfazökhi na mbala högö si ndruhu mbalaki ba öfasua'ö ba detenia: "Ni'amoni'ö khö Yehowa", nifolau zogao tandro.

37 Ba öfaböbö ba zinali ungu sowu waru-waru, ena'ö adölö bala högö; ba gangango mbala högö tebe'e ia. 38 Ba ba gangango Ga'aroni fatöfa ia, ena'ö A'aroni zolu'i si sala andrö ba ngawalö ni'amoni'ö andrö, ba zumange ni'amoni'ö andrö fefu, nibe'e Ndraono Gizeraeli dania. Böi yatebulö ba gangangonia, ena'ö omasi Yehowa ira ibe'e.

39 Ba kameza andrö, ba tarafali öbe'e, nisoso, sogara-gara; ba öfazökhi mbala högö tarafali ba böbö talu, nifolau zanoso sola'a-la'a.

III. Nukha gere na

40 Ba ba ndraono Ga'aroni, ba öfazökhi gameza ba böbö talu, ba kofia salaŵa öfazökhi khöra, sumange ba famoadu. 41 Ba öbe'e nukha Ga'aroni ba nukha ndraononia ba öbayoini ira ba öfo'ösi dangara ba ö'amoni'ö ira, ena'ö ere ira khögu.

42 Ba öfazökhi khöra zaraeŵa tarafali, balu-balu zaila ira; i'otarai löwi-löwi, irugi waha. 43 Ba la'anaraeŵa A'aroni ba iraononia, na möi ira ba nose wama'ele'ö andrö ba na la'ondrasi naha wame'e sumange, ba wangai halöŵöra ba ni'amoni'ö andrö, fa böi mosala ira ba fa böi mate ira. Ya huku da'ö khönia ba ba madounia, si lö mamalö-malö.

Famotokhi ba gahe

Fabaliŵa lala

Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö