Wb/nia/Moze II/19
I. Fangehao sato ba wanema oroisa andrö
[edit | edit source]1 Tölu waŵa aefa ira ba danö Miserayi; me luo da'ö sibai, ba larugi danö si mate Sina'i.[1] 2 No laheta ira ba Rafidi, ba larugi danö si mate Sina'i; ba molombase ira ba danö si mate. Ba gamaudu hili andrö labe'e golombaseŵa Iraono Gizeraeli.
3 Ba me no möi miyaŵa Moze khö Lowalangi, ba humede khönia Yehowa moroi ba hili yaŵa, imane: Da'ö niŵa'öu ba ma'uwu Yakobo, da'ö ni'ombakha'öu ba Ndraono Gizeraeli:[2]
4 No mi'ila nilaugu ba Ndrawa Miserayi; wa no u'ohe ami, amaedola ba dete gafi moyo, wa ba da'e urugi wolohe ya'ami, khögu.[3] 5 Ba na edöna sa'ae ami mifondrondrongo ligu, ba na lö olifu ami gamakhoitagu andrö ba tana khögu ami, moroi ba niha bö'ö fefu; me no khögu guli danö ma'asagörö.[4] 6 Ba öri ere ami khögu, soi ni'amoni'ö! Da'ö niŵa'öu ba Ndraono Gizeraeli.[5]
7 Ba möi Moze, ifalukha'ö zatuara ba ifa'ema khöra daroma li andrö, niŵa'ö Yehowa khönia, fefu. 8 Ba dozi manö ira, ba ha sara li, lamane: Fefu hadia ia niŵa'ö Yehowa, ba ma'o'ö!
Ba i'ombakha'ö khö Yehowa niŵa'ö zato Moze.
9 Ba imane Yehowa khö Moze: Hiza, möido khöu bakha ba lawuo sawe'e-we'e, ena'ö larongo sato, na fahuhuodo khöu, ba ena'ö si lö aetu wamatira khöu.
Ba ifa'ema khö Yehowa niŵa'ö zato Moze.
10 Ba imane Yehowa khö Moze: Ae khöra ba ŵa'ö khöra, ena'ö mamoni ira ma'ökhö ba mahemolu, ba ndramubabago nukhara. 11 Ba ba zi dua wongi, ba no mama'anö ira; ba zi dua wongi sa möi tou ba hili Zina'i Yehowa, ba zanehe zato fefu. 12 Ba ba zato, ba ötaru'ö göli, fasui, wanguma'ö khöra: Mi'angelama, fa böi möi miyaŵa ami ba hili, böi na'i mihatö'ö ami ba gahenia; gofu ha niha zi hatö'ö ya'ia ba hili, ba si mate! 13 Lö tola ibabaya hili tanga niha; nitebu kara na so zi manö ba ma nifana, he niha, ba he urifö, lö tola lö mate. Ba na terongo li dorofe, ba möi miyaŵa ira ba hili.[6]
14 Ba möi mitou Moze moroi ba hili, möi ia ba zato ba iwa'ö khöra, mamoni ira ba lababago nukhara. 15 Ba imane na khöra: Mifa'anö ami, irege ba zi dua wongi; samösa lö tola orudu ba ndra alawe.
II. I'oroma'ö wa'ebua lakhöminia Yehowa ba hili Zina'i
[edit | edit source]16 Ba dua wongi aefa da'ö, me moluo, ba ilabu banua, awö gari mbanua, no ibalugö hili lawuo saitö ba terongo li dorofe sabölö-bölö; ba ihawui fa'ata'u zato, si so ba golombaseŵa. 17 Ba i'ohe baero golombaseŵa zato Moze, ba wamaondragö Lowalangi, ba la'iagö gahe hili.[7]
18 Ba no anönö simbo hili Zina'i, me no möi tou ba zuzunia Yehowa ba galitö; ba numalö miyaŵa zimbo, moroi khönia, hulö zimbo galitö mbaho, ba moduru sibai hili andrö ma'asambua.
19 Ba itugu ara, ba itugu abölö li dorofe andrö: humede Moze ba itema linia Lowalangi, ebua linia.
20 Möi mitou ba hili Zina'i Yehowa, ba zuzu hili. Ba ikaoni ba zuzu hili Moze Yehowa; ba möi miyaŵa Moze.
21 Ba imane Yehowa khö Moze: Ae mitou ba abe'e'ö wanguma'ö ba zato, böi ndramuhatö'ö ira khö Yehowa, ba wamaigi ya'ia; fa böi ato zi mate khöra. 22 He ere andrö göi, sangahangahatö ya'ira khö Yehowa, ba la'amoni'ö göi ira; fa böi ilau khöra Yehowa.
23 Ba imane Moze khö Yehowa: Tebai möi miyaŵa ba hili Zina'i zato; noa sa ya'ugö zangabe'e'ö fanguma'ö khöma, ba wangöli hili ba no öŵa'ö: tebai mirugi.
24 Ba imane khönia Yehowa: Ae manö mitou ba ohe awöu Ga'aroni, wangawuli miyaŵa. Ba böi ndra muhatö'ö ira ere andrö, awö zato, ba we'amöi miyaŵa khö Yehowa, ena'ö böi ilau khöra.
25 Ba möi mitou ba zato Moze ba iŵa'ö khöra.
Famotokhi ba gahe
[edit | edit source]Fabaliŵa lala
[edit source]Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö