Jump to content

Wb/nia/Moze II/23

From Wikimedia Incubator
< Wb‎ | nia‎ | Moze II
Wb > nia > Moze II > 23

I. Amakhoita fa böi mofaya ba fa böi ebua dödöra zambuana[edit | edit source]

1 Böi böbögö zi lö duhu. Böi tolo zolau si lö atulö, we'amöi sasinia, ba wamuyu'ö huku.[1]

2 Böi o'ö zato, ba wamazökhi si lö sökhi. Na so huhuo, ba böi o'awögö zato we'amöi sasi, ba wamuyu'ö huku.

3 Böi o'awögö zalaŵa, na so huhuonia.[2]

4 Na ösöndra zaŵi zi fa'udu khöu, ba ma kalidenia, sisuna, ba ö'ohe mangawuli khönia.[3]

5 Na ö'ila ilangö galide zi fa'udu khöu noronia, ba böi erogö ia, ötolo ia, ba wamu'a andrö.

6 Böi fuyu'ö huku zi numana, banuami, na so huhuonia.

7 Böi fabaya ndra'ugö ba huhuo, ba zi faruka faya ba böi fa'awö ndra'ugö ba wangetu'ö huku zi lö horö, ba si so huhuo satulö; lö'ö sa uŵa'ö si lö horö zi so horö.

8 Ba böi a gana'a' i'abösi'ö sa'ae zangila niha ana'a andrö ba ifuyu'ö huhuo satulö.[4]

9 Niha bö'ö, ba böi fakao, noa sa mi'ila, he wisa dödö niha bö'ö, me no niha bö'ö mege ami, ba danö Miseraiyi.[5]

II. Döfi wolombase ba fe'amoni'ö luo sabato. Inötö gowasa andrö[edit | edit source]

1O Meönö fakhe wa'ara mangaha-ngahalö ndra'ugö ba öbasi-basi mbua nowi,[6] 11 ba ba ndröfi si fitu, ba böi oguna'ö ia, böi halö, ena'ö lahalö göra khönia si numana, banuami; ba hadia nisaigöra, ba hana na utu ndru'u zi manga; ba si manö göi wolaumö ba kabu nagu khöu ba ba kabu falo.

12 Önö ngaluo wa'ara, ba hana na öhalö-halö halöŵöu, ba ba luo si fitu, ba molombase ndra'ugö, ena'ö molombase göi zaŵi ba kalide khöu, ba ena'ö lahasugö ira ono zawuyumö ira alawe, ba he niha bö'ö andrö [khöu].[7]

13 Fefu hadia ia, niŵa'ögu khömi, ba böi olifu ami! Böi itörö limi döi Lowalangi bö'ö; böi itörö mbewemi![8]

14 Medölu zi döfi ölau khögu gowasa.[9] 15 Owasa roti si lö mu'aisöni ölau: fitu, ngaluo wa'ara ö'a roti si lö mu'aisöni, si mane niŵa'ögu khöu, na baŵa Abibi, me no ba da'ö aheta'ö ba danö Miserayi. Böi möi khögu lö ba danga.[10] 161 Ba owasa ba wamasi si a'a mbua danö, nihalöu. Ba owasa ba wamasi sara, ba wasulöna ndröfi, na ö'ozaragö mbua danö.

17 Medölu zi döfi la'ondrasi Zo'aya, Yehowa, dozi motöi matua.[11] 18 Böi fabaya ba roti ni'aisöni ndro zumange andrö ni'oheu khögu, ba tawö zumangegu ba gowasa, ba böi tebe'e yaŵa irugi mahemolu. 19 Fondrege zi sökhi, si a'a mbua nowi khöu, ba ö'ohe ba nahia Lowalangiu Yehowa. Ono mbiri-biri, ba böi rino ba nösi zusu ninania.

III. Ifabu'u khöra Lowalangi itimba khöra zi lö sökhi ba lalara ba danö Gana'ana[edit | edit source]

20 Ba ufowaö-waö fönau mala'ika ba wondrorogö ya'ugö ba lala ba ba wolohe ya'ugö ba naha andrö, nihonogöigu;[12] 21 Angelama ba khönia andrö ba o'ö niŵa'önia; böi sabe'e tandro ndra'ugö khönia; lö'ö sa ibe'e aefa khömi lalömi; fangoroma'ö ya'o sa'ae ia. 22 Ba na öfondrondrongo linia ba na ö'o'ö fefu niŵa'ögu khöu, ba emali nemaliu ndra'odo ba si fa'udu ba zi fa'udu khöu.

23 Mowaö-waö sa'ae dania fönau mala'ika andrö khögu, wolohe ya'ugö ba Ndraono Gamori ba ba Ndraono Kheti ba ba Ndraono Weresi ba ba Ndrawa Gana'ana ba ba Ndraono Hewi ba ba Ndraono Yebusi, ena'ö uhori ira. 24 Böi angalulu ba Lowalangira ba böi fosumange, ba böi ohia'ö wolaura faulugö dudugö, ba rasa harefa andrö khöra.[13]

25 Lowalangimi Yehowa mifosumange, ba ihöna dania khöu gaurifa, ba fökhö, ba itimba khöu.[14] 26 Ba lö dania salau talu ba lö si lö ono ba danö khöu, ba biha wa'anau nosou ube'e.

27 Ufowaö-waö fönau wameta'u andrö khögu ba ufawuka fefu niha, nirugiu dania, ba moloi dania fönau nemaliu fefu ube'e.[15] 28 Geto ufowaö-waö fönau, ena'ö moloi fönau Ndraono Hewi ba Dawa Gana'ana ba Iraono Kheti labe'e.[16]

29 Ba tenga ha döfi wa'ara utimba ira fönau, fa böi modu'u danö ba fa böi fahöna gutu ndru'u khöu. 30 Uzara-zara wanimba ya'ira fönau, irege ato ami, ba wangokhögö tanö.

31 Ba i'otarai nasi zukhu Kebe'e nolamö, irugi nasi ba Ndrawa Wilisiti, ba i'otarai danö si mate andrö ba irugi mboto nidanö (Oiferati) andrö. Ube'e sa'ae ba dangau niha ba danö, ba ötimba ira fönau.

32 Böi fawu'u li ndra'ugö khöra, ba he ba Lowalangira andrö.[17] 33 Böi si lö tebulö ba danö ira, fa böi labe'e mamazökhi horö ndra'ugö khögu. Na öfosumange Lowalangira, ba tobali tandraŵa khöu.[18]

Famotokhi ba gahe[edit | edit source]

  1. Faigi 20:16
  2. MozIII 19:15
  3. MozV 22:1
  4. MozV 16:19; 27:25
  5. Faigi 22:21
  6. MozIII 25:3
  7. Faigi 20:9
  8. Yos 23:7
  9. Ayati 14–19: Faigi 34:18-26; MozV 16:1–17
  10. Faigi 34:18; MozV 16:16
  11. Faigi 34:23
  12. Faigi 33:2; Yes 6:14; Mal 3:9
  13. MozIII 18:3
  14. MozV 7:13
  15. MozV 11:25
  16. MozV 7:20; Yos 24:12
  17. Faigi 34:12
  18. Sanguhuk 2:3

Fabaliŵa lala[edit source]

Olayama Moze II: 12345678910111213141516171819202122232425262728293031323334353637383940

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö