Wb/nia/Moze II/4
Tahi Moze ba goroisa Lowalangi andrö. Ifaduhuʼö ia Lowalangi ba dandra andrö[edit | edit source]
I . 1 Ba imane Moze: Ba na lö faduhu dödöra khögu, ba na lö lafondrondrongo khögu, ma lamane: Löʼö sa niʼoromaʼö Yehowa yaʼia khöu?
2 Ba imane khönia Yehowa: Hadia daʼö ba dangau? Imane: Siʼo. Ba imane: Tiboʼö tou.
3 Ba me itiboʼö tou, ba tobali ulö, ba moloi Moze khönia. [1].
4 Ba imane Yehowa khö Moze: Oroʼö dangau, raʼu giʼonia. Ba iʼoroʼö dangania, iʼaroʼö wondraʼu; ba tobali siʼo ba dangania.
5 Ba faduhu saʼae dödöra, wa no iʼoromaʼö ia khöu Yehowa, Lowalangi ndra tuara andrö, Lowalangi Gaberahamo, Lowalangi Gizaʼaki ba Lowalangi yakobo.
6 Ba imane na khönia Yehowa: Sigöʼö ba nono mbarumö ba dotou dangau! ba isigöʼö ba nono mbarunia dangania. Ba me ifuli isöbi, ba no bou auri, si lö mudöna-döna, afusi, si mane betua.
7 Ba imane: Fuli sigöʼö ba nono mbaru dangau! Ba isigöʼö ba nono mbarunia dangania, ba me ifuli isöbi, ba no ifuli tobali si mane ösinia böʼö, lö mudöna-döna.
8 Ba na lö faduhu dödöra, na lö lafondrondrongo ba dandra si föföna andrö, ba faduhu sa dödöra ba dandra si sambua andrö.
9 Ba na löʼö göi faduhu dödöra ba zi dua balö andrö, tandra, na lö laʼoʼö khöu, ba ösou nidanö ba Nilo, ba öfaduwa ba danö, ba idanö andrö misoumö ba Nilo, ba tobali do, ba danö. [2].
10 Ba imane Moze khö Yehowa: He Soʼaya! Tenga niha sangila fahuhuo ndraʼo, he föna, ba he götö iadaʼe, me fahuhuo ndraʼugö khö genonimö, no sabeʼe li ndraʼo, ba hulö zabua lelagu. [3].
11 Ba imane khönia Yehowa: Ba ha niha zomböi bawa niha? ba ha niha zameʼe si lö hede nihá ba safiso ba sangila niha ba sauʼa? Hadia, tenga yaʼodo, Yehowa? [4].
12 Ba aeʼe manö! Yaʼo zanolo yaʼugö ba wahuhuosa ba uwawakhaʼö khöu, hadia niŵaʼöu. [5].
13 Ba imane: He Soaya! sökhi na niha böʼö öfatenge!
14 Ba mofönu Yehowa khö Moze, imane: Ba hadia, ba lö Aʼaroni, gaʼau, ono Lewi andrö? Noa sa uʼila khönia, wa iʼila sibai fahuhuo. Ba ifaondragö na ndraʼugö dania ba omuso sibai dödönia, na iʼilaʼö.
15 Ba hana na fahuhuo ndraʼugö khönia, ba öfaʼema khönia niŵaʼö andre. Ba utolo ndraʼugö ba he yaʼia göi, ba wahuhuosa, ba uwawakhaʼö khömi, he miwisa. [6].
16 Ba yaʼia zi fahuhuo ba niha sato, salahiu, ba yaʼia mbawau; ba yaʼugö, ba [hulö] Lowalanginia.
17 Ba siʼo andrö, ba ohe tangau; yaʼia wamazökhi dandra andrö.
Fangawuli Moze ba danö Miserayi[edit | edit source]
II . 18 Ba mofanö Moze, ifuli ia khö matuania Yetero, ba imane khönia: Mofanö ndraʼo, ufulido ba niwama ba danö Miserayi, ba wamaigi, na lö si mate ira. Imane Yetero khö Moze: Aeʼe, yaʼohahau dödöu!
19 Ba imane Yehowa khö Moze, ba danö Ndraono Midiano: Faoso, fuliʼö ba danö Miserayi; noa sa ahori mate zangalui no famunu yaʼugö. [7].
20 Ba ifakudo ba galide woʼomonia ba ononia Moze ba mangefa ia, ba wanaŵa tanö Miserayi; ba siʼo andrö khö Lowalangi, ba iʼohe tangania Moze.
21 Ba imane na Yehowa khö Moze. Na örugi danö Miserayi, ba faigi: fefu dandra andrö, nibeʼegu ba dangau, ba ölau föna Waraʼo, ba yaʼo, ba uʼoköliʼö dödönia, fa lö ifofanö ira.
22 Ba yaʼugö, ba ömane khö Waraʼo: Daʼö niŵaʼö Yehowa: Iraono Gizeraëli andrö, ba no onogu si aʼa.
23 Ba daʼö saʼae niŵaʼögu khöu: Fofanö nonogu andrö, enaʼö ifosumange ndraʼo; ba na lö edöna öfofanö ia, ba ubunu nonou si aʼa! [8].
24 Ba ba lala, ba zi mörö ira, ba falukha Yehowa khö Moze, ibunu ia menaʼö.
25 Ba ihalö gara satarö singa Sifora, itaba guli nononia ba ifagule ba zaila ia, imane: Soniha si no togule do ndraʼugö khögu!
26 Awena iböhöli ia [Yehowa]. Ba börö wamoto andrö, wa iŵaʼö Soniha si no togule do.
Falukha ia khö Gaʼaroni[edit | edit source]
III . 27 Ba iŵaʼö Yehowa khö Gaʼaroni: Ae faondragö Moze ba danö si mate! Ba möi daʼö, falukha ia khönia ba gahe hili Lowalangi andrö, hili Horebi; ba faʼago bawa ia khönia.
28 Ba iʼombakhaʼö khö Gaʼaroni Moze fefu huhuo Yehowa, oroisania khönia, ba tandra andrö fefu, niŵaʼönia khönia.
29 Ba möi ira, darua ira Moze Gaʼaroni ba lafalukhaʼö zatua Ndraono Gizeraëli fefu.
30 Ba ifaʼema Aʼaroni fefu goroisa, nibeʼe Yehowa khö Moze, ba daʼö zolau tandra andrö, ba zanehe niha sato.
31 Ba faduhu dödöra ba daʼö, me larongo, no ihakhösi tödö Ndraono Gizeraëli Yehowa ba no inehegö wamakao yaʼira andrö ba mangalulu, ira, lafalögu tou ira ba danö.
Famotokhi ba gahe[edit source]
Fabaliŵa lala[edit source]
Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö