Wb/nia/Moze II/33

I. Fa'ebua dödö Lowalangi ba fa'abe'e hukunia. Mangalulu zato

1 Ba imane Yehowa khö Moze: Faoso, miheta ami ba da'e, ya'ugö ba sato, nihetau ba danö Miserayi, mi'ae ba danö andrö, nifabu'ugu khö ndra tuami Aberahamo, Iza'aki, Yakobo, fahölusa, me umane: Ba ma'uwumi ube'e ia! 2 Ba ufowaö-waö fönami mala'ika, ba wanimba fönami Dawa Gana'ana ba Iraono Gamori ba Iraono kheti ba Iraono Weresi ba Iraono Hewi ba Iraono Yebusi — 3 ba danö si falawu susu ba ŵe ŵani; ya'odo sa, ba lö fao khömi me no niha sabe'e börö du'i ami, ma dania uhori ami ba lala.

4 Ba me larongo wehede sabe'e andrö sato, ba abu sibai dödöra ba samösa lö si o'aya ayania.

5 Ba imane Yehowa khö Moze: Ömane ba Ndraono Gizeraeli: Niha sabe'e börö du'i ami! he ha mamö'i hörö wa'ara faodo khömi, ba uhori ami. Ba miheta nayami; awena dania ufaigi he uwisa khömi.

6 Ba laheta nayara Iraono Gizeraeli, i'otarai ba hili Horebi andrö.

II. Huhuo Moze khö Lowalangi ba nose wama'ele'ö andrö

7 Ba ihalö-halö nose andrö Moze, ba baero golombaseŵa ifa'anö-anö, aröu ma'ifu aefa ba golombaseŵa, ba ose wama'ele'ö ibe'e töinia. Na so zanofu hadia ia khö Yehowa, ba möi baero, ba nose wama'ele'ö andrö, föna-föna golombaseŵa.

8 Ba ero möi baero Moze, ba nose, ba maoso zato fefu ba i'iagö mbawandruhö nosenia zamösana, lanehegö wofanö Mose, irege no irugi nose. 9 Ba ero na irugi nose Moze, ba adada mboto lawuo andrö, i'iagö zinga mbawandruhö nose, ba fahuhuo Yehowa khö Moze. 10 Ba dozi niha zangila boto lawuo andrö, ba zinga mbawandruhö nose, ba maoso ira fefu, ba ifalögu tou ia ba danö zamösana, ba mbawandruhö nosenia.

11 Ba fahuhuo Yehowa khö Moze, si faudu wawa ira, si mane na fahuhuo zi fahuwu; ba ifuli ia ba golombaseŵa ba toröi dohu-tohu dangania andrö, Yosua, ono Nuni, ngoni-ngoni bakha ba nose, lö tebulö.

12 Ba imane Moze khö Yehowa: öŵa'ö sa: Ohe misa niha andrö! ba lö ni'ombakha'öu khögu, ha niha nifatengeu awögu. 13 Ba na no falukhado wa'ebua dödöu, ba bokai khögu dödöu ba be'e aboto ba dödögu ndra'ugö, ena'ö falukhado wa'ebua dödö khöu, ba törö-törö atö tödöu, wa no banuau niha andre.

14 Ba imane: Hadia, ya'odo zi fao, ba wolohe ya'ugö ba gahonoa naha?

15 Ba imane Moze: Na tenga ya'ugö zi fao, ba si sökhinia, na lö öhetaga ba da'e! 16 Heza so na, baero ö, ba zaboto ba dödö, wa no falukhaga wa'ebua dödö khöu, he ya'odo, ba he banuau andrö, na tenga ba wefaomö khöma, ba na tehude'ö ndra'aga banuau andrö, ba da'ö, föna soi bö'ö fefu ba guli danö?

III. Mangandrö Moze ena'ö te'oroma'ö khönia lakhömi Lowalangi

17 Ba imane Yehowa khö Moze: Ba he da'ö göi, ni'andröu, ba u'o'ö; noa sa falukha'ö wa'ebua dödö khögu ba no u'ila döimö.

18 Ba i'andrö khönia: Oroma'ö khögu lakhömimö!

19 Ba imane: Fa'asökhigu fefu ba ufatörö fönau ba utötöi fönau döi Yehowa, ba ebua dödögu ba zomasido ebua ia, ba uhakhösi tödö zomasido akhakhö dödögu. 20 Ba imane na: Bawagu, ba tebai öfaigi; lö'ö sa auri niha, na i'ila ndra'odo! 21 Ba imane na Yehowa: So naha, sahatö khögu, hana sa na ba da'ö möi'ö, ba gara yaŵa. 22 Ba na itörö lakhömigu andrö, ba u'ohe'ö ba dögi narö gara, ba ubalugö ndra'ugö tangagu, irege no utörö. 23 Ba na uböda dangagu, ba ö'ila gerogu; ba bawagu, ba tebai ifaigi niha.

Famotokhi ba gahe

Fabaliŵa lala

Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö