Jump to content

Wb/nia/Moze II/36

From Wikimedia Incubator
< Wb‎ | nia‎ | Moze II
Wb > nia > Moze II > 36

I. Labörötaigö halöŵöra ira Besale'eli Oholiabi. Lahöna wame'e bobotolö sato[edit | edit source]

1 Ba mohalöŵö ndra Besale'eli Oholiabi, awö dozi si so fa'atuka, nibe'e Yehowa fa'onekhe ba fa'aboto ba dödö, tobali la'ila mu'asiwai; lalau fefu hadia ia zoguna ba wamazökhi ni'amoni'ö andrö.

2 Ba ifakaoni'ö Moze ndra Besale'eli Oholiabi, awö dozi si so fa'atuka, nibe'e Yehowa fa'onekhe, dozi si no terou tödö ba wangai halöŵö andrö, ba wangasiwai ya'ia. 3 Ba latema khö Moze mbobotolö andrö fefu, nibe'e Ndraono Gizeraeli ba wangasiwai halöŵö andrö, ba wolau ni'amoni'ö andrö. Ba lö labato-bato wolohe khönia na, saoha gölö, ero mahemolu mbanua.

4 Ba dozi ndra tuka, solau halöŵö andrö fefu, ba ni'amoni'ö andrö, ba oi zara laböhöli halöŵöra ni'ohalöŵögöira, 5 ba lamane khö Moze: Lö ahori moguna ba wolau niŵa'ö Yehowa andrö ni'ohe zato!

6 Ba ifaŵa'ögö ba golombaseŵa Moze, imane: Böi sa'ae yamulau hadia ia mbobotolö ba ni'amoni'ö andrö ha niha, he ira matua ba he ira alawe! Ba tobali tetenaŵa niha zato, fa böi sa'ae la'ohe game'ela.

7 Noa sa irugi, no töra na'i khöra omböila, wangasiwai nilau andrö fefu.

II. Folau ose wama'ele'ö andrö[edit | edit source]

8 Ba lalau sa'ae nose andrö,[1] fulu nga'örö kulambu, dozi si so fa'atuka ba zohalö-halöŵö andrö; tarafali bana gulambu andrö ba ungu sowu waru-waru ba soyo ba kirimisi, nilalau kerubi, nifolau duka wanoso, wamazökhinia ya'ia,[2] 9 28 hela wa'anau zi sagörö kulambu ba 4 hela wa'ebolo — fagölö-gölö wa'ebua gulambu andrö fefu.

10 Lima-lima nga'örö kulambu ifatagu; ba awena ifotumbo zinga 11 zi sagörö kulambu andrö, ba wondrege zi sandroro andrö, tumbo ungu sowu waru-waru, ba si manö zinga gulambu ba wondrege zi sandroro. 12 50 dumbo ibe'e ba gulambu zi sagörö ba 50 göi ba zinga zi sagörö, si faböbö ba zi sandroro andrö; si fatahö sibai dumbo andrö ibe'e.

13 Ba ifazökhi khai-khai ana'a ba ifakhai gulambu andrö khai-khai andrö, tobali ha sambua nose andrö.

14 Ba ilalau dufo bu nambi, sagö nose, felezara nga'örö tufo ilalau ba da'ö. 15 30 hela wa'anau zagörö ba 4 hela wa'ebolo; fagölö-gölö wa'ebua zi 11 nga'örö tufo andrö. 16 5 nga'örö dufo andrö ifatagu, idoro, ba sandroro göi zi 6 nga'örö andrö.

17 Ba ifotumbo zinga ba wondrege zi sandroro, 50 dumbo, ba 50 göi dumbo ba zinga dufo ba wondrege zi sandroro.

18 Ba 50 ifazökhi khai-khai töla, ba wama'anö sagö andrö, ena'ö ha sandroro.

19 Ba ifazökhi na mbalu-balu zagö andrö, uli mbiri-biri si matua nilau soyo, ba sagörö tö mbalu-balu da'ö, uli guaza mina.

20 Ba ilau wafa andrö, döla-döla nose, nifasindro, bana.[3] 21 10 hela wa'anau zagörö ba sahela a matonga wa'ebolo. 22 Ba sagörö fafa ba dua mba'iba'i si faböbö; si manö wolau fafa nose andrö fefu. 23 Ba nilaunia fafa nose, ba 20 nga'örö fafa tanö miraya — 24 Ba 40 ibe'e ahe zi 20 nga'örö fafa, ahe firö, dua-dua gahe zagörö fafa, ba mba'iba'i no mege, si dua-dua — 25 si manö göi ba ngai nose tanö yöu, 20 nga'örö fafa, awö gahe firö andrö, 26 si 40, dua-dua gahe zagörö fafa.

27 Ba nibe'e tanö ba gaekhula luo, ba 6 nga'örö fafa ilau. 28 Ba 2 görö fafa ilau, nibe'e ba watalinga nose, tanö furi. 29 Dua winaeta da'ö, i'otarai moroi tou, ba nifa'anö si yaŵa, tumbo ni'ogaolö. Si manö wolaunia ba watalinga andrö, si dua; tobali 8 nga'örö fafa, 30 fabaya ahe firö andrö — 16 gahe, dua-dua gahe zagörö fafa.

31 Ba 5 ifazökhi lazi, bana, ba wafa andrö ba ngai nose,[4] 32 ba 5 göi lazi ba wafa ba zi tambai, ba 5 ba wafa ba hambo nose, tanö ba gaekhula luo.

33 Ba lazi ba dalu andrö, ba ba dalu wafa ifatörö, adölö manö ma'asandroro.

34 Ba fafa andrö, ba ifo'uli ana'a: ba tumbo andrö göi, lala lazi, ba ana'a ibe'e, ba lazi, ba ifo'uli ana'a.

35 Ba ifazökhi mba'a-ba'a andrö,[5] ungu sowu waru-waru ba soyo ba kirimisi ba tarafali bana, nifolau duka wanoso wamazökhinia ya'ia, nilalau kerubi.[6]

36 Ba 4 ifazökhi khönia taru nahe, bana, ba ifo'uli ana'a; ana'a göi gosö-osönia; ba 4 ifahele ahe da'ö, firö.

37 Ba ifazökhi mba'a-ba'a mbawandruhö nose, ungu sowu waru-waru ba soyo ba kirimisi ba tarafali bana, nifolau zanoso sola'ala'a,[7] 38 fabaya taru nahe andrö khönia, si lima, ba osö'osönia: högö ba tumbo ni'ogaolo andrö khönia, ba ifo'uli ana'a; ba ahe andrö si lima, ba töla ibe'e.

Famotokhi ba gahe[edit | edit source]

  1. Ayati 8–19: Faza 26:1–14
  2. Faigi 26:1
  3. Ayati 20–30: Faza 26:15–25
  4. Ayati 31–34: Faza 26:26–30
  5. Ayati 35–38: Faza 26:31–37
  6. Faigi 26:31
  7. Faigi 26:36

Fabaliŵa lala[edit source]

Olayama Moze II: 12345678910111213141516171819202122232425262728293031323334353637383940

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö