Wb/nia/Moze II/34
I. I'oroma'ö ia Yehowa khö Moze ba hili[edit | edit source]
1 Ba imane Yehowa khö Moze: Toto khöu gara wanura, dua görö, si mane mege, ba usura ba gara andrö goroisa andrö, si so ba gara mege, nirasamö.[1] 2 Ba fa'anö'ö, ba we'amöi ba hili yaŵa, mahemolu, si hulö wongi, ba döna-döna ndra'o ba da'ö, ba zuzu hili. 3 Ba lö tola möi awöu ha niha, ba we'amöi miyaŵa, ba lö tola oroma niha ba gahe hili, fasui; ba he biri-biri ba saŵi, ba lö tola mangalui gö heza, ba zahatö ba hili andre.
4 Ba itoto gara wanura, dua görö, si mane mege. Ba mahemolu ö, ba ihulö wongi wemaoso Moze, möi ia miyaŵa, ba hili Zina'i andrö, i'o'ö niŵa'ö Yehowa khönia, i'ohe gara andrö, si dua görö.
5 Ba möi mitou Yehowa, ba lawuo, i'agö ngainia ba itötöi döi Yehowa.[2] 6 Ba me itörö fönania Yehowa, ba imane: Yehowa, Lowalangi sahakhö tödö Yehowa ba si no ebua tödö, ba sebolo tödö ba si no fahöna fa'aböwö, awö wa lö faröi ia,[3] 7 sebua tödö ba ngahönö nga'ötö ba same'e aefa sala ba olalöŵa ba horö, ba lö'ö sa taŵa'ö, lö'ö manö fotu; lalö ndra ama, ba ihuku ba ndraono ba ba ma'uwu, ikhamö tölu, irege öfa nga'ötö.[4]
8 Ba i'alio'ö Moze ifaöndrö ia tou ba danö, ifalögu tou ia, 9 ba imane: He So'aya! na no atö usöndra wa'ebua dödö khöu, ba iagö hunöma ba wofanöma! Sabe'e börö du'i sa ira, ba be'e aefa khöma lalöma, awö horöma ba halö tana khöu ndra'aga![5]
II. Ifasugi ba dödö Ndraono Gizeraeli wawu'usa li andrö[edit | edit source]
10 Ba imane Yehowa: Hiza uhonogöi ba zi so banuau andrö fefu: ufazökhi dandra, si lö murai mulau ba guli danö ma'asagörö, ba niha bö'ö fefu, ba la'ila dania wolau Yehowa banuau andrö fefu, si so ya'ugö ba hunö; sahöli-höli dödöda sa nilaugu khöu dania![6]
11 O'ö niŵa'ögu khöu ma'ökhö; da'utimba fönau Ndraono Gamori ba Dawa Gana'ana ba Iraono kheti ba Iraono Weresi ba Iraono Yebusi. 12 Angelama, fa böi fawu'u li ndra'ugö ba niha ba danö andrö, nirugimö dania; ma dania tobali tandraŵa ira ba ngaimi.[7] 13 Midudugö naha wame'e sumange andrö khöra, mirasa harefara ba mi'obö geu ni'amoni'ö andrö khöra.[8]
14 Ba böi angalulu ba Lowalangi bö'ö; solohu döi Yehowa, Lowalangi solohu ia.[9]
15 Na fawu'u li ndra'ugö ba niha ba danö andrö, ba na lakaoni ndra'ugö, na mame'e adu ira, na lafosumange Lowalangira, ba ahatö khömi wa'elungu, wemanga gö nadu andrö.[10] 16 Ba ma mihalö göi dania donga nonomi matua nonora alawe, ba na mame'e adu nonora, wamosumange Lowalangira, ba lafaelungu göi ndraonomi, ba wame'e adu andrö.
17 Böi fazökhi khöu wamaedo Lowalangi nifahele.[11]
18 Owasa roti si lö mu'aisöni andrö,[12] ba böi olifu'ö; fitu ngaluo wa'ara ö'a roti si lö mu'aisöni, ö'o'ö niŵa'ögu khöu, na baŵa Abibi; me no ba mbaŵa Abibi aheta'ö ba danö Miserayi.[13]
19 Fefu zi a'a ba wa'atumbu, ba khögu, he uriföu fefu, motöi matua ono si a'a ba zaŵi ba ba mbiri-biri[14] 20 Ba ono si a'a ba galide ba öhöli biri-biri; ba na lö omasi'ö öhöli, ba öfatö mbaginia. Fefu nono si a'a khöu, ba öhöli; ba khögu, ba böi möi lö ba danga.[15]
21 Önö ngaluo wa'ara, ba hana na öhalö-halö halöŵö, ba na luo si fitu, ba molombase ndra'ugö; he na baŵa wamaku ba he na baŵa wamasi, ba molombase'ö.[16]
22 Ba owasa fendrakose andrö, ba ölau, owasa wamasi gandru sahulö, ba owasa wamasi ba wasulöna ndröfi.[17] 23 Medölu zi döfi ndramu'oroma'ö ira föna Zo'aya, Yehowa, Lowalangi Ndraono Gizeraeli, dozi motöi matua ba khömi.[18] 24 Utimba sa fönau soi niha andrö, ba ebolo danöu ube'e, ba lö tola i'isö niha bö'ö danö andrö khöu, fatua möi misi yaŵa ndra'ugö, ba wangoroma'ö ya'ugö föna Lowalangiu Yehowa, si medölu zi döfi.
25 Böi orudugö ba roti si no mu'aisöni ndro zumange andrö khögu, ba sumange andrö ba gowasa fasa, ba tenga nibe'e yaŵa irege mahemolu.[19] 26 Bua zahulö ba danö khöu, ba ö'ohe ba nomo Lowalangiu Yehowa. Ono mbiri-biri andrö, ba böi rino ba nösi zusu ninania.[20]
27 Ba imane Yehowa khö Moze: Tanö ba zura khöu goroisa andrö. Tandrösa wawu'usa ligu khöu ba ba Ndraono Gizeraeli sa goroisa andrö.
28 Ba öfa wulu ngaluo ba öfa wufu mbongi wa'arania ba da'ö khö Yehowa; lö manga ia ba lö ibadu hadia ia. Ba itanö ba zura goroisa ba wawu'usa li andrö, oroisa si fulu andrö, isura ba gara andrö.[21]
III. Mangawuli Moze moroi ba hili; humaga mbawania[edit | edit source]
29 Ba me möi mitou Moze moroi ba hili Zina'i, ba so ba dangania zura goroisa andrö, si dua görö; ba lö i'ila, wa no tobali sihaga guli mbawania, ba wahuhuosania khö Yehowa.[22]
30 Ba me la'ila A'aroni ba Iraono Gizeraeli fefu mbawa Moze, wa no sihaga, ba ata'u ira lahatö'ö ira khönia.
31 Ba humede khöra Moze, ba lafuli la'otahögö ia, he A'aroni ba he satua mbanua fefu; ba fahuhuo khöra Moze. 32 Awena la'ondrasi ia Iraono Gizeraeli fefu. Ba i'ombakha'ö khöra goroisa andrö fefu, ni'oroi'ö Yehowa khönia ba hili. 33 Ba me no i'o'ozui Moze huhuonia khöra, ba ifobalu-balu mbawania.
34 Ba ero na i'ondrasi Yehowa Moze, ba wahuhuosa khönia, ba iheta mbalu-balu andrö, irege möi ia baero, ba ifa'ema ba Ndraono Gizeraeli hadia niŵa'ö khönia.
35 Ba ero na si manö, ba la'ila Iraono Gizeraeli, wa no sihaga guli mbawa Moze. Ba ifuli dania ifobalu-balu mbawania Moze, irege möi ia bakha zui, ba wahuhuosa khö Yehowa.
Famotokhi ba gahe[edit | edit source]
- ↑ Faigi 32:19
- ↑ Faigi 33:19
- ↑ MozIV 14:18; Neh 9:17; Sin 86:5; Sin 103:8
- ↑ Faigi 20:5; Yer 32:18
- ↑ Sin 33:12; Sakh 2:12
- ↑ MozV 5:2
- ↑ Faigi 23:32
- ↑ Faigi 23:24; MozV 7:5
- ↑ Faigi 20:5
- ↑ MozIV 25:1,2; KorI 8:7; 10:21
- ↑ Faigi 20:23
- ↑ Ayati 18—26: Faza 23:14—19
- ↑ Faigi 12:18
- ↑ Faigi 13:2
- ↑ Faigi 13:13; 23:15
- ↑ Faigi 20:9
- ↑ Faigi 23:16
- ↑ Faigi 23:17
- ↑ Faigi 23:18
- ↑ Faigi 23:19
- ↑ Faigi 24:18; 31:18
- ↑ KorII 3:7
Fabaliŵa lala[edit source]
Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö