Wb/nia/Moze II/18

From Wikimedia Incubator
< Wb‎ | nia‎ | Moze II
Wb > nia > Moze II > 18
FAZA 18

Möi khö Moze matuania Yetero[edit | edit source]

I. 1 Ba me irongo Yetero, högö gere ba Ndraono Midiano, matua Moze, duria da'ö fefu, he wisa Lowalangi khö Moze ba ba mbanuania Iraono Gizeraeli, wa no iheta ba danö Miserayi Ndraono Gizeraeli Yehowa,

2 ba ihalö Zifora andrö, fo'omo Moze Yetero, matua Moze — noa sa ifa'ohe'ö mangawuli Moze — [1],

3 awö nononia andrö, si dombua — töi zi sambua, ba Gereso, me no imane: No tobali si fatewu ndra'o ba danö zotanö; [2];

4 ba töi zi samösa, ba Eliezeri, me imane: No itolodo Lowalangi namagu andrö, no i'efa'ö ndra'o ba mbawa zi'öli Wara'o. —

5 Ba so Yetero, matua Moze, awö ndraono Moze, awö wo'omonia, möi ia khö Moze ba danö si mate, ba zolombase ira, ba gahe hili Lowalangi andrö.

6 Ba ifaŵa'ögö khö Moze imane: Möido khöu, ya'odo andre, matuau Yetero, awö wo'omou ba ononia si dombua andrö, si fao khönia.

7 Ba maoso Moze, möi mufaondragö matuania andrö, ifaöndrö ia ba fa'ago bawa khönia; ba faoma lasofu khö nawöra, na lö hadia ia khöra, ba möi baose.

8 Ba idunö-dunö khö matuania Moze fefu milau Yehowa khö Wara'o ba ba Ndrawa Miserayi, ba wangorifi Iraono Gizeraeli, awö wamakao andrö fefu, si no göna ira ba lala ba fangorifi Yehowa ya'ira.

9 Ba omuso dödö Yetero ba zi sökhi andrö fefu, nilau Yehowa ba Ndraono Gizeraeli, wa no i'efa'ö ira ba danga Ndrawa Miserayi.

10 Ba imane Yetero: Nisuno Yehowa, me no i'efa'ö ami ba danga Wara'o ba ba danga Ndrawa Miserayi, me no iheta barö mbawa Ndrawa Miserayi mbanuami.

11 Awena aboto ba dödögu, wa no sabölö moroi ba Lowalangi bö'ö fefu Yehowa; ba zi fayaŵa ira khöra sa'ae ilaŵa ira. [3].

12 Aefa da'ö, ba ifahalö'ö gurifö Yetero andrö, matua Moze, nibe'e sumange nitunu ba sumange nitaba, sumange Lowalangi, ba so Ga'aroni, awö zatua Ndraono Gizeraeli fefu, ba wangorudugö ya'ira khö matua Moze andrö, ba wemanga zumange andrö föna Lowalangi.

Ifobawa lala khö Moze, ba wamataro sanguhuku sato[edit | edit source]

II. 13 Ba mahemolu ö, ba mudadao Moze, ba wamatunö huhuo zato, ba la'ondrasi Moze niha, i'otarai sihulö wongi, numalö ba wa'abongi.

14 Ba me i'ila matua Moze halöŵönia ba niha, ba imane khönia: He wisa ndra'ugö ba niha andrö? Hana wa ha ya'ugö zidao-dao, ba lahurufai manö ndra'ugö niha, i'otarai zi hulö wongi numalö ba wa'abongi?

15 Imane Moze khö matuania: Ya'ia, möi-möi khögu niha, ba wanofu faetasa.

16 Na so huhuora, ba la'ondrasi ndra'o, ena'ö u'etu'ö, ha khö zatulö, ba ena'ö u'ombakha'ö nifakhoi Lowalangi ba oroisania.

17 Ba imane matua Moze khönia: Tenga si göna wolaumö andrö.

18 Erege dödöu ba erege göi dödö niha andrö, si so khöu; abölö afökhö halöŵöu andrö khöu, tebai ha ya'ugö zangasiwai.

19 Ba da'ufobawa lala khöu, o'ö khögu, ba itolo'ö Lowalangi: böi bulö'ögö sama'ema khö Lowalangi hadia ia niŵa'ö-ŵa'ö niha, fa'ema khö Lowalangi huhuora.

20 Ba botokhi ba dödöra gamakhoita ba oroisa, ba oroma'ö khöra lala nitöröra ba he lawisa wolau.

21 Ba tutuyu ba niha sato zangata'ufi Lowalangi ba si faduhu dödöda ba si lö mangalui khöra hadia ia, ba fataro ira sanguhuku si hönöhönö ba si otu-otu ba si lima-lima wulu ba si fulu-fulu, [4],

22 fa lö mamalö-malö lafatunö huhuo zato. Ba huhuo sebua, fefu ba ndramu'ohe khöu; ba huhuo side-ide fefu, ba ya'ira zangetu'ö, ba aoha khöu öbe'e, ba latolo'ö.

23 Na ömanö wangohonogöi da'ö, ba na iŵa'ö khöu Lowalangi, ba tola ötaha, ba si sökhi tödö niha andrö fefu, wangawuli ba khöra.

24 Ba i'o'ö niŵa'ö matuania Moze, fefu nifobawania lala khönia, ba ifalua.

25 Itutuyu Moze ba Ndraono Gizeraeli fefu niha si so tödö ba ifataro högö zato, sanguhuku si hönöhönö ba si otu'utu ba si lima-lima wulu ba si fulu-fulu,

26 ena'ö lö mamalö-malö la'asiwai huhuo zato. Ba huhuo sebua, ba ni'ohe khö Moze, ba fefu huhuo side-ide, ba ya'ira zangetu'ö.

27 Ba ifasao ba lala matuania Moze, mangawuli ba khöra da'ö.

Famotokhi ba gahe[edit | edit source]

  1. Faigi 2, 21; 4, 20
  2. Faigi 2, 22
  3. Faigi 1, 22; 14, 27. Sin 76, 11
  4. MozIV 11, 16. MozV 1, 13

Fabaliŵa lala[edit source]

Olayama Moze II: 12345678910111213141516171819202122232425262728293031323334353637383940

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö